The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​នឹង​ធ្វើ​ការ​សាង​សង់​មជ្ឈមណ្ឌល​បដិសណ្ឋារកិច្ច

កម្ពុជា​នឹង​ធ្វើ​ការ​សាង​សង់​មជ្ឈមណ្ឌល​បដិសណ្ឋារកិច្ច

ភ្ញៀវ​ទេសចរ​ជាតិ និង​អន្ដរ​ជាតិ​កំពុង​ថត​រូប​នៅ​ពី​មុខ​ប្រាសាទ​អង្គរ​វត្ត កាល​ពី​ឆ្នាំ​មុន។
ភ្ញៀវ​ទេសចរ​ជាតិ និង​អន្ដរ​ជាតិ​កំពុង​ថត​រូប​នៅ​ពី​មុខ​ប្រាសាទ​អង្គរ​វត្ត កាល​ពី​ឆ្នាំ​មុន។ ហុង មិនា

កម្ពុជា​នឹង​ធ្វើ​ការ​សាង​សង់​មជ្ឈមណ្ឌល​បដិសណ្ឋារកិច្ច

ភ្នំពេញ: អ្នក​នាំ​ពាក្យ​អាជ្ញាធរ​អប្សរា​បាន​ថ្លែង​ថា ក្រុមហ៊ុន​ឯកជន​កំពុង​សម្លឹង​មើល​ការ​វិនិយោគ​ដែល​មាន​ទឹក​ប្រាក់ ១០ លាន​ដុល្លារ​អាមេរិក​លើ​ការ​សាងសង់​មជ្ឈមណ្ឌល​បដិសណ្ឋារកិច្ច​សម្រាប់​បម្រើ​ភ្ញៀវ​ទេសចរ​នៅ​ខាង​មុខ​ប្រាសាទ​អង្គរ​វត្ត ក្នុង​បំណង​ធ្វើ​ឲ្យ​ដំណើរ​កម្សាន្ត​របស់​ភ្ញៀវ​ទេសចរ​កាន់​តែ​ល្អ​ប្រសើរ​ក្នុង​តំបន់​ឧទ្យាន​អង្គរ​បុរាណ​មួយ​នេះ។

មជ្ឈមណ្ឌល​នេះ​នឹង​ត្រូវ​បាន​បម្រើ​ជា​មជ្ឈមណ្ឌល​សម្រាក​លម្ហែ​កាយ​របស់​ភ្ញៀវ​ទេសចរ​ត្រូវ​បាន​គេ​រំពឹង​ថា​នឹង​ត្រូវ​ការ​ពេលវេលា​ពីរ​ឆ្នាំ​ដើម្បី​បញ្ចប់។ នេះ​បើ​យោង​តាម​លោក ឡុង កុសល អ្នក​នាំ​ពាក្យ​អាជ្ញាធរ​អប្សរា​ប្រាប់​ភ្នំពេញ​ប៉ុស្ដិ៍​កាល​ពី​ម្សិលមិញ។

លោក​លើក​ឡើង​ថា៖ «វា​នឹង​ត្រូវ​សាងសង់​នៅ​លើ​ផ្ទៃ​ដី​ពីរ​ហិកតា​នៅ​ខាង​មុខ​ប្រាសាទ​អង្គរ​វត្ត​ជាមួយ​អគារ​ដែល​រួម​មាន ​កន្លែង​ចត​រថយន្ត ការិយាល័យ​ព័ត៌មាន​ទេសចរណ៍ ភោជនីយដ្ឋាន កន្លែង​ញ៉ាំ​អាហារ​និង​ភេសជ្ជៈ និង​ហាង​លក់​វត្ថុ​អនុស្សាវរីយ៍​ផង​ដែរ»។

លោក​បាន​បន្ត​ថា ពាណិជ្ជករ​តូចៗ​ដែល​កំពុង​លក់​វត្ថុ​អនុស្សាវរីយ៍ អាហារ និង​ភេសជ្ជៈ​នៅ​ជុំវិញ​តំបន់​ប្រាសាទ​អង្គរ​នឹង​ត្រូវ​បាន​ស្នើ​ឲ្យ​រើ​ទៅ​លក់​នៅ​ក្នុង​អគារ​នេះ​នៅ​ពេល​អគារ​នេះ​បាន​សាងសង់​រួច។

លោក​បញ្ជាក់​ថា៖ «គោល​បំណង​គឺ​ដើម្បី​រៀបចំ​សណ្ដាប់​ធ្នាប់​ការ​ធ្វើ​អាជីវកម្ម​នៅ​ជុំវិញ​តំបន់​អង្គរ ដើម្បី​នាំ​យក​រូបភាព​កាន់​តែ​ល្អ​ប្រសើរ​សម្រាប់​វិស័យ​ទេសចរណ៍។ ​មជ្ឈមណ្ឌល​នេះ​នឹង​ត្រូវ​បាន​រចនា​ឡើង​តាម​រចនាប័ទ្ម​របស់​ខ្មែរ។ យើង​ចង់​សាងសង់​ឲ្យ​រួច​នៅ​ពេល​ឆាប់ៗ​នេះ ប៉ុន្តែ​វា​ត្រូវ​ការ​ការ​សិក្សា​ច្រើន​ក្នុង​ការ​ធ្វើ​ឲ្យ​ប្រាកដ​ថា​អគារ​នេះ​នឹង​មិន​ប៉ះពាល់​ដល់​តំបន់​បេតិកភណ្ឌ​ដែល​មាន​ស្រាប់»។

ប៉ុន្តែ​កាល​ពី​ម្សិលមិញ​លោក កុសល មិន​បាន​បង្ហាញ​ពី​ព័ត៌មាន​លម្អិត​របស់​វិនិយោគិន​ដោយ​បាន​លើក​ឡើង​ថា លោក​មិន​បាន​ដឹង​អំពី​ព័ត៌មាន​លម្អិត​បន្ថែម​អំពី​គម្រោង​នេះ​ទេ។

លោក ហូ វណ្ឌី សហប្រធាន​ក្រុម​ការងារ​វិស័យ​ទេសចរណ៍​ឯកជន-រដ្ឋាភិបាល បាន​ថ្លែង​ថា​ គំនិត​នៃ​ការ​បង្កើត​ឲ្យ​មាន​មជ្ឈមណ្ឌល​នេះ​នឹង​ជួយ​អភិវឌ្ឍ​វិស័យ​ទេសចរណ៍​តាម​រយៈ​ការ​នាំ​យក​ស្ដង់ដារ​អនាម័យ​អាហារ​និង​សេវា​សម្រាប់​ភ្ញៀវ​ទេសចរ។

លោក​បញ្ជាក់​ថា៖ «ការ​មាន​មជ្ឈមណ្ឌល​មួយ​ដើម្បី​ស្វាគមន៍​ភ្ញៀវ​ទេសចរ​ដូច​នេះ គឺ​ជា​រឿង​ដ៏​ល្អ​មួយ។ វា​នឹង​ជួយ​ជំរុញ​ឲ្យ​មាន​ស្ដង់ដារ​សេវាកម្ម និង​អនាម័យ​អាហារ​កាន់​តែ​ល្អ​ប្រសើរ។ វា​ក៏​បាន​នាំ​ឲ្យ​មាន​ការ​គ្រប់គ្រង និង​សណ្ដាប់​ធ្នាប់​នៅ​ជុំវិញ​តំបន់​នេះ​កាន់​តែ​ល្អ​ប្រសើរ​ផង​ដែរ។ ដរាប​ណា​វា​មិន​មែន​ជា​ការ​បង្ខិត​បង្ខំ​ដល់​ភ្ញៀវ​ទេសចរ​ឲ្យ​មក​ទស្សនា​នៅ​ទី​នេះ អ៊ី​ចឹង​វា​នឹង​មិន​មាន​ផល​ប៉ះពាល់​អាក្រក់​ដល់​ទេសចរ​កញ្ចប់​ដែល​មាន​ស្រាប់​នោះ​ទេ។

លោក សុខ សង្វា កូន​ប្រុស​របស់​លោក​ឧបនាយក​រដ្ឋ​មន្ដ្រី សុខ អាន ដែល​ទើប​នឹង​ត្រូវ​បាន​តែង​តាំង​នៅ​ពេល​ថ្មីៗ​ជា​អនុប្រធាន​អាជ្ញាធរ​អប្សរា កាលពី​ម្សិលមិញ​បាន​បដិសេធ​ដោយ​មិន​ធ្វើ​អត្ថាធិប្បាយ​ស្ដី​ពី​ព័ត៌​មាន​លម្អិត​បន្ថែមរ​បស់​គម្រោង​នេះ​ទេ។

ខេត្ត​សៀមរាប​ដែល​ជា​ខេត្ត​សំបូរ​ប្រាសាទ​បុរាណ​របស់​កម្ពុជា​បាន​ជាប់​ចំណាត់​ថ្នាក់​លេខ​ ២ ជា​ទិសដៅ​ទេសចរណ៍​កំពូល​របស់​ពិភពលោក​ឆ្នាំ​ ២០១៥ និង​ចំណាត់​ថ្នាក់​លេខ​ ១ ​ក្នុង​តំបន់​អាស៊ី​ដោយ​គេហទំព័រ TripAdvisor ជា​គេហ​ទំព័រ​ទេសចរណ៍​ឈាន​មុខ​គេ​មួយ​របស់​ពិភពលោក​កាលពី​ខែ​មេសា​កន្លង​មក។​

កម្ពុជា​ទទួល​បាន​ពាន​រង្វាន់​បេតិកភណ្ឌ​វប្បធម៌ និង​ជា​ទិស​ដៅ​ទេសចរណ៍​ល្អ​បំផុត​នៅ​ក្នុង​ពិព័រណ៍​ទេសចរណ៍​ពិភព​លោក (WTF) នៅ​ទីក្រុង​ស៊ាងហៃ​កាលពី​ដើម​ខែ​មុន​ផង​ដែរ។

សូម​រំលឹក​ថា​ ចាប់​ពី​ខែ​មករា ដល់​ខែ​មេសា តំបន់​ឧទ្យាន​បុរាណ​មួយ​នេះ​បាន​ទាក់ទាញ​ភ្ញៀវ​ទេសចរ​ជិត​ដល់​ ៨៤២ ៧២០​ នាក់​ដែល​រក​ប្រាក់​ចំណូល​បាន​ប្រហែល​២៤,១​លាន​ដុល្លារ​អាមេរិក​៕PB

អត្ថបទគួរចាប់អារម្មណ៍