ភ្នំពេញ: កម្ពុជាបាននាំចេញគ្រាប់ស្វាយចន្ទីសម្រេចបានជាង ២០ ម៉ឺនតោនកើន ២០,៥១ ភាគរយ ទៅកាន់ទីផ្សារអន្តរជាតិយ៉ាងហោចប្រទេស ១០ ក្នុងរយៈពេល ៩ ខែឆ្នាំ ២០២០ បើធៀបនឹងរយៈពេលដូចគ្នាកាលពីឆ្នាំមុន ខណៈក្រុមហ៊ុនជប៉ុនបានចាប់ដៃគូជាមួយសិប្បកម្មក្នុងស្រុកដើម្បីពង្រីកផលិតកម្ម និងត្រៀមនាំចេញ។ នេះបើយោងតាមក្រសួងកសិកម្ម រុក្ខាប្រមាញ់ និងនេសាទ។
ទិន្នន័យពីក្រសួងនេះបានឱ្យដឹងថា ប្រទេសកម្ពុជាបាននាំចេញផលិតផលស្វាយចន្ទីក្នុងរយៈពេលនេះទៅកាន់ទីផ្សារនៃប្រទេសមួយចំនួនដូចជា វៀតណាម ថៃ ជប៉ុន រុស្ស៊ី ចិន ហុងកុង បារាំង កូរ៉េ តួកគី និងបង់ក្លាដែស។
អ្នកស្រី អ៊ិន ឡៃហួត ម្ចាស់សិប្បកម្មកែច្នៃគ្រាប់ស្វាយចន្ទីម៉ាដាមហួតស្ថិតនៅស្រុកកំពង់ស្វាយ ខេត្តកំពង់ធំ បានប្រាប់ ភ្នំពេញ ប៉ុស្តិ៍ ថា ក្នុងរយៈពេល ៩ ខែនៃឆ្នាំនេះ សិប្បកម្មនេះបានកែច្នៃគ្រាប់ស្វាយចន្ទីប្រមាណ ៤០ តោនរួចលក់ចេញសម្រាប់ទីផ្សារក្នុងស្រុក ខណៈពេញ ១ ឆ្នាំ ២០១៩ សិប្បកម្មនេះបានកែច្នៃនឹងលក់គ្រាប់ស្វាយចន្ទីចំនួន ៥០ តោនប៉ុណ្ណោះ។
អ្នកស្រី ឡៃហួត បានកត់សម្គាល់ថា តម្រូវការទីផ្សារក្នុងស្រុកបានរងផលប៉ះពាល់ដោយសារការធ្លាក់ចុះភ្ញៀវទេសចរបរទេសក្នុងឆ្នាំនេះបណ្តាលមកពីការរីករាលដាលកូវីដ ១៩។
អ្នកស្រីថ្លែងថា៖ «ទីផ្សារគ្រាប់ស្វាយចន្ទីកំពុងថយចុះបន្តិចដោយសារការធ្លាក់ចុះនៃភ្ញៀវទេសចរអន្តរជាតិក្នុងអំឡុងពេលមានវិបត្តិជំងឺកូវីដ១៩ផ្ទុះខ្លាំង ប៉ុន្តែសិប្បកម្មខ្ញុំនៅតែបន្តផលិតកែច្នៃជាធម្មតាសម្រាប់ផ្គត់ផ្គង់ទីផ្សារក្នុងស្រុក»។
អ្នកស្រី ឡៃហួត ក៏ជាប្រធានសមាគមសិប្បកម្មកែច្នៃគ្រាប់ស្វាយចន្ទីជ័យសំបូរដែលមានសមាជិក ៣៣ គ្រួសារ កំពុងដាំដុះស្វាយចន្ទីលើផ្ទៃដីសរុប ៣៤៤ ហិកតា នៅក្នុងខេត្តកំពង់ធំ ដែលទើបបានចុះហត្ថលេខាជាមួយក្រុមហ៊ុនជប៉ុនពង្រីកសិប្បកម្មកែច្នៃ។
ដោយសម្លឹងឃើញពីសក្តានុពលទីផ្សារគ្រាប់ស្វាយចន្ទីនៅទីផ្សារអន្តរជាតិ ក្រោយការរីករាលដាលជំងឺកូវីដ ១៩ នៅទូទាំងសកលលោក អ្នកស្រីបាននិងកំពុងពង្រីកអាជីវកម្មរបស់ខ្លួនដោយសាងសង់រោងចក្រកែច្នៃគ្រាប់ស្វាយចន្ទីថ្មី ១ ដែលមានសមត្ថភាពកែច្នៃស្វាយចន្ទី ៣ តោន ក្នុង ១ ថ្ងៃ និងមានលទ្ធភាពបកគ្រាប់ស្វាយចន្ទីស្រស់ ១០ តោន ក្នុង ១ ថ្ងៃ។
រោងចក្រនេះសាងសង់អស់ ២០ ម៉ឺនដុល្លារ ដែលគ្រោងនឹងដាក់ឱ្យដំណើរការជាផ្លូវការនៅចុងឆ្នាំនេះដោយរំពឹងថានឹងនាំចេញទៅកាន់ទីផ្សារប្រទេសជប៉ុនជាលើកដំបូងចំនួន ៩០ តោន ក្នុង ១ ឆ្នាំ តាមរយៈក្រុមហ៊ុន Top Planning Japan Co.។
អ្នកស្រីបន្តថា៖ «នៅឆ្នាំនេះ ខ្ញុំទទួលបានទីផ្សារធំៗចំនួន ២ ដែលបានចុះកិច្ចសន្យាផ្គត់ផ្គង់ឱ្យក្រុមហ៊ុនជប៉ុន និងក្រុមហ៊ុនក្នុងស្រុក «សហករណ៍ខ្មែរសិរីរាង្គ» ប្រមាណ ៣០០ គីឡូក្រាមក្នុង ១ ខែហើយក្រៅពីនេះ ខ្ញុំនឹងលក់រាយនៅបណ្តាខេត្តមួយចំនួនទៀត»។
ជាទូទៅគេប្រមូលផលស្វាយចន្ទីចាប់ពីដើមខែមីនារហូតដល់ខែឧសភា។ ក្នុងរដូវប្រមូលផលស្វាយចន្ទីនៅឆ្នាំ ២០២០ មានតម្លៃនៅដើមរដូវចន្លោះពី ៦ ៨០០ ទៅ ៧ ០០០ រៀល និងតម្លៃចុងរដូវចន្លោះពី ៤ ៧០០ ទៅ ៥ ០០០ រៀល ក្នុង ១ គីឡូក្រាម។
អ្នកស្រីបញ្ជាក់ថា៖ «ខ្ញុំសម្គាល់ថា គ្រាប់ស្វាយចន្ទីកំពុងមានទីផ្សារល្អមានឈ្មួញជាច្រើនមករកទិញនៅសិប្បកម្មរបស់ខ្ញុំនៅប៉ុន្មានខែចុងក្រោយនេះ ឱ្យតែមានគ្រាប់ស្វាយចន្ទី មិនខ្វះអ្នកទិញនោះទេ»។
បើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ប្រទេសកម្ពុជាបាននាំចេញផលិតផលកសិកម្មទៅកាន់ទីផ្សារអន្តរជាតិមានតម្លៃ ១ ៥០០ លានដុល្លារ កាលពីឆ្នាំ ២០១៩ កើនពីជិត ១ ពាន់លានដុល្លារកាលពីឆ្នាំ ២០១៣។
ប្រទេសកម្ពុជា នាំចេញស្វាយចន្ទី ២០២ ៣១៨ តោន កាលពីឆ្នាំ ២០១៩ កើនជិត ១០០ ភាគរយ ធៀបនឹងឆ្នាំ ២០១៨។ ផ្ទៃដីសរុបនៃការដាំដុះស្វាយចន្ទីមានចំនួន ១៤៩ ៦៦០ ហិកតានៅទូទាំងប្រទេស៕ LA