.jpg)
លោក ប៉ាន សូរស័កិ្ដ រដ្ឋមន្ដ្រីក្រសួងពាណិជ្ជកម្ម ថ្លែងនាពេលកន្លងមក។ រូបថត ក្រសួងពាណិជ្ជកម្ម
ភ្នំពេញៈ កម្ពុជានឹងបើកមជ្ឈមណ្ឌលពាណិជ្ជកម្មទី ៦ នៅក្នុងទីក្រុងគុនមីង ខេត្តយុនណានរបស់ប្រទេស ចិន ជាកិច្ចខិតខំប្រឹងប្រែងដើម្បីលើកកម្ពស់ពាណិជ្ជកម្ម ការវិនិយោគ និងភ្ញៀវទេសចរមកពីខេត្តនេះមកកម្ពុជា ខណៈប្រទេសទាំង ២ កំពុងស្ថិតក្នុងការចរចាសម្រាប់កិច្ចព្រមព្រៀងពាណិជ្ជកម្មសេរី។
លោក ប៉ាន សូរស័កិ្ដ រដ្ឋមន្ដ្រីក្រសួងពាណិជ្ជកម្មបានឲ្យដឹងនៅក្នុងពិធីបើកកិច្ចប្រជុំប្រចាំឆ្នាំរបស់ក្រសួងកាលពីថ្ងៃទី ១៨ ខែធ្នូ ថារហូតមកដល់ពេលនេះក្រសួងបើកដំណើរការរួចហើយនូវមជ្ឈមណ្ឌលពាណិជ្ជកម្មកម្ពុជានៅប្រទេសចិនបានចំនួន ៥ ទីតាំងគឺនៅទីក្រុងក្វាងចូវនៅភាគខាងត្បូងខេត្តគ័ងតុង ទីក្រុងស៊ីអាន នៅភាគពាយព្យខេត្តសាន់ស៊ី ទីក្រុងហាយនីង នៅភាគខាងកើតខេត្ត Zhejiang តំបន់រដ្ឋបាលពិសេសទីក្រុងហុងកុង និងទីក្រុងយានថាយនៅភាគខាងត្បូងខេត្តសានតុង។
លោកថ្លែងថា៖ «មជ្ឈមណ្ឌលបានដើរតួនាទីដ៏សំខាន់នៅក្នុងការបម្រើជាវេទិកាសម្រាប់ការបង្ហាញផលិតផលដែលផលិតក្នុងស្រុក ការចែករំលែកព័ត៌មានអំពីទេសចរណ៍ ការវិនិយោគ ពាណិជ្ជកម្មអំពីប្រទេសកម្ពុជាដល់ពាណិជ្ជករ និងក្រុមវិនិយោគិនរបស់ប្រទេសចិន»។
លោកបន្ថែមថា មជ្ឈមណ្ឌលពាណិជ្ជកម្មទី ៦ នេះនឹងត្រូវបានបើកដំណើរការនៅថ្ងៃទី ២៨ ខែធ្នូ នៅទីក្រុងគុនមីង។
លោក Yum Sui Sang ប្រធានសមាគមជនបរទេស និងពាណិជ្ជកម្មទីក្រុងហុងកុង ម៉ាកាវប្រទេសចិនប្រចាំកម្ពុជាបានប្រាប់ភ្នំពេញប៉ុស្ដិ៍កាលពីដើមខែកញ្ញាថា ការបើកបរិយាកាសវិនិយោគ និងសេដ្ឋកិច្ចដែលពឹងផ្អែកលើប្រាក់ដុល្លារអាមេរិកគឺជាកម្លាំងជំរុញដ៏សំខាន់សម្រាប់វិស័យឯកជន។
ទិន្នន័យផ្លូវការបានពីក្រសួងសេដ្ឋកិច្ច និងហិរញ្ញវត្ថុចាប់ពីឆ្នាំ ១៩៩៤ ទៅដល់ឆ្នាំ ២០១៦ បានឲ្យដឹងថា ប្រទេសចិនបានវិនិយោគប្រហែល ១៤,៧ ពាន់លានដុល្លារនៅកម្ពុជា ហើយចាប់ពីឆ្នាំ ១៩៩៣ ដល់ចុងឆ្នាំ ២០១៧ កម្ពុជាបានចុះហត្ថលេខាលើកិច្ចព្រមព្រៀងកម្ចីសម្បទានជាមួយដៃគូអភិវឌ្ឍន៍នានាមានតម្លៃ ៩,៦ ពាន់លានដុល្លារ។ រដ្ឋាភិបាលបានខ្ចីប្រាក់ប្រហែល ៦,៣ ពាន់លានដុល្លារពីបណ្ដាប្រទេសនានាឈរលើមូលដ្ឋានទ្វេភាគីក្នុងចំណោមនេះប្រហែល ៤,០៥ ពាន់លានដុល្លារបានមកពីប្រទេសចិន។
ទិន្នន័យចុងក្រោយបំផុតបានពីក្រុមប្រឹក្សាអភិវឌ្ឍន៍កម្ពុជា (CDC) ដែលបានចេញផ្សាយនៅប៉ុន្មានខែថ្មីៗនេះបានឲ្យដឹងថា រដ្ឋាភិបាលបានអនុម័តការវិនិយោគមានតម្លៃប្រហែល ៥,២ ពាន់លានដុល្លារនៅឆមាសទី ១ ឆ្នាំ ២០១៩ កើនឡើង ៤៨,៥ ភាគរយធៀបទៅនឹងរយៈពេលដូចគ្នាកាលពីឆ្នាំមុន។ ក្នុងចំណោមការវិនិយោគសរុប ក្រុមវិនិយោគិនក្នុងស្រុកមានចំនួន ៦៨,៤ ភាគរយ ខណៈប្រទេសចិនមានចំនួន ២៥,៤ ភាគរយ។
របាយការណ៍របស់ក្រសួងទេសចរណ៍បានបង្ហាញឲ្យដឹងថា កម្ពុជាទទួលបានភ្ញៀវទេសចរអន្តរជាតិ ៤,៨១ លាននាក់នៅក្នុងអំឡុងពេល ៩ ខែនៃឆ្នាំនេះ។ ភ្ញៀវទេសចរចិនឈរលំដាប់លើបញ្ជីនៃភ្ញៀវទេសចរបរទេសដោយមានចំនួនសរុប ១,៨៦ លាននាក់កើនឡើង ២៩,៤ ភាគរយធៀបនឹងការកើនឡើងក្នុងរយៈពេលដូចគ្នាកាលពីឆ្នាំមុនដែលមានចំនួន ៣៨,៧ ភាគរយនៃភ្ញៀវទេសចរបរទេសទាំងអស់៕ LA
