ភ្នំពេញៈ កម្ពុជានឹងទទួលបានផ្លូវដែក (ដែករ៉ៃ) ប្រមាណ ១៤០ គីឡូម៉ែត្រពីរដ្ឋាភិបាលថៃយកមកធ្វើឲ្យប្រសើរឡើង និងមានសុវត្ថិភាពសម្រាប់ផ្លូវដែកភាគខាងជើងពីភ្នំពេញ-ប៉ោយប៉ែត និងជាការរួមចំណែកជំរុញការដោះដូរទំនិញរវាងប្រទេសទាំង ២ ឲ្យបានកាន់តែច្រើនជាងមុន បន្ទាប់ពីរដ្ឋាភិបាលទាំង ២ បានធ្វើការតភ្ជាប់កាលពីឆ្នាំ ២០១៨។
លោក វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូន បានប្រាប់ភ្នំពេញប៉ុស្តិ៍កាលពីថ្ងៃពុធថា បន្ទាប់ពីបានធ្វើពិធីតភ្ជាប់ផ្លូវដែករវាងប្រទេសទាំង ២ ដោយប្រមុខរដ្ឋាភិបាលប្រទេសទាំង ២ កាលពីចុងឆ្នាំ ២០១៨ មកខាងភាគីថៃបានសន្យាថានឹងផ្តល់នូវដែករ៉ៃប្រមាណ ១៤០ គីឡូម៉ែត្រដល់កម្ពុជា ដើម្បីធ្វើការកែលម្អស្ថានភាពផ្លូវដែកនៅកម្ពុជាឲ្យមានភាពប្រសើរ។
លោកថ្លែងថា៖ «ភាគីថៃគ្រោងនឹងប្រគល់ដែករ៉ៃប្រមាណ ១៤០ គីឡូម៉ែត្រឲ្យកម្ពុជានៅក្នុងខែសីហា ឬខែកញ្ញាខាងមុខ ដើម្បីយកមកពង្រឹងផ្លូវដែកនៅកម្ពុជាឲ្យមានគុណភាពប្រសើរជាងមុន និងដើម្បីជួយជំរុញការដឹកជញ្ជូនទំនិញរវាងប្រទេសទាំង ២ ឲ្យកាន់តែមានភាពងាយស្រួល និងច្រើនជាងមុន»។
បើតាមលោក ស៊ឹមសូរិយា បន្ទាប់ផ្លូវដែកភាគខាងជើងនេះត្រូវបានកែលម្អ វានឹងអាចផ្ទុកទម្ងន់បាន ២០ តោន និងល្បឿនអាចកើនពី ៦០-៧០ គីឡូម៉ែត្រក្នុង ១ ម៉ោង ខណៈកាលពីមុនបានត្រឹម ៣០ គីឡូម៉ែត្រ។
ថៃជាប្រទេសនាំចូលទំនិញកម្ពុជាឈានមុខគេ ដែលមានចំនួន ៤ ភាគរយនៃការនាំចេញសរុបរបស់កម្ពុជា បន្ទាប់ពីអាមេរិក ជប៉ុន អាល្លឺម៉ង់ ចិន អង់គ្លេស និងកាណាដា។
ទិន្នន័យពីស្ថានទូតកម្ពុជាប្រចាំនៅប្រទេសថៃ បង្ហាញថា ពាណិជ្ជកម្មទ្វេភាគីរវាងកម្ពុជា និងថៃមានតម្លៃប្រមាណ ៣,១ ពាន់លានដុល្លារក្នុងរយៈពេល ៤ ខែដំបូងឆ្នាំនេះ កើនឡើង ១៨,៣ ភាគរយបើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះការនាំចេញរបស់កម្ពុជាទៅថៃបានកើនឡើង ១០៦ ភាគរយធៀបនឹងរយៈពេលដូចគ្នាកាលពីឆ្នាំមុនដល់ ៦៨៧ លានដុល្លារ ខណៈការនាំចូលបានកើនឡើង ៥,៦ ភាគរយដល់ចំនួន ២,៤ ពាន់លានដុល្លារ។
ភាគច្រើននៃការនាំចេញរបស់កម្ពុជាទៅប្រទេសថៃ គឺត្បូងមានតម្លៃ គ្រឿងអលង្ការ ផលិតផលកសិកម្ម និងអាលុយមីញ៉ូម។ ប្រទេសនាំចូលភាគច្រើនរួមមានប្រេងឥន្ធនៈ ម៉ូតូ រថយន្ត ត្បូងមានតម្លៃ និងគ្រឿងអលង្ការ។
កម្ពុជាបានបញ្ចេញប្រាក់ប្រហែល ២២៦,៦ លានដុល្លារសម្រាប់ការស្ដារឡើងវិញផ្លូវដែកនៅភាគខាងត្បូង និងខាងលិច ដើម្បីកែលម្អការដឹកជញ្ជូនតាមរយៈផ្លូវដែក។
មូលនិធិទាំងនេះប្រហែល ៨៥ លានដុល្លារបានពីថវិកាជាតិ និងផ្នែកនៅសល់ត្រូវបានផ្ដល់ហិរញ្ញប្បទានដោយធនាគារអភិវឌ្ឍន៍អាស៊ី និងដៃគូអភិវឌ្ឍន៍ផ្សេងទៀត៕ LA