.jpg)
ទិដ្ឋភាពនៅផ្ទះលក់ពូក ខ្នើយមួយកន្លែងនៅភ្នំពេញ។ ហ៊ាន រង្សី
ភ្នំពេញៈ ការនាំចេញនូវផលិតផលសម្រាប់ប្រើប្រាស់នៅក្នុងបន្ទប់គេងពីកម្ពុជាទៅទីផ្សារអន្តរជាតិក្នុងរយៈពេល ៤ ខែដំបូងឆ្នាំ ២០២០ មានតម្លៃប្រមាណជាង ២៤ លានដុល្លារ កើនឡើងជាង ១៩០ ភាគរយបើធៀបនឹងរយៈពេលដូចគ្នាកាលពីឆ្នាំ ២០១៩។ នេះបើយោងតាមទិន្នន័យពីក្រសួងពាណិជ្ជកម្ម។
ទិន្នន័យដែលភ្នំពេញប៉ុស្តិ៍ទើបទទួលបានបង្ហាញថា ចាប់ពីខែមករា ដល់ខែមេសា ឆ្នាំ ២០២០ ការនាំចេញផលិតផលប្រើប្រាស់ក្នុងបន្ទប់គេងមានតម្លៃ ២៤,២១ លានដុល្លារ កើនឡើង ១៥,៨៦ លានដុល្លារ ឬស្មើនឹង ១៩០,១១ ភាគរយពីចំនួន ៨,៣៤ លានដុល្លារ ក្នុងរយៈពេលដូចគ្នាកាលពីឆ្នាំ ២០១៩។
យោងតាមក្រសួងពាណិជ្ជកម្ម ផលិតផលទាំងនោះរួមមាន ពូក កម្រាលពូក ខ្នើយ ភួយ និងក្រណាត់ក្រាលជាដើម។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃចន្ទថា ការនាំចេញផលិតផលប្រើប្រាស់ក្នុងបន្ទប់គេងទៅកាន់ទីផ្សារអន្តរជាតិបានកើនឡើងជាលំដាប់ ជាពិសេសនារយៈពេល ៤ ខែដើមឆ្នាំ ២០២០ នេះដោយមានកំណើនទៅដល់ជិត ២០០ ភាគរយ។
លោកបន្តថា ជាមួយនឹងគោលនយោបាយរបស់ក្រសួងពាណិជ្ជកម្មក្នុងការជំរុញ និងលើកកម្ពស់គុណភាពផលិតផលផលិតក្នុងស្រុក បច្ចុប្បន្នផលិតផលទាំងនេះត្រូវបាននាំទៅប្រទេសធំៗមួយចំនួនដូចជា អាមេរិក កាណាដា ជប៉ុន អង់គ្លេស អូស្ត្រាលី បារាំង និងនូវែលសេឡង់ ជាដើម។
លោកថ្លែងថា៖ «ទំនិញទាំងនេះត្រូវបានទទួលការបញ្ជាទិញ និងផលិតដោយគោរពទៅតាមបទដ្ឋានបច្ចេកទេសដែលតម្រូវដោយទីផ្សារគោលដៅ និងទៅតាមការចង់បានរបស់ក្រុមហ៊ុនបញ្ជាទិញ។ ទំនិញរបស់យើងគឺជាទំនិញដែលមានគុណភាពនាំចេញសម្រាប់ទីផ្សារប្រកួតប្រជែង។ យើងចង់លើកស្ទួយកេរ្តិ៍ឈ្មោះផលិតផល Made in Cambodia ឲ្យក្លាយទៅជាផលិតផលដែលអតិថិជនទទួលស្គាល់ និងការគាំទ្រជាអន្តរជាតិ»។
លោកបន្ថែមទៀតថា ជាមួយនឹងអត្រាកំណើនដ៏ច្រើននៃការនាំចេញ បច្ចុប្បន្ននៅកម្ពុជាមានរោងចក្រវិនិយោគដែលផលិតផលិតផលទាំងនេះចំនួន ៥ ក្នុងនោះរោងចក្រចំនួន ៤ ស្ថិតក្នុងតំបន់សេដ្ឋកិច្ចពិសេស។ លោកនិយាយថា៖ «ដោយសារតម្លៃពលកម្មនៅស្រុកយើងនៅមានប្រៀប ហេតុនេះខ្ញុំសង្ឃឹមថានឹងមានវិនិយោគិនបន្ថែមទៀតមកបណ្តាក់ទុននៅកម្ពុជា»។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ថា ខណៈពេលទំនាក់ទំនងផ្នែកនយោបាយ និងពាណិជ្ជកម្មរបស់កម្ពុជាជាមួយប្រទេសជាច្រើនលើពិភពលោកកាន់តែមានភាពល្អប្រសើរ និងអាចឈានទៅបង្កើតកិច្ចព្រមព្រៀងពាណិជ្ជកម្មសេរីជាមួយប្រទេសមួយចំនួនក្នុងពេលឆាប់ៗនោះ ឱកាសទាក់ទាញវិនិយោគិនឲ្យចូលមកបើកអាជីវកម្មក៏មានច្រើនផងដែរនាពេលនេះ។
លោកបញ្ជាក់ថា៖ «បើតាមខ្ញុំដឹងបច្ចុប្បន្ននេះមានក្រុមហ៊ុនបរទេសជាច្រើនមានបំណង ឬកំពុងរៀបចំខ្លួនចូលមកវិនិយោគលើវិស័យជាច្រើននៅប្រទេសកម្ពុជា»។
លោកបន្ថែមថា ខណៈជម្លោះពាណិជ្ជកម្មរវាងប្រទេសមហាអំណាចអាមេរិក និងចិននៅតែបន្តមាននោះ កម្ពុជាសង្ឃឹមថានឹងអាចទាក់ទាញបានអ្នកវិនិយោគកាន់តែច្រើនឲ្យចូលមកបណ្តាក់ទុននៅកម្ពុជា ដែលទទួលបានការអនុគ្រោះផ្នែកពាណិជ្ជកម្មជាច្រើនពីប្រទេសធំៗទាំងនោះ៕ LA
