ភ្នំពេញៈ ការដាក់ចេញគោលនយោបាយរបស់រដ្ឋាភិបាលក្នុងការលើកកម្ពស់ផលិតភាពក្នុងវិស័យកសិកម្មបានធ្វើឱ្យការនាំចេញផលិតផលកសិកម្មនៅកម្ពុជាកើនឡើងគ្រប់វិស័យក្នុងនោះការនាំចេញម្ទេសស្រស់ក្នុងឆ្នាំ ២០២០ សម្រេចបានជាង ៧ ម៉ឺនតោន កើនជាង ២៧ ភាគរយ បើធៀបនឹងឆ្នាំ ២០១៩។ នេះបើតាមទិន្នន័យពីអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ។
ទិន្នន័យនាំចេញផលិតផលកសិកម្មដែលផ្សព្វផ្សាយនៅលើបណ្តាញសង្គមរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន កាលពីថ្ងៃទី ៦ ខែមករា ឱ្យដឹងថា ក្នុងឆ្នាំ ២០២០ ការនាំចេញម្ទេសស្រស់ សម្រេចបាន ៧០ ៥៤៦ តោន កើនឡើង ២៧,០៨ ភាគរយ ពីចំនួន ៥៥ ៥១៣ តោន កាលពីឆ្នាំ ២០១៩។
លោក ឈឹម វជិរ៉ា ប្រធានមន្ទីរកសិកម្មខេត្តបាត់ដំបងបានប្រាប់ ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា ក្នុងឆ្នាំ ២០២០ ផ្ទៃដីដាំដុះបន្លែ (បន្លែគ្រប់មុខ និងម្ទេស) ក្នុងខេត្តបាត់ដំបង បានកើនដល់ជាង ១ ០០០ ហិកតា ឬស្មើជាង ១៥០ ភាគរយនៃផែនការដែលបានកំណត់។
ការកើនឡើងផ្ទៃដីដាំដុះនេះ ដោយសាររដ្ឋាភិបាលបានដាក់ចេញគោលនយោបាយក្នុងការពង្រឹង និងពង្រីកសក្តានុពលផលិតផលកសិកម្ម ខណៈតម្លៃផលិតផលកសិកម្មក៏ល្អជាងឆ្នាំ ២០១៩ ដែរ។ លោកបន្ថែមថា សម្រាប់ផ្ទៃដីដាំម្ទេសក្នុងខេត្តបាត់ដំបងក្នុងឆ្នាំ ២០២០ គឺមានការកើនឡើងនៅស្ទើរគ្រប់ស្រុកទាំងអស់។
លោកថ្លែងថា៖ «នៅក្នុងឆ្នាំ ២០២០ តម្លៃម្ទេសបានកើនឡើងខ្ពស់ជាងឆ្នាំមុនច្រើន ហើយទីផ្សារក៏មិនជួបការលំបាកដែរ ដោយមន្ទីរកសិកម្ម និងអាជ្ញាធរខេត្តតែងជំរុញ និងលើកទឹកចិត្តឱ្យប្រជាកសិករត្រូវបង្កើនការដាំដុះដំណាំឱ្យបានច្រើន និងស្របតាមតម្រូវការទីផ្សារ។ ជាមួយគ្នានេះយើងក៏បានជំរុញឱ្យពួកគាត់ធ្វើកសិកម្មជាលក្ខណៈបណ្តុះអាជីវកម្ម ឬការទិញ-លក់តាមកិច្ចសន្យាផងដែរ»។
សម្រាប់ផ្ទៃដីដាំដុះម្ទេសក្នុងឆ្នាំនេះលោក វជីរ៉ា អះអាងថាការដាំម្ទេសនឹងមានសកម្មភាពល្អជាងឆ្នាំមុន។ លោកថ្លែងថា៖ «នេះជាការធ្វើពិពិធកម្មលើផលិតផលកសិកម្ម ដើម្បីជំរុញការនាំចេញឱ្យបានកាន់តែច្រើន»។
បើយោងតាមលោក វជិរ៉ា ក្នុងឆ្នាំ ២០២០ កន្លងមកមានសហគមន៍កសិកម្មចំនួន ៩៦ បានធ្វើកិច្ចសន្យាជាមួយក្រុមហ៊ុន ឬអ្នកប្រមូលទិញ។
ប្រធានមន្ទីរពាណិជ្ជកម្មខេត្តបាត់ដំបងលោក គឹម ហួត បាននិយាយថា ទោះបីទិន្នផលម្ទេសស្រស់ក្នុងខេត្តបាត់ដំបងកាលពីឆ្នាំ ២០២០ មិនកើនឡើងច្រើន ប៉ុន្តែសម្រាប់ការនាំចេញម្ទេសស្រស់ទៅប្រទេសថៃដោយឆ្លងកាត់តាមខេត្តបាត់ដំបង គឺមានរហូតជាង ៣២ ០០០ តោន។ លោកបន្តថា ផ្អែកតាមតួលេខក្រសួងកសិកម្ម ការនាំចេញតាមច្រកខេត្តបាត់ដំបងមានជាង ៤៥ ភាគរយនៃការនាំចេញសរុប។
ជាមួយនឹងស្ថានភាពដូចបច្ចុប្បន្នលោក គឹម ហួត បានអះអាងថា៖ «បើស្ថានភាពតម្លៃ និងទីផ្សារផលិតផលកសិកម្មមានភាពល្អបែបនេះ ខ្ញុំរំពឹងថា ការនាំចេញផលិតផលកសិកម្មនៅឆ្នាំនេះនឹងកាន់តែមានភាពល្អប្រសើរកាន់តែខ្លាំងបន្ថែមទៀត»។
លោក មាស សុផល ដែលមានផ្ទៃដីដាំម្ទេសក្នុងខេត្តកំពង់ធំ សៀមរាប និងកំពង់ឆ្នាំង និងជាអ្នកប្រមូលទិញម្ទេសពីប្រជាកសិករមួយចំនួនដើម្បីយកទៅសម្ងួតសម្រាប់នាំចេញទៅប្រទេសចិនបានលើកឡើងថា កត្តាអាកាសធាតុមិនអំណោយផលបានធ្វើឱ្យទិន្នផលផ្លែម្ទេសធ្លាក់ចុះច្រើនក្នុងឆ្នាំ ២០២០ ដែលជាហេតុធ្វើឱ្យតម្លៃរបស់វាបានហក់ឡើងយ៉ាងខ្ពស់នារយៈពេលចុងក្រោយនេះ។ លោកបន្តថា ការធ្លាក់ចុះទិន្នផលឆ្នាំកន្លងមកបានធ្វើឱ្យផែនការនាំចេញម្ទេសក្រៀមទៅប្រទេសចិនរបស់លោកត្រូវផ្អាក។
លោកអះអាងថា៖ «អាកាសធាតុប្រែប្រួលបានធ្វើឱ្យការដាំម្ទេសក្នុងឆ្នាំមុនជួបបញ្ហាច្រើន។ ជាមួយនឹងសម្ទុះតម្លៃពេលនេះ ខ្ញុំគិតថាក្នុងឆ្នាំ ២០២១ ផ្ទៃដីដាំម្ទេសនឹងកើនឡើង»៕ LA