ភ្នំពេញៈ អ្នកនាំចេញ និងអ្នកជំនាញលើកឡើងថា ការសម្រេចបានកិច្ចព្រមព្រៀងពាណិជ្ជកម្មសេរី (FTA) រវាងកម្ពុជា និងចិនដែលរំពឹងថា នឹងត្រូវសម្រេចបានត្រឹមចុងឆ្នាំនេះ មិនគ្រាន់តែបង្កើនបរិមាណនាំចេញរបស់កម្ពុជាប៉ុណ្ណោះទេ ប៉ុន្តែថែមទាំងទាក់ទាញការវិនិយោគកាន់តែច្រើនទៀតទៅក្នុងការផ្គត់ផ្គង់វត្ថុធាតុដើម និងការធ្វើពិពិធកម្មលើវិស័យឧស្សាហកម្ម។
ការចរចា FTA ជុំទី ៣ រវាងប្រទេសកម្ពុជា និងចិនបានដោះស្រាយរួចហើយលើបញ្ហាដែលនៅសេសសល់នៅក្នុងអត្ថបទកិច្ចព្រមព្រៀង និងបានអនុម័តជាគោលការណ៍ជុំវិញការបើកច្រកទីផ្សារលើទំនិញ និងសេវា។ នេះបើយោងតាមសេចក្ដីប្រកាសព័ត៌មានបានពីក្រសួងពាណិជ្ជកម្មដែលចេញផ្សាយកាលពីថ្ងៃអង្គារ។
ការចរចានេះភាគច្រើនផ្ដោតការយកចិត្តទុកដាក់លើការបើកច្រកទីផ្សារសម្រាប់ទំនិញ សេវា ការវិនិយោគ កិច្ចសហប្រតិបត្តិការសេដ្ឋកិច្ច និងបច្ចេកទេស និងបទប្បញ្ញត្តិផ្សេងទៀតដែលជួយបង្កើនការនាំចេញទំនិញពីប្រទេសកម្ពុជា ព្រមទាំងដើម្បីទាក់ទាញការវិនិយោគកាន់តែច្រើនពីប្រទេសចិនដែលរំពឹងថា នឹងត្រូវចុះហត្ថលេខាដោយមេដឹកនាំទាំង ២ ត្រឹមចុងឆ្នាំនេះ។
សេចក្ដីប្រកាសព័ត៌មាននេះបន្តថា៖ «ប្រសិនបើមេដឹកនាំរបស់ប្រទេសទាំង ២ យល់ព្រមលើអត្ថបទកិច្ចព្រមព្រៀងនេះ និងការបើកច្រកទីផ្សារដែលត្រូវបានស្នើឡើងនេះ ការនាំចេញពីកម្ពុជាត្រូវបានរំពឹងថា នឹងកើនឡើងលើសពីអត្រាកំណើនជាមធ្យម ២០ ភាគរយក្នុង ១ ឆ្នាំក្នុងឆ្នាំ ២០១៧ ធៀប ២០១៨ និងពីឆ្នាំ ២០១៨ ធៀបនឹងឆ្នាំ ២០១៩»។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជាបានប្រាប់ភ្នំពេញប៉ុស្ដិ៍ថា ការធ្វើ FTA ជាមួយប្រទេសចិននឹងជួយបង្កើនការនាំចេញរបស់ប្រទេសកម្ពុជា មិនគ្រាន់តែវិស័យកាត់ដេរប៉ុណ្ណោះទេ ប៉ុន្តែថែមទាំងវិស័យផ្សេងទៀតផងដែរ។ ជាមួយគ្នានេះដែរនឹងមានលំហូរការវិនិយោគកាន់តែច្រើនឡើងៗពីប្រទេសចិនមកប្រទេសកម្ពុជាដែលជួយក្នុងការធ្វើពិពិធកម្មវិស័យឧស្សាហកម្មរបស់ប្រទេសនេះទៀតផង។
លោកបន្តថា៖ «ជាមួយគ្នានេះដែរ យើងនឹងមើលឃើញលំហូរវិនិយោគពីប្រទេសចិន ទៅលើឧស្សាហកម្មនៃការផ្គត់ផ្គង់វត្ថុធាតុដើមសម្រាប់វិស័យកាត់ដេរ ស្បែកជើង និងទំនិញ ធ្វើដំណើរ គ្រឿងអេឡិចត្រូនិក និងឧស្សាហកម្មមេកានិច និងកង់ជាដើម»។
លោក Anthony Galliano អគ្គនាយកក្រុមហ៊ុន Cambodia Investment Management បានឲ្យដឹងថា កម្ពុជានឹងទទួលអត្ថប្រយោជន៍តាមរយៈការដើរតួនាទីដ៏សំខាន់នៅក្នុងផែនការពង្រីកខ្លួន និងឥទ្ធិពលរបស់ប្រទេសចិននៅក្នុងតំបន់ ហើយភាគច្រើនតាមរយៈការវិនិយោគហេដ្ឋារចនាសម្ព័ន្ធ ការពង្រីកតំបន់សេដ្ឋកិច្ចពិសេស និងតាមរយៈការសាងសង់ មូលដ្ឋានផលិតកម្មនៅប្រទេសកម្ពុជា ដើម្បីនាំចេញទៅកាន់ទីផ្សារអាមេរិក និងប្រទេសផ្សេងទៀតនៅលើពិភពលោក។
លោកលើកឡើងថា៖ «បច្ចុប្បន្នសេដ្ឋកិច្ចរបស់ប្រទេសចិនកំពុងស្ទុះងើបឡើងវិញជាបណ្ដើរៗ ហើយកម្ពុជាកំពុងស្ថិតក្នុងការជម្នះសេដ្ឋកិច្ចកូវីដ ស្របពេលដែលកិច្ចព្រមព្រៀងពាណិជ្ជកម្មសេរីជិតនឹងសម្រេច និងត្រូវបានអនុវត្តនោះ ប្រទេសកម្ពុជាអាចរំពឹងថានឹងកើនឡើងយ៉ាងខ្លាំងនៅក្នុងទំនាក់ទំនងពាណិជ្ជកម្មរវាងប្រទេសទាំង ២ នេះ»។
មេដឹកនាំប្រទេសទាំង ២ ធ្លាប់បង្ហាញបំណងបង្កើនពាណិជ្ជកម្មទ្វេភាគីដល់ ១០ ពាន់លានដុល្លារ ត្រឹមឆ្នាំ ២០២៣។ ទំហំពាណិជ្ជកម្មទ្វេភាគីរវាងប្រទេស ទាំង ២ បានកើនឡើងដល់ ៧,៤ ពាន់លានដុល្លារកាលពីឆ្នាំ ២០១៨ កើនឡើង ២២ ភាគរយធៀបនឹង ៦,០៤ ពាន់លានដុល្លារក្នុងឆ្នាំ ២០១៧៕LA