ភ្នំពេញ: រដ្ឋាភិបាលកម្ពុជាគ្រោងនឹងវិនិយោគក្នុងការបង្កើតថ្នាលទូរទស្សន៍ឌីជីថលជាតិ ដើម្បីរំដោះប្រេកង់ប្រមាណជា ៧០០ Mhz ទៅឲ្យក្រសួងប្រៃសណីយ៍ និងទូរគមនាគមន៍ក្នុងការអភិវឌ្ឍបណ្តាញ 5G ប្រព័ន្ធសេវាអ៊ីនធឺណិតក្នុងការរួមចំណែកសម្រេចឲ្យបាននូវការប្រែក្លាយប្រទេសកម្ពុជាទៅជាសេដ្ឋកិច្ចឌីជីថលនៅក្នុងពេលដ៏ខ្លីខាងមុខ។
លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ដែលទើបតែងតាំងថ្មី និងលោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានជួបប្រជុំកាលពីថ្ងៃអង្គារនៅទីស្តីការក្រសួងព័ត៌មានស្តីពីការត្រៀមប្រគល់ប្រេកង់ ៧០០ Mhz ដែលកំពុងប្រើប្រាស់ដោយប៉ុស្តិ៍ទូរទស្សន៍ក្នុងស្រុកទៅឲ្យក្រសួងប្រៃសណីយ៍ ដើម្បីយកទៅអភិវឌ្ឍប្រព័ន្ធ 5G និងសេដ្ឋកិច្ចឌីជីថល។
លោក ផុស សុវណ្ណ អគ្គនាយកព័ត៌មាន និងសោតទស្សន៍បានប្រាប់ភ្នំពេញ-ប៉ុស្តិ៍កាលពីថ្ងៃពុធថា ក្រសួងព័ត៌មានបានយល់ព្រមប្រគល់ ៧០០ Mhz ដែលកំពុងត្រូវបានប្រើដោយស្ថានីយទូរទស្សន៍ក្នុងស្រុកផ្ទេរទៅក្រសួងប្រៃសណីយ៍ និងទូរគមនាគមន៍ នៅពេលដែលក្រសួងអាចរំដោះបានរួចរាល់។
លោក សុវណ្ណ បានថ្លែងថា៖ «អ្វីដែលយើងគ្រោងនឹងបង្កើតនោះ គឺថ្នាលទូរទស្សន៍ជាតិឌីជីថលជាតិ ដើម្បីអភិវឌ្ឍទូរទស្សន៍ក្នុងស្រុកទៅជាឌីជីថល ដូច្នេះយើងអាចបញ្ជូនប្រេកង់ចំនួន 700 MHz ទៅក្រសួងប្រៃសណីយ៍បាន។ យើងក៏ទទួលបានការសម្រេចជាគោលការណ៍ពីសមេ្តចនាយករដ្ឋមន្ត្រី ហ៊ុន សែន រួចហើយដោយអនុញ្ញាតឲ្យបង្កើតក្រុមការងារអន្តរក្រសួងសម្រាប់ថ្នាលទូរទស្សន៍ឌីជីថលនេះ»។
លោកបានបន្ថែមថា៖ «ឥឡូវនេះយើងបានស្នើថវិកាវិនិយោគសម្រាប់គម្រោងនេះទៅក្រសួងសេដ្ឋកិច្ច និងហិរញ្ញវត្ថុរួចហើយ។ យើងសង្ឃឹមថា ការងាររៀបចំថ្នាលទូរទស្សន៍ឌីជីថលនេះនឹងចាប់ផ្តើមក្នុងឆ្នាំនេះ ហើយនឹងដំណើរការពេញលេញនៅឆ្នាំ ២០២៣»។
យោងតាមសារាចរណែនាំដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ២០ ខែមេសា ឆ្នាំ ២០២០ ការបង្កើតក្រុមការងាររួមគ្នាទៅលើថ្នាលទូរទស្សន៍ឌីជីថលជាតិ គឺដើម្បីរៀបចំផែនការវិនិយោគលើកម្មវិធីទូរទស្សន៍ឌីជីថលជាតិ ដោយសិក្សាលម្អិតអំពីការចំណាយសម្រាប់ការវិនិយោគរយៈពេល ៣ ឆ្នាំដំបូង (២០២១-២០២៣) និងរៀបចំលើកសំណើចំណាយសម្រាប់វិនិយោគលើហេដ្ឋារចនាសម្ព័ន្ធគាំទ្រផ្សេងៗ។
កាលពីខែមេសា ឆ្នាំ ២០១៩ រដ្ឋាភិបាលកម្ពុជាបានចុះហត្ថលេខាជាមួយក្រុមហ៊ុន Huawei Technologies របស់ចិនក្នុងការជួយអភិវឌ្ឍបណ្តាញចែកចាយ 5G។
ក្រុមហ៊ុន Smart Axiata កាលពីខែកក្កដាឆ្នាំមុនក៏បានចាប់ផ្តើមសាកល្បងដំណើរការប្រព័ន្ធ 5G ដំបូងបង្អស់នៅកម្ពុជា។ ក្រុមហ៊ុន Smart បានវិនិយោគប្រមាណពី ៧០ ទៅ ៨០ លានដុល្លារជារៀងរាល់ឆ្នាំទៅលើហេដ្ឋារចនាសម្ព័ន្ធ ដើម្បីធ្វើឱ្យប្រសើរនូវបណ្តាញអ៊ីនធឺណិតតាមទូរស័ព្ទចល័តនៅទូទាំងប្រទេស។
ជាមួយគ្នានេះដែរក្រុមហ៊ុន Royal Group ដែលប្រតិបត្តិការក្រុមហ៊ុនទូរស័ព្ទចល័ត Cellcard បានចុះហត្ថលេខាលើអនុស្សរណៈនៃការយោគយល់ជាមួយក្រសួងប្រៃសណីយ៍កាលពីខែឧសភាឆ្នាំមុនស្តីពីការសហការគ្នា និងរៀបចំផែនការសម្រាប់ដំណើរការ 5G និងការធ្វើឌីជីថលនៅកម្ពុជា។ កាលពីខែវិច្ឆិកា ក្រុមហ៊ុនសែលកាតក៏បានសាកល្បងបណ្តាញ 5G ថ្មីរបស់ខ្លួនផងដែរ។ ក្រោយមកកាលពីខែកុម្ភៈ ឆ្នាំ ២០២០ ក្រុមហ៊ុនបានបង្ហាញពីការរីកចម្រើនដ៏ល្អនៃការដាក់បញ្ចូលបណ្តាញ 5G នៅក្នុងព្រះរាជាណាចក្រកម្ពុជា។
កាលពីឆ្នាំមុនប្រទេសកម្ពុជាមានអ្នកប្រើអ៊ីនធឺណិតតាមទូរស័ព្ទចល័តចំនួន ១៦,៧ លាននាក់ និង ២១៥ ០០០ នាក់ តភ្ជាប់អ៊ីនធឺណិតល្បឿនលឿន។ នេះបើតាមក្រសួងប្រៃសណីយ៍ និងទូរគមនាគមន៍៕
វីដេអូ៖