.jpg)
ការនាំចេញអង្ករកម្ពុជាទៅទីផ្សារអន្តរជាតិនៅក្នុងរយៈពេល ៥ ខែដើមឆ្នាំ ២០២០ សម្រេចបានជាង ៣៥ ម៉ឺនតោន កើនឡើង ៤២ ភាគរយ។ ហុង មិនា
ភ្នំពេញៈ ការនាំចេញអង្ករកម្ពុជាទៅទីផ្សារអន្តរជាតិនៅក្នុងរយៈពេល ៥ ខែដើមឆ្នាំ ២០២០ សម្រេចបានជាង ៣៥ ម៉ឺនតោនកើនឡើង ៤២ ភាគរយធៀបនឹងរយៈពេលដូចគ្នាកាលពីឆ្នាំមុនក្នុងនោះការនាំទៅសហភាពអឺរ៉ុបមានបរិមាណ និងអត្រាកំណើនគួរឲ្យកត់សម្គាល់។ នេះបើតាមរបាយការណ៍នាំចេញអង្ករកម្ពុជាប្រចាំខែឧសភា ឆ្នាំ ២០២០។
របាយការណ៍បានឲ្យដឹងថា ការនាំចេញអង្ករដែលបានឆ្លងកាត់ការត្រួតពិនិត្យភូតគាមអនាម័យក្នុងរយៈពេល ៥ ខែដើមឆ្នាំ ២០២០ មានចំនួន ៣៥៦ ០៩៧ តោន កើន ៤២,៣៤ ភាគរយ បើធៀបនឹងរយៈពេល ៥ ខែឆ្នាំ ២០១៩ ដែលមានចំនួន ២៥០ ១៧២ តោន។
ក្នុងនោះការនាំចេញទៅកាន់សហគមន៍អឺរ៉ុបមាន ១២២ ០១០ តោន កើន ៥១,១០ ភាគរយធៀបនឹងចំនួន ៨០ ៧៤៩ តោនកាលពីរយៈពេល ៥ ខែឆ្នាំ ២០១៩ ទីផ្សារប្រទេសចិនមានចំនួន ១៣៦ ៨២៥ តោន កើន ២៥,២៦ ភាគរយ ប្រទេសក្នុងតំបន់អាស៊ានមានចំនួន ៤៥ ៨២៥ តោនកើន ៤៥,៣៩ ភាគរយ និងទិសដៅផ្សេងៗទៀតមានចំនួន ៥១,៤៣៧ តោន កើនឡើង កើនឡើង ៧៩,៤០ ភាគរយ។
សម្រាប់បរិមាណនាំចេញក្នុងរយៈពេល ៥ ខែខាងលើគឺអង្ករក្រអូបមានប្រមាណ ៨១,២៤ ភាគរយ ស្មើនឹង ២៨៩ ២៨៧ តោន អង្ករចម្រុះមាន ៦២ ៧៧៩ តោន និងអង្ករចំហុយ មាន ៤ ០៣១ តោន។
ដោយឡែកក្នុងខែឧសភា ឆ្នាំ ២០២០ នេះការនាំចេញអង្ករសម្រេចបាន ៥៥ ៨៤៥ តោន កើន ៥៣,៣៨ ភាគរយធៀបនឹងខែឧសភា ឆ្នាំ ២០១៩ ក្នុងនោះអង្ករក្រអូបគ្រប់ប្រភេទមាន ៥១ ៦៨៣ តោន អង្ករចម្រុះគ្រប់ប្រភេទ ៣ ៥៧៨ តោន និងអង្ករចំហុយមាន ៥៨៤ តោន។
លោក ចាន់ ពេជ្រ ប្រធានគ្រប់គ្រងទូទៅក្រុមហ៊ុននាំចេញអង្ករ Signatures of Asia បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ចាប់តាំងពីដើមឆ្នាំ ២០២០ ការនាំចេញអង្ករបានកើនឡើងជាបន្តបន្ទាប់ ជាពិសេសបន្ទាប់ពីការផ្ទុះជំងឺកូវីដ ១៩ ដែលធ្វើឲ្យតម្រូវការស្តុកទុកស្បៀងអាហារកើនឡើងនៅគ្រប់ប្រទេសទាំងអស់លើពិភពលោក។ លោកបន្តថា កំណើននៃការនាំនេះគឺមានទៅគ្រប់ទិសដៅក្នុងនោះមានទីផ្សារចំនួនដែលកំពុងមានកំណើននៃការបញ្ជាទិញខ្ពស់គួរឲ្យកត់សម្គាល់ដូចជា ប្រទេសអូស្ត្រាលីជាដើម។
លោកថ្លែងថា៖ «វាជាសញ្ញាល្អសម្រាប់ទីផ្សារអង្ករកម្ពុជា ពិសេសអង្ករក្រអូប ដែលមានកំណើននៃការនាំចេញទៅកាន់ទីផ្សារអន្តរជាតិកាន់តែច្រើន»។
ទោះយ៉ាងណា ដោយសារតែកំណើននាំចេញអង្ករពេលនេះមានជាប់ទាក់ទងនឹងការរីករាលដាលជំងឺកូវីដ ១៩ លោក ចាន់ ពេជ្រ អះអាងថា មិនទាន់ហ៊ានសន្និដ្ឋានបែបណាទេចំពោះការនាំចេញនៅពេលខាងមុខ ព្រោះស្ថានភាពនៃការគ្រប់គ្រងជំងឺនេះ និងការស្តុកទុកស្បៀងនៅតាមប្រទេសនីមួយៗក៏មានច្រើនដែរពេលនេះ។
លោក កាន់ គន្ធី អគ្គនាយករងក្រុមហ៊ុននាំចេញអង្ករ Amru Rice មិនអាចទាក់ទងបានទេកាលពីម្សិលមិញ ប៉ុន្តែលោកបានសរសេរនៅលើបណ្តាញសង្គមហ្វេសប៊ុកផ្ទាល់ខ្លួនកាលពីចុងសប្តាហ៍ថា ក្នុងដំណាក់កាលដែលជំងឺកូវីដ១៩ កំពុងបន្តការរីករាលដាលនៅស្ទើរគ្រប់ប្រទេសលើពិភពលោកគឺប្រហែលមានតែការនាំចេញអង្ករប៉ុណ្ណោះដែលមិនរងផលប៉ះពាល់។ លោកបន្តថា ជាមួយនឹងភាពវិជ្ជមាននេះ លោកគិតថាការនាំចេញអង្ករទៅទីផ្សារអន្តរជាតិនឹងអាចសម្រេចបានរហូតដល់ ៨០ ម៉ឺនតោន នៅក្នុងឆ្នាំ ២០២០ នេះ។
លោកថ្លែងថា៖ «កូវីដ ១៩ បានធ្វើឲ្យប៉ះពាល់ដល់ឆ្អឹងខ្នងសេដ្ឋកិច្ចកម្ពុជា និងពិភពលោកស្ទើរគ្រប់វិស័យ ក៏ប៉ុន្តែកូវីដ ១៩ ក៏បានឆ្លុះបញ្ចាំងឲ្យឃើញថា វិស័យកសិកម្ម និងស្បៀងអាហារពិតជាមានសារ:សំខាន់។ វាក៏ជាឱកាសដែលកម្ពុជាត្រូវយកចិត្តទុកដាក់ និងអភិវឌ្ឍវិស័យកសិកម្មបន្ថែមឲ្យអស់សក្តានុពល»។
លោក លឹម ហេង អនុប្រធានសភាពាណិជ្ជកម្មកម្ពុជាបាននិយាយថា ការកើនឡើងបរិមាណនាំចេញនៅពេលនេះគឺជាប់ទាក់ទងនឹងក្តីបារម្ភរបស់ប្រទេសជាច្រើនលើពិភពលោកពីកង្វះខាតស្តុកស្បៀងអាហារនាអំឡុងពេលការរាតត្បាតនៃជំងឺកូវីដ១៩។ លោកបន្តថានេះគឺជាឱកាសដែលបង្ហាញថា កម្ពុជាត្រូវតែខិតខំក្នុងការពង្រឹង និងពង្រីកការដាំដុះ និងបង្កើនផលកសិផលដែលទាក់ទងនឹងចំណីអាហារឲ្យបានកាន់តែខ្លាំងបន្ថែមទៀត។
លោកនិយាយថា៖ «កូវីដធ្វើឲ្យប៉ះពាល់ការនាំចេញផលិតផលកសិឧស្សាហកម្ម ប៉ុន្តែសម្រាប់វិស័យផលិតផលកសិកម្មចំណីអាហារគឺមានភាពល្អប្រសើរខ្លាំង»។
លោកបន្ថែមថា ជាមួយភាពអំណោយផលនៃទីតាំងភូមិសាស្ត្រ និងអាកាសធាតុ កម្ពុជានៅមានឱកាសច្រើនក្នុងការទាក់ទាញអ្នកវិនិយោគឲ្យចូលមកបណ្តាក់ទុនលើវិស័យកសិកម្ម។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា កាលពីឆ្នាំ ២០១៩ ការនាំអង្ករចេញរបស់កម្ពុជាទៅកាន់ទីផ្សារអន្តរជាតិមានចំនួន ៦២០ ១០៦ តោន ធ្លាក់ចុះ ០,៩៧ ភាគរយ បើធៀបនឹងឆ្នាំ ២០១៨ ដែលមានចំនួន ៦២៦ ២២៥ តោន។ ក្នុងនោះប្រាក់ទទួលបានមានចំនួន ៥០១ លានដុល្លារ ធ្លាក់ចុះ ៤,៣ ភាគរយបើធៀបនឹងឆ្នាំ ២០១៨ ដែលមានតម្លៃ ៥២៤ លានដុល្លារ៕ LA
