.jpg)
លោក លឹម ហេង អនុប្រធានសភាពាណិជ្ជកម្មកម្ពុជា នាពេលកន្លងមក។ រូបថត ហ្វេសប៊ុក
ភ្នំពេញៈ ប្រាក់ចំណូលដែលកម្ពុជាទទួលបានពីការនាំចេញម៉ាស៊ីនបរិធាន (Electrical Equipment) និងសម្ភារអគ្គិសនីទៅទីផ្សារអន្តរជាតិក្នុងឆ្នាំ ២០២០ កើនឡើងជាង ៣១ ភាគរយធៀបនឹងឆ្នាំ ២០១៩។ នេះបើយោងតាមទិន្នន័យពីក្រសួងពាណិជ្ជកម្មកម្ពុជា។
ទិន្នន័យឱ្យដឹងថា នៅក្នុងឆ្នាំ ២០២០ កម្ពុជានាំចេញម៉ាស៊ីនបរិធាន និងសម្ភារអគ្គិសនីក្នុងតម្លៃសរុប ៧៥៥,៣៤ លានដុល្លារកើន ៣១,៤៩ ភាគរយពីចំនួន ៥៧៤,៤៤ លានដុល្លារក្នុងឆ្នាំ ២០១៩។ ប្រាក់ដែលទទួលបានពីការនាំចេញម៉ាស៊ីនបរិធាន និងសម្ភារអគ្គិសនីមានចំណែកទីផ្សារប្រមាណ ៤,៣៨ ភាគរយនៃការនាំចេញសរុបរបស់កម្ពុជានៅក្នុងឆ្នាំ ២០២០ ដែលមាន ១៧ ២១៥,៣៧ លានដុល្លារ។
យោងតាមទិន្នន័យខាងលើ ការនាំចេញម៉ាស៊ីនបរិធាន និងសម្ភារអគ្គិសនីបានឈរនៅលេខរៀងទី ៤ នៃការនាំចេញសរុបរបស់កម្ពុជានៅក្នុងឆ្នាំ ២០២០ ដែលនាំមុខដោយផលិតផលសម្លៀកបំពាក់មានតម្លៃ ៧ ៤២០,២៨ លានដុល្លារ (៤៣ ភាគរយ) ផលិតផលស្បែកជើងមានតម្លៃ ១ ១១៦,៧៣ លានដុល្លារ (៦ ភាគរយ) និងសម្ភារធ្វើដំណើរមានតម្លៃ ៩៦៤,៧ លានដុល្លារ (ប្រហែល ៦ ភាគរយ)។
សេចក្តីប្រកាសព័ត៌មានរបស់ក្រសួងពាណិជ្ជកម្មកាលពីថ្ងៃទី ២៩ ខែមីនា ឱ្យដឹងថា ទោះបីកម្ពុជា និងពិភពលោកស្ថិតក្នុងកាលៈទេសៈប្រឈមការរំខានដោយសារការរាតត្បាតជំងឺកូវីដ១៩ ដែលរាំងស្ទះខ្លះពីទីផ្សារគោលដៅក៏ការនាំចេញរបស់កម្ពុជាក្នុងឆ្នាំ ២០២០ មិនបានធ្លាក់ចុះនោះទេ។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ ភ្នំពេញ ប៉ុស្តិ៍ កាលពីថ្ងៃទី ៥ ខែមេសាថា កំណើនការនាំចេញម៉ាស៊ីនបរិធាន និងសម្ភារអគ្គិសនីពីកម្ពុជាទៅទីផ្សារអន្តរជាតិក្នុងឆ្នាំ ២០២០ គឺមានជាប់ទាក់ទងនឹងជម្លោះពាណិជ្ជកម្មរវាងមហាអំណាចសេដ្ឋកិច្ចចិន និងអាមេរិក ដែលជម្លោះនេះជំរុញឱ្យរោងចក្រនៅប្រទេសចិនមួយចំនួនប្តូរទីតាំងមកកម្ពុជា ដែលជាប្រទេសមានលក្ខណៈអំណោយផលច្រើនសម្រាប់ការវិនិយោគ និងការនាំចេញ។ លោកបន្តថា កម្ពុជាជាប្រទេសដែលមានច្បាប់វិនិយោគល្អប្រសើរ សម្បូរកម្លាំងពលកម្ម និងទទួលបានភាពអនុគ្រោះពន្ធលើការនាំចេញទំនិញទៅកាន់ប្រទេសជាច្រើន។
លោកអះអាងថា៖ «នេះជាកត្តាចម្បងដែលធ្វើឱ្យការនាំចេញម៉ាស៊ីនបរិធាន និងសម្ភារអគ្គិសនីពីកម្ពុជាទៅកាន់ទីផ្សារអន្តរជាតិកើនឡើងជាបន្តបន្ទាប់ ខណៈនិន្នាការនៃការចូលមកបណ្តាក់ទុនលើរោងចក្រផលិតសម្ភារទាំងអស់នេះក៏កំពុងកើនឡើងដែរ»។
លោកលើកឡើងថា កំណើននេះយើងអាចឃើញតាមរយៈការអនុម័តរបស់ក្រុមប្រឹក្សាអភិវឌ្ឍន៍កម្ពុជា (CDC)។
យោងតាមបណ្តាញសង្គមផ្លូវការរបស់ CDC ក្នុងត្រីមាសទី ១ ឆ្នាំ ២០២១ មានគម្រោងវិនិយោគលើរោងចក្រផលិតសម្ភារអគ្គិសនី និងអេឡិចត្រូនិកជិត ១០ ក្រុមហ៊ុនត្រូវបាន CDC អនុម័ត។ គម្រោងទាំងនោះមានដូចជា គម្រោងសាងសង់រោងចក្រផលិតសម្ភារអគ្គិសនីគ្រឿងបង្គុំអំពូលភ្លើង គ្រឿងបង្គុំសម្ភារអេឡិចត្រូនិក ផ្ទាំងកញ្ចក់សូឡា និងផលិតសម្ភារបរិក្ខារសម្រាប់ចង្ក្រាន BBQ ជាដើម។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (បណ្ឌិត្យសភាកម្ពុជា) បាននិយាយថា កំណើនការនាំចេញម៉ាស៊ីនបរិធាន និងសម្ភារអគ្គិសនី គឺជាពិពិធកម្មថ្មីមួយទៀតនៃការនាំចេញរបស់កម្ពុជាដែលកំណើននេះនឹងរួមចំណែកដល់ការលើកតម្កើងសេដ្ឋកិច្ចជាតិតាមរយៈការបង្កើតការងារក៏ដូចជាជំនាញថ្មីៗសម្រាប់ពលករកម្ពុជា។
លោកបន្តថា បច្ចុប្បន្នរោងចក្រផលិតម៉ាស៊ីនបរិធាន និងសម្ភារអគ្គិសនី គេឃើញកើនឡើងជាបន្តបន្ទាប់នៅកម្ពុជា ពិសេសនៅតំបន់សេដ្ឋកិច្ចពិសេស។
លោកអះអាងថា៖ «បើការផលិតក្នុងវិស័យនេះកាន់តែរីកចម្រើន ហើយក្រុមហ៊ុនដែលចូលមកវិនិយោគសុទ្ធតែជាក្រុមហ៊ុនមានកេរ្តិ៍ឈ្មោះលំដាប់អន្តរជាតិនោះ ខ្ញុំរំពឹងថាការនាំចេញផលិតផលក្នុងវិស័យនេះនឹងមានភាពរីកចម្រើន និងអាចពង្រីកខ្លួនបានកាន់តែធំនៅពេលអនាគត»៕
