ភ្នំពេញៈ កម្ពុជាបាននាំចេញសន្លឹកថ្នាំជក់ស្ងួតជាង ៥,៨ ពាន់តោនទៅកាន់ប្រទេសចំនួន ៩ កាលពីឆ្នាំ ២០២០ ដែលមានតម្លៃជាង ១៧,៤៦ លានដុល្លារ ធ្លាក់ចុះ ២៨ ភាគរយធៀបនឹងឆ្នាំ ២០១៩។ នេះបើយោងតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ។
ទិន្នន័យដែលបានផ្តល់ដោយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបង្ហាញថា កម្ពុជាបាននាំចេញថ្នាំជក់សរុប ៥ ៨២០,៨២ តោន កាលពីឆ្នាំមុនធ្លាក់ចុះ ១៤,០២ ភាគរយ ធៀបនឹងឆ្នាំ ២០១៩ ដែលមានចំនួន ៦ ៧៦៩,៩៧ តោន។ ក្នុងនោះទឹកប្រាក់ដែលទទួលបានមានតម្លៃ ១៧ ៤៦២ ៤៦០ ដុល្លារ ធ្លាក់ចុះ ២៨,៣៤ ភាគរយ បើធៀបនឹងឆ្នាំ ២០១៩ ដែលមាន ចំនួន ២៤ ៣៧១ ៨៧៤,៧២ ដុល្លារ។
ទិន្នន័យនេះបន្ថែមថា កម្ពុជាបាននាំចេញស្លឹកថ្នាំជក់ស្ងួតទៅប្រទេសវៀតណាម ហុងគ្រី ឥណ្ឌូនេស៊ី អារ៉ាប់រួម បែលហ្ស៊ិក អាហ្វ្រិកខាងត្បូង ក្រិក សិង្ហបុរី និងអាលឺ្លម៉ង់។
កាលពីឆ្នាំ ២០១៦ ប្រទេសកម្ពុជា និងវៀតណាម បានយល់ព្រមលើការអនុគ្រោះពន្ធសម្រាប់ផលិតផលកសិកម្មឆ្លងកាត់ព្រំដែនទាំង ២។ ស្ថិតក្រោមកិច្ចព្រមព្រៀងនេះកម្ពុជាត្រូវបានអនុញ្ញាតឱ្យនាំថ្នាំជក់ស្ងួត ៣ ០០០ តោនទៅវៀតណាម ដោយរួចពន្ធរយៈពេល ១ ឆ្នាំ។
បច្ចុប្បន្ននេះដំណាំថ្នាំជក់ត្រូវបានដាំច្រើននៅខេត្តត្បូងឃ្មុំ កំពង់ចាម និងខេត្តក្រចេះ និងមួយចំនួននៅខេត្តកណ្តាល។ ជាធម្មតាការប្រមូលផលថ្នាំជក់ត្រូវបានធ្វើឡើងក្នុងអំឡុងដើមខែមីនា ដល់ចុងខែមេសា។
លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានប្រាប់ ភ្នំពេញ ប៉ុស្តិ៍ថា ផលថ្នាំជក់ដែលប្រមូលបាននៅខេត្តត្បូងឃ្មុំត្រូវបានឈ្មួញនាំទៅលក់បន្តនៅប្រទេសវៀតណាម ប៉ុន្តែលោកមិនដឹងថា ការនាំចេញទៅវៀតណាមនោះមានការផ្តល់កូតាបែបណានោះទេ។
លោកនិយាយថា៖ «ខ្ញុំគ្រាន់តែដឹងថា ថ្នាំជក់មួយចំនួនត្រូវបាននាំចេញទៅប្រទេសវៀតណាម ប៉ុន្តែសម្រាប់បរិមាណប៉ុន្មាននោះខ្ញុំមិនដឹងទេ»។
លោក ពិសិដ្ឋ បន្ថែមថា សព្វថ្ងៃនេះថ្នាំជក់នៅខេត្តត្បូងឃ្មុំក៏មានឈ្មួញជនជាតិចិនមកប្រមូលទិញពីប្រជាកសិករផងដែរ ប៉ុន្តែលោកមិនដឹងថា គេនាំទៅទីណានោះទេ។
ក្នុងឆ្នាំ ២០២១ ខេត្តត្បូងឃ្មុំ មានផ្ទៃដីដាំថ្នាំជក់ ៦៨០ ហិកតា ដោយផ្តល់ទិន្នផលជាមធ្យម ១,៧០ តោន ក្នុង ១ ហិកតា។ គិតត្រឹមថ្ងៃទី ១៦ មីនា ការប្រមូលផលថ្នាំជក់នៅខេត្តត្បូងឃ្មុំសម្រេចបាន ៦៨ ភាគរយ។
អ្នកស្រី ម៉ាត់ សុកក្រី កសិករដាំថ្នាំជក់លើផ្ទៃដី ២,៥ ហិកតា នៅខេត្តត្បូងឃ្មុំ បានឱ្យដឹងថា ពេលនេះដល់ពេលប្រមូលផលស្លឹកថ្នាំជក់ហើយដោយរំពឹងថា នឹងទទួលបានទិន្នផលចន្លោះពី ៥ ទៅ ៦ តោន នៅក្នុងរដូវប្រមូលផលឆ្នាំនេះ។
អ្នកស្រី សុកក្រី បានបន្ថែមថា ឆ្នាំនេះតម្លៃថ្នាំជក់ស្ងួតមានគុណភាពល្អចន្លោះពី ៨ ៥០០ រៀល ទៅ ១០ ០០០ រៀល ក្នុង ១ គីឡូក្រាម ដែលតម្លៃនេះបានពឹងផ្អែកតែពីឈ្មួញក្នុងស្រុកប៉ុណ្ណោះ។
អ្នកស្រីនិយាយថា៖ «សូមឱ្យឈ្មួញមកទិញឱ្យតម្លៃសមរម្យជាងនេះបន្តិចមក អ្នកចម្ការចំណាយលុយច្រើនណាស់លើកម្មករ បើតម្លៃទាបពេកយើងមិនរួចខ្លួនទេ»៕LA