ភ្នំពេញៈ សិប្បកម្មកែច្នៃស្វាយចន្ទីជ័យសំបូរមានផែនការនាំចេញគ្រាប់ស្វាយចន្ទីជាលើកដំបូងទៅកាន់ទីផ្សារប្រទេសជប៉ុននៅខែក្រោយនេះ បន្ទាប់ពីដាក់ឲ្យដំណើរការកាលពីចុងឆ្នាំ ២០២០។
អ្នកស្រី អ៊ឹន ឡៃហួត ម្ចាស់សិប្បកម្មកែច្នែគ្រាប់ស្វាយចន្ទីជ័យសំបូរ ប្រាប់ភ្នំពេញ ប៉ុស្តិ៍ថាសិប្បកម្មរបស់អ្នកស្រីនឹងផ្គត់ផ្គង់គ្រាប់ស្វាយចន្ទីចំនួន ៩ តោនឲ្យក្រុមហ៊ុនជប៉ុន Top Planning Japan Co., Ltd ដែលជាដៃគូសហការក្នុងការសាងសង់រោងចក្រកែច្នៃគ្រាប់ស្វាយចន្ទីដែលមានតម្លៃ ២០ ម៉ឺនដុល្លារ។
អ្នកស្រី ឡៃហួត ឲ្យដឹងថា តាមផែនការសិប្បកម្មរបស់អ្នកស្រីត្រូវផ្គត់ផ្គង់គ្រាប់ស្វាយចន្ទីឲ្យក្រុមហ៊ុនជប៉ុននេះ ប៉ុន្តែការនាំចេញសម្រាប់ខែមេសាចំនួន ៨ តោនត្រូវបានពន្យារពេលដោយសារវិធានការរឹតបន្តឹងការធ្វើដំណើរ ដើម្បីទប់ស្កាត់ការរាតត្បាតជំងឺកូវីដ១៩។ ទោះបីយ៉ាង អ្នកស្រីនាំចេញគ្រាប់ស្វាយចន្ទីឲ្យក្រុមហ៊ុននេះចំនួន ៩ តោនទៀតនៅខែ ឧសភា ខាងមុខនេះ។
អ្នកស្រីថ្លែងថា៖ «ដៃគូយើងចង់ឲ្យនាំចេញឆាប់ៗ ខ្ញុំសង្ឃឹមថានឹងអាចនាំចេញបានតាមផែនការនៅខែក្រោយនេះ»។
អ្នកស្រីឲ្យដឹងទៀតថា ដោយមានតម្រូវការច្រើននៅឆ្នាំនេះ សិប្បកម្មរបស់អ្នកស្រីមានផែនការបង្កើនបរិមាណទិញស្វាយចន្ទីពីកសិកររហូតដល់ ៥០០ តោនសម្រាប់កែច្នៃនាំចេញ។
អ្នកស្រីថ្លែងថា៖ «ការបញ្ជាទិញពីដៃគូក្នុងបរិមាណច្រើននៅឆ្នាំនេះ យើងទិញស្វាយចន្ទីក្នុងតម្លៃសមរម្យពីសមាជិករបស់យើង ដើម្បីលើកកម្ពស់ជីវភាពគាត់»។
សិប្បកម្មកែច្នៃគ្រាប់ស្វាយចន្ទីជ័យសំបូរមានសមត្ថភាពកែច្នៃគ្រាប់ស្វាយចន្ទីពី ២ ទៅ ៣ តោនក្នុង ១ ថ្ងៃ និងមានលទ្ធភាពបកគ្រាប់ស្វាយចន្ទីស្រស់ ១០ តោនក្នុង ១ ថ្ងៃ។ យោងតាមកិច្ចសន្យាសិប្បកម្មនេះត្រូវផ្គត់ផ្គង់គ្រាប់ស្វាយចន្ទីឲ្យក្រុមហ៊ុនជប៉ុននេះចំនួន ៩០ តោនក្នុង ១ ឆ្នាំនៅដំណាក់កាលដំបូង។
បើយោងតាមក្រសួងកសិកម្ម កម្ពុជាបាននាំចេញផលិតផលគ្រាប់ស្វាយចន្ទីទៅកាន់ទីផ្សារ វៀតណាម ថៃ ជប៉ុន រុស្ស៊ី ចិន ហុងកុង បារាំង កូរ៉េខាងត្បូង តួកគី និង បង់ក្លាដែសកាលពីឆ្នាំ២០១៩។
កម្ពុជាបាននាំចេញផលិតផលដំណាំកសិឧស្សាហកម្មចំនួន ៦ ទាំងផ្លូវការ និងក្រៅផ្លូវការសម្រេចបានជាង ៨,៥៥ លានតោន ដែលមានតម្លៃទឹកប្រាក់ជាង ២,៣២ ពាន់លានដុល្លារនៅឆ្នាំ ២០២០។ ផលិតផលទាំងនោះរួមមាន ផលិតផលដំឡូងមី ផ្លែស្វាយស្រស់ គ្រាប់ស្វាយចន្ទី ផ្លែចេកស្រស់ មៀនប៉ៃលិន និងម្រេច។ នេះយោងតាមតួលេខក្រសួងកសិកម្ម រុក្ខាប្រមាញ់ និងនេសាទ៕