.jpg)
ទិដ្ឋភាពនៃបណ្តាញចែកចាយអគ្គិសនីក្នុងរាជធានីភ្នំពេញ។ ហេង ជីវ័ន
ភ្នំពេញៈ កម្ពុជាគ្រោងនឹងចរចាជាមួយថៃក្នុងការទិញថាមពលអគ្គិសនី ៣០០ មេហ្គាវ៉ាត់បន្ថែម ខណៈកម្ពុជាកំពុងប្រឈមនឹងកង្វះថាមពល។ នេះបើតាមក្រសួងរ៉ែ និងថាមពល។
លោក Victor Jona អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពលបានប្រាប់ភ្នំពេញប៉ុស្ដិ៍កាលពីថ្ងៃអង្គារថា កម្ពុជានឹងចរចាជាមួយអាជ្ញាធរអគ្គិសនីថៃ (Egat) នៅចុងខែវិច្ឆិកា ឬដើមខែធ្នូឆ្នាំនេះ ដើម្បីទិញអគ្គិសនីពីថៃ ៣០០ មេហ្គាវ៉ាត់ដែលនឹងប្រតិបត្តិការនៅឆ្នាំ ២០២៤។ លោកបានបន្តថា៖ «យើងទិញអគ្គិសនីបន្ថែមពីប្រទេសថៃ ដើម្បីឆ្លើយតបតាមតម្រូវការ»។
លោក Jona បានឲ្យដឹងថា បច្ចុប្បន្នកម្ពុជាបានទិញអគ្គិសនីពីប្រទេស ថៃ ប្រហែលពី ១០០ មេហ្គាវ៉ាត់ ទៅ ១៥០ មេហ្គាវ៉ាត់ រួចហើយចាប់តាំងពីឆ្នាំ ២០០០។ លោកលើកឡើងថា បច្ចុប្បន្នប្រទេសកម្ពុជាមានសមត្ថភាពផលិតថាមពលអគ្គិសនីដោយខ្លួនឯងបាន ២០០០ មេហ្គាវ៉ាត់ ប៉ុន្តែចាំបាច់ត្រូវទិញអគ្គិសនីបន្ថែមក្នុងចន្លោះពី ២០ ភាគរយដល់ ២៥ ភាគរយពីប្រទេសជិតខាង។
លោក Patana Sangsriroujana អនុប្រធានទទួលបន្ទុកគោលនយោបាយ និងផែនការបានប្រាប់កាសែត Bangkok Post ថាអាជ្ញាធរអគ្គិសនីថៃបានចាត់តាំងលោក Sontirat Sontijirawong រដ្ឋមន្ដ្រីក្រសួងថាមពលក្នុងការចរចាជាមួយប្រទេសកម្ពុជា និងប្រទេសមីយ៉ាន់ម៉ាអំពីពាណិជ្ជកម្មថាមពលនៅពេលអនាគត។ លោកបានថ្លែងថា៖ «ការលក់ឲ្យប្រទេស កម្ពុជា នឹងធ្វើឡើងលឿនជាងប្រទេស មីយ៉ាន់ម៉ា ដោយសារខ្សែបញ្ជូនថាមពលមួយចំនួនត្រូវបានបង្កើតឡើងនៅកម្ពុជា»។
លោកបានឲ្យដឹងថា ពាណិជ្ជកម្មអគ្គិសនីទៅប្រទេសទាំងពីរគួរតែចាប់ផ្ដើមត្រឹមឆ្នាំ ២០២៣។ រដ្ឋមន្ដ្រីក្រសួងថាមពលរបស់ប្រទេសទាំងបីនេះចាំបាច់ត្រូវយល់ព្រមលើកិច្ចព្រមព្រៀងមួយ។
រដ្ឋាភិបាលកម្ពុជាបានអនុម័តរួចហើយក្នុងការទិញអគ្គិសនី ២ ៤០០ មេហ្គាវ៉ាត់ ពីរោងចក្រថាមពលដំណើរការដោយធ្យូងថ្មរបស់ប្រទេសឡាវដែលជា «ការផ្គត់ផ្គង់មានការធានារបស់រដ្ឋាភិបាលឡាវ»។ នេះបើយោងតាមលទ្ធផលនៃកិច្ចប្រជុំរបស់គណៈរដ្ឋមន្ដ្រីកាលពីខែកញ្ញា។
ឯកសារបង្ហាញថា ទំហំវិនិយោគនៃគម្រោងទាំងពីរនេះមានចំនួនសរុប ៤ ៩៧០ លានដុល្លារអាមេរិកដែលរួមមានហេដ្ឋារចនាសម្ព័ន្ធអណ្ដូងរ៉ែធ្យូងថ្ម រោងចក្រថាមពល អនុស្ថានីយ និងខ្សែបញ្ជូនអគ្គិសនីទៅព្រំដែនរបស់ប្រទេសកម្ពុជា និងឡាវ។
ប្រទេស កម្ពុជា បច្ចុប្បន្ននាំចូលថាមពល ៤៤២,៥ មេហ្គាវ៉ាត់ ពីបណ្ដាប្រទេសជិតខាងក្នុងចំណោមនេះ ២៧៧ មេហ្គាវ៉ាត់ ត្រូវបាននាំចូលពីប្រទេសវៀតណាម ១៣៥,៥ មេហ្គាវ៉ាត់ នាំចូលពីប្រទេស ថៃ និង ៣០ មេហ្គាវ៉ាត់នាំចូលពីប្រទេស ឡាវ៕ LA
