.jpg)
ទីតាំងលក់ម៉ាស់ និងទឹកអាល់កុលលាងដៃមួយកន្លែងនៅឯផ្សារអូឡាំពិក។ ហ៊ាន រង្សី
ភ្នំពេញ: កម្ពុជាបាននាំចេញម៉ាស់ និងសម្ភារពេទ្យទៅកាន់ទីផ្សារអន្តរជាតិមានតម្លៃជិត ២០០ លានដុល្លារ ក្នុងឆមាសទី ១ ឆ្នាំ ២០២០ ខណៈពេលដែលការរីករាលដាលនៃជំងឺកូវីដ ១៩ នៅតែបន្ត ហើយរដ្ឋាភិបាលក៏បានជំរុញលើកទឹកចិត្តក្នុងការផលិតសម្ភារទាំងនេះដើម្បីធ្វើពិពិធកម្មនៃការនាំចេញជំនួសផលិតផលដែលរងផលប៉ះពាល់ពីទីផ្សារ។
យោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជា ការនាំចេញសម្ភារពេទ្យ (PPE) របស់កម្ពុជាមានតម្លៃសរុប ១៩១,៣ លានដុល្លារចាប់ពីខែមករាដល់ខែមិថុនា ឆ្នាំនេះ កើនឡើង ១៣០ ភាគរយ ធៀបនឹងរយៈពេលដូចគ្នាកាលពីឆ្នាំមុនមានចំនួន ៨៣,៣៦ លានដុល្លារ។
ទិន្នន័យនេះបង្ហាញទៀតថា នៅក្នុងរយៈពេលខាងលើការនាំចេញម៉ាស់ពីកម្ពុជាមានតម្លៃសរុប ២,៥៣ លានដុល្លារ។ កាលពីឆ្នាំ ២០១៩ ពុំមានទិន្នន័យនាំចេញផលិតផលម៉ាស់នោះទេ។
គិតត្រឹមថ្ងៃអាទិត្យ ទី ៩ ខែសីហា ការឆ្លងជំងឺកូវីដ ១៩ នៅទូទាំងពិភពលោកកើនដល់ជាង ១៩,៨០ លាននាក់ក្នុងនោះ អ្នកស្លាប់មានចំនួនជិត ៧៣ ម៉ឺននាក់ និងអ្នកជាសះស្បើយចំនួនជាង ១២,៧០ លាននាក់។ នេះបើយោងតាម Worldometer ដែលបង្ហាញបច្ចុប្បន្នភាពនៃស្ថានភាពជំងឺកូវីដ ១៩ នៅលើសកលលោក។
សម្រាប់ប្រទេសកម្ពុជា ករណីវិជ្ជមានជំងឺកូវីដ ១៩ កើនដល់ ២៤៨ នាក់ក្នុងនោះជាសះស្បើយមានចំនួន ២១៧ នាក់។ នេះបើយោងតាមក្រសួងសុខាភិបាលកម្ពុជា។
លោកស្រី កែវ មុំ អគ្គនាយិកាក្រុមហ៊ុន LY LY Food Industry និងក្រុមហ៊ុន Lyly Global Co Ltd ដែលជាក្រុមហ៊ុនផលិតម៉ាស់ក្នុងស្រុកម៉ាក SAFFI ដែលបម្រើដល់សេចក្តីត្រូវការក្នុងស្រុកបានប្រាប់ភ្នំពេញប៉ុស្តិ៍នៅថ្ងៃអាទិត្យថា ការផលិតម៉ាស់នៅក្រុមហ៊ុនរបស់លោកស្រីបានបង្កើនចង្វាក់ផលិតកម្មយ៉ាងច្រើនក្នុងអំឡុងពេលមានការរាតត្បាតជំងឺកូវីដ១៩។
លោកស្រីបញ្ជាក់ថា៖ «រោងចក្រខ្ញុំផលិតជាខ្នាតតូចនៅឡើយ យើងមិនទាន់បាននាំចេញទេ ហើយសម្រាប់ទីផ្សារក្នុងស្រុកម៉ាស់មានតម្រូវការខ្ពស់ក្នុងអំឡុងពេលការរាតត្បាតជំងឺកូវីដ ១៩។ ការលក់របស់យើងមានការកើនឡើងទ្វេដងនៅប៉ុន្មានខែចុងក្រោយនេះ»។
លោកស្រីបានបន្តថា សព្វថ្ងៃលោកស្រីកំពុងស្វែងរកដៃគូសម្រាប់ការនាំចេញទៅកាន់ទីផ្សារអន្តរជាតិ។ លោកស្រីនិយាយថា៖ «យើងរីករាយណាស់ដែលផលិតផលពេទ្យខ្មែរយើង អាចនាំចេញក្នុងតម្លៃជិត ២០០ លានដែលជាតួលេខ ១ ធំ។ យើងស្វាគមន៍រាល់អតិថិជនដែលចង់ទិញម៉ាស់ពីក្រុមហ៊ុនខ្ញុំយកទៅលក់បន្តនៅក្រៅប្រទេស»។
បើយោងតាមទិន្នន័យរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បច្ចុប្បន្នមានរោងចក្រចំនួន ៧ និងសិប្បកម្មចំនួន ៧ មូលដ្ឋាន ដោយមួយចំនួនក្នុងចំណោមនេះកំពុងផលិតសម្ភារបរិក្ខារការពារជំងឺឆ្លងរួចស្រេចទៅហើយ និងមួយចំនួនទៀតបានសុំចុះបញ្ជីផលិតម៉ាស់ និងសម្លៀកបំពាក់ពេទ្យ។
ទិន្នន័យនេះបង្ហាញថា ប្រសិនបើរោងចក្រ និងសិប្បកម្មទាំងនោះដំណើរការផលិតពេញលេញ កម្ពុជានឹងមានសមត្ថភាពផលិតម៉ាស់ប្រមាណ ១៣៨ លាន សម្លៀកបំពាក់ពេទ្យប្រមាណ ២០,៧ លាន និងមួក ពេទ្យប្រមាណ ៩,៦ លាន ក្នុង ១ ខែ។
ទិន្នន័យបានឲ្យដឹងទៀតថា ប្រទេសកម្ពុជាបាននាំចេញម៉ាស់ និងសម្ភារពេទ្យ ទៅកាន់ទីផ្សារប្រទេសចិន ជប៉ុន អាមេរិក និងសហភាពអឺរ៉ុប។
សេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុចេញផ្សាយកាលពីខែឧសភាបានឲ្យដឹងថា រាជរដ្ឋាភិបាលបានសម្រេចឲ្យនាំចេញមុខទំនិញការពារជំងឺឆ្លងគ្រប់ប្រភេទក្នុងអំឡុងពេលនៃការរាតត្បាតជំងឺកូវីដ ១៩ ដោយគាំទ្រ និងលើកទឹកចិត្តឲ្យបណ្តារោងចក្រកាត់ដេរនៅកម្ពុជាផលិតសម្ភារការពារជំងឺឆ្លងសម្រាប់ផ្គត់ផ្គង់តម្រូវការក្នុងស្រុក និងបម្រើការនាំចេញ។
លោកនាយករដ្ឋមន្ត្រី ហ៊ុន សែន កាលពីខែមេសាបានថ្លែងថា រដ្ឋាភិបាលត្រូវការម៉ាស់ក្នុងស្តុកយ៉ាងតិចចំនួន ១០ លានម៉ាស់ សម្លៀកបំពាក់ពេទ្យយ៉ាងតិច ៥ ០០០ សម្រាប់។
ទិន្នន័យគយ និងរដ្ឋាករបង្ហាញថា កម្ពុជាបាននាំចេញសម្ភារពេទ្យមានតម្លៃ ១៩០,៩៨ លានដុល្លារកាលពីឆ្នាំ ២០១៩៕ LA
វីដេអូ៖
