.jpg)
កម្ពុជានឹងនាំចេញផ្លែស្វាយស្រស់ ទៅកាន់កូរ៉េខាងត្បូងនៅថ្ងៃពុធសប្ដាហ៍នេះ។ នេះបើយោងតាមមន្រ្តីក្រសួងកសិកម្ម រុក្ខាប្រមាញ់ និងនេសាទ។ ហេង ជីវ័ន
ភ្នំពេញៈ ការនាំចេញផ្លែស្វាយស្រស់របស់កម្ពុជាជាផ្លូវការទៅកាន់ប្រទេស កូរ៉េខាងត្បូង ជាលើកដំបូងនឹងត្រូវចាប់ផ្តើមនៅថ្ងៃពុធសប្តាហ៍នេះ បន្ទាប់ពីមន្ត្រីជំនាញនៃទីភ្នាក់ងារអនាម័យ និងភូតគាមអនាម័យប្រទេសកូរ៉េ ធ្វើតេស្ត ដោយជោគជ័យលើគុណភាព និងភូតគាមអនាម័យរួចមក។ នេះបើយោងតាមមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោក កែ មុន្ធីវុធ ប្រធាននាយកដ្ឋានការពារដំណាំ អនាម័យ និងភូតគាមអនាម័យនៃក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍ កាលពីម្សិលមិញថា បន្ទាប់ពីអ្នកជំនាញផ្នែកភូតគាមអនាម័យកូរ៉េមកធ្វើការត្រួតពិនិត្យជាច្រើនលើករួចមក គេបានបញ្ជាក់ថា ផ្លែស្វាយស្រស់កម្ពុជាដែលសម្អាត និងឆ្លងកាត់ការកម្ចាត់មេរោគ និងដង្កូវរួចអាចនាំចេញទៅប្រទេសកូរ៉េបាន។
លោកបានបន្តថា ការនាំចេញជាផ្លូវការលើកដំបូងនេះនឹងធ្វើឡើងដោយក្រុមហ៊ុន Hyundai Mao Legacy Co., Ltd ដែលក្រុមហ៊ុនប្រើប្រាស់ម៉ាស៊ីនកម្ចាត់រុយចោះផ្លែដោយប្រើចំហាយទឹកក្តៅដែលជាការចង់បានរបស់ប្រទេសកូរ៉េ។ ទោះយ៉ាងណាលោកមិនបានដឹងពីបរិមាណដែលក្រុមហ៊ុន Hyundai Mao Legacy Co., Ltd គ្រោងនឹងត្រូវនាំចេញលើកដំបូងនេះទេ។
លោកមានប្រសាសន៍ថា៖ «ខ្ញុំគិតថា ការនាំចេញក្នុងដំណាក់កាលដំបូងនេះ អាចមិនមានបរិមាណច្រើនទេ ព្រោះតាមខ្ញុំដឹងគេនឹងដឹកតាមយន្តហោះ ហេតុនេះបរិមាណដំបូងអាចស្ថិតក្រោម ១០ តោនប៉ុណ្ណោះ ហើយនៅពេលមានទីផ្សារល្អ ក្រុមហ៊ុននឹងបង្កើនការនាំចេញ និងអាចប្តូរទៅដឹកតាមកប៉ាល់វិញ»។
រហូតដល់ពេលនេះកម្ពុជាបាននាំចេញផ្លែស្វាយស្រស់ដោយផ្អែកលើកិច្ចព្រមព្រៀង ឬពិធីសារភូតគាមអនាម័យចំនួន ២ ប្រទេសរួចហើយ គឺប្រទេស វៀតណាម និងថៃ។ ក្រៅពីនោះគឺជាការនាំចេញដោយមិនមានកិច្ចព្រមព្រៀងរបស់អាជ្ញាធរឡើយ ដោយនៅពេលក្រុមហ៊ុននាំចេញដឹកទៅដល់ទីតាំងទើបអាជ្ញាធរប្រទេសនោះ គេធ្វើការត្រួតពិនិត្យអនាម័យ និងភូតគាមអនាម័យ។ នេះបើតាមលោក មុន្ធីវុធ។
បើតាមលោក មុន្ធីវុធ បច្ចុប្បន្ននេះកម្ពុជាមានផ្ទៃដីដាំស្វាយដែលកំពុងប្រមូលផលប្រមាណជាង ១០ ម៉ឺនហិកតាដោយអាចផ្តល់ទិន្នផលជាង ៤ លានតោនក្នុង ១ ឆ្នាំ។
ក្រុមហ៊ុន Hyundai Mao Legacy Co., គឺជាក្រុមហ៊ុនវិនិយោគរួមគ្នាដោយក្រុមហ៊ុន Hyundai Corporation ដែលជាក្រុមហ៊ុនពហុផលិតផលរបស់ប្រទេសកូរ៉េខាងត្បូង និងក្រុមហ៊ុនដាំស្វាយនៅក្នុងស្រុក Mao Legacy Co Ltd ចាប់តាំងពីខែវិច្ឆិកា ឆ្នាំ ២០១៦ មកដើម្បីបង្កើនសក្តានុពលផលិត និងកែច្នៃរួមគ្នាលើផ្ទៃដីចម្ការស្វាយប្រហែល ២៤០០ ហិកតានៅខេត្តកំពង់ស្ពឺ។
តំណាងក្រុមហ៊ុន Hyundai Mao Legacy Co., Ltd បានបដិសេធផ្តល់ព័ត៌មាន ដោយប្រាប់ថាគ្រប់ព័ត៌មានទាំងអស់នឹងត្រូវបង្ហាញនៅថ្ងៃទី ១៥ ខែមករា ឆ្នាំ២០២០ ដែលជាថ្ងៃបើកសម្ពោធការនាំចេញផ្លែស្វាយស្រស់ជាផ្លូវការទៅប្រទេសកូរ៉េ។
តាមការគ្រោងទុកក្នុងឆ្នាំ ២០២០ នេះក៏នឹងអាចមានការនាំចេញផ្លែស្វាយស្រស់ទៅប្រទេសចិនផងដែរ។
លោក វណ្ណ ឫទ្ធី ប្រធានគ្រប់គ្រងទូទៅក្រុមហ៊ុន Angkor Mango ដែលជាក្រុមហ៊ុនប្រមូលទិញ និងនាំចេញផ្លែស្វាយទៅកាន់ទីផ្សារអន្តរជាតិបានប្រាប់ថា បច្ចុប្បន្នទិន្នផលផ្លែស្វាយដែលប្រមូលបានគឺមានបរិមាណច្រើនលើសពីតម្រូវការ ហេតុនេះបើមានទីផ្សារថ្មីៗដែលទទួលទិញផ្លៃស្វាយស្រស់នោះ គឺជាការល្អ។
លោកបនុ្តថា៖ «ដោយសារមិនមានទីផ្សារច្រើន តម្លៃផ្លែស្វាយនាឆ្នាំនេះមិនបានកើនឡើងនោះទេ»។
របាយការណ៍ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ក្នុងឆ្នាំ ២០១៩ កម្ពុជាបាននាំចេញផ្លែស្វាយស្រស់ចំនួន ៥៨ ១៦២ តោនទៅកាន់ប្រទេសចំនួន ៥ រួមមាន ថៃវៀតណាម សិង្ហបុរី បារាំង រុស្ស៊ី និងទីក្រុងហុងកុង៕ LA
