.jpg)
លោកនាយករដ្ឋមន្ត្រី ហ៊ុន សែន និងលោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិនកាលពីថ្ងៃម្សិលមិញ។ រូបថត SPM
ភ្នំពេញ: កម្ពុជានឹងមានទីផ្សារកាន់តែធំទៅក្នុងប្រទេសចិន បន្ទាប់ពីកិច្ចព្រមព្រៀងពាណិជ្ជកម្មសេរី (FTA) ទ្វេភាគីដំបូងត្រូវបានចុះហត្ថលេខាជាផ្លូវការកាលពីថ្ងៃម្សិលមិញ។
ក្នុងរយៈពេល ៣០ ថ្ងៃក្រោយគឺជាការបើកផ្លូវឱ្យប្រទេសទាំង ២ ពង្រីកទីផ្សារសម្រាប់ផលិតផលនៃប្រទេសខ្លួន ខណៈដែលទំនិញកម្ពុជាយ៉ាងហោចណាស់ ៣៤០ មុខត្រូវបានបើកភ្លើងខៀវសម្រាប់នាំទៅកាន់ទីផ្សារប្រទេសចិន។
ពិធីចុះហត្ថលេខានោះត្រូវបានធ្វើឡើងរវាងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មជាមួយនឹងលោក Wang Wentian ឯកអគ្គរដ្ឋទូតចិនប្រចាំនៅកម្ពុជា ដោយមានលោកនាយករដ្ឋមន្ត្រី ហ៊ុន សែន និង លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិនធ្វើជាសាក្សីនៅថ្ងៃទី ១២ ខែតុលា នៅវិមានសន្តិភាព។
លោក ប៉ាន សូរស័កិ្ដ រដ្ឋមន្ដ្រីក្រសួងពាណិជ្ជកម្មបានឱ្យដឹងនៅក្នុងពិធីចុះហត្ថលេខានេះថា វាជាកិច្ចព្រមព្រៀងពាណិជ្ជកម្មសេរីទ្វេភាគីលើកដំបូងមិនធ្លាប់មានសម្រាប់ប្រទេសកម្ពុជា។
លោកបានបន្ថែមថា វាជាកិច្ចព្រមព្រៀងពាណិជ្ជកម្មដែលត្រូវបានចុះហត្ថលេខារវាងកម្ពុជា និងសាធារណរដ្ឋប្រជាមានិតចិនដែលជាមិត្តយូរអង្វែងរបស់កម្ពុជា និងជាដៃគូយុទ្ធសាស្ដ្រគ្រប់ជ្រុងជ្រោយ។
លោកលើកឡើងថា៖ «ការចុះហត្ថលេខានេះ បញ្ជាក់ពីភាពកាន់តែរឹងមាំរវាងប្រទេសទាំង ២ និងបង្ហាញពីផ្នែក ១ ដ៏សំខាន់ផ្សេងទៀតសម្រាប់ទំនាក់ទំនងរបស់កម្ពុជា និងចិន។ កិច្ចព្រមព្រៀងនេះនឹងផ្ដល់ភាពជាដៃគូផ្នែកសេដ្ឋកិច្ចកាន់តែច្រើនថែមទៀត តាមរយៈកម្រិតកាន់តែខ្ពស់នៃសកលភាវូបនីយកម្មលទ្ធភាពចូលទីផ្សារសម្រាប់ទំនិញ និងការវិនិយោគ ឬការផ្ដល់អត្ថប្រយោជន៍សង្គមដល់ដៃគូ»។
លោក Zhong Shan រដ្ឋមន្ដ្រីក្រសួងពាណិជ្ជកម្មនៃសាធារណរដ្ឋប្រជាមានិតចិនបានឱ្យដឹងតាមរយៈវីដេអូខុនហ្វឺរិនថា ចាប់តាំងពីការចាប់ផ្ដើមនៃផែនការនេះ ក្រសួងទាំង ២ នៃប្រទេសទាំង ២ បានអនុវត្តតាមថ្នាក់ដឹកនាំ និងការរីកចម្រើនទៅមុខ ហើយបានបញ្ចប់ការចរចាពាណិជ្ជកម្មសេរីកម្ពុជា និងចិនដោយមិនបានរំពឹងទុកជាមុន។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មលើកបង្ហាញកិច្ចព្រមព្រៀងពាណិជ្ជកម្មសេរីក្រោយចុះហត្ថលេខា។ រូបថត SPM
លោក Zhong Shan ថ្លែងថា៖ «ការចុះហត្ថលេខាលើកិច្ចព្រមព្រៀងនៅថ្ងៃនេះ វាជាព្រឹត្តិការណ៍ដ៏សំខាន់ថ្មី ១ នៃការអភិវឌ្ឍសេដ្ឋកិច្ចទ្វេភាគី និងទំនាក់ទំនងពាណិជ្ជកម្ម។ ប្រទេសចិនត្រៀមរួចរាល់ក្នុងការរក្សាទំនាក់ទំនងជិតស្និទ្ធជាមួយប្រទេសកម្ពុជា ដើម្បីជំរុញឱ្យកិច្ចព្រមព្រៀងនេះចូលជាធរមានកាន់តែឆាប់»។
លោក ស៊ាង ថៃ មន្ត្រីនាំពាក្យក្រសួងពាណិជ្ជកម្មបានអះអាងថា កិច្ចព្រមព្រៀងពាណិជ្ជកម្មនេះនឹងចាប់ផ្តើមអនុវត្តក្នុងរយៈពេល ៣០ ថ្ងៃក្រោយគិតចាប់ពីប្រទេសទាំង ២ បញ្ចប់នីតិវិធីផ្ទៃក្នុង និងប្តូរលិខិតូបករណ៍ឱ្យគ្នាទៅវិញទៅមក។
លោកថ្លែងថា៖ «កិច្ចព្រមព្រៀងពាណិជ្ជកម្មសេរីទ្វេភាគីរវាងប្រទេសទាំង ២ នឹងចូលជាធរមាន នៅពេលប្រទេសទាំង ២ បញ្ចប់នីតិវិធីផ្ទៃក្នុងហើយ ប្តូរលិខិតូបករណ៍ជាមួយគ្នាដែលគិតចាប់ពីថ្ងៃប្តូរលិខិតនេះក្នុងរយៈពេល ៣០ ថ្ងៃក្រោយដែលត្រូវបានអនុម័តដោយរដ្ឋសភា និងឡាយព្រះហស្ថលេខាពីព្រះមហាក្សត្រ»។
តាមរយៈកិច្ចព្រមព្រៀងពាណិជ្ជកម្មសេរីនេះប្រភេទទំនិញរបស់កម្ពុជាចំនួនជាង ៣៤០ មុខនឹងអាចនាំចេញទៅទីផ្សារចិន។ ទំនិញទាំងនោះ រួមមាន ម្រេច ម្ទេសក្រៀម ផលិតផលកែច្នៃពីស្វាយចន្ទី ខ្ទឹម ទឹកឃ្មុំ បន្លែ ត្រី សាច់សត្វ (ជ្រូក មាន់ ទា គោ និងពពែ) និងផលិតផលពីគ្រឿងសមុទ្រ រួមមាន គ្រំ ក្តាម និងខ្យង ជាដើម។
កិច្ចព្រមព្រៀងពាណិជ្ជកម្មសេរីនេះនឹងបើកឱកាសដល់កម្ពុជានាំចេញទំនិញទៅកាន់ទីផ្សារចិនសម្រាប់ទំនិញប្រមាណ ៩៨ ភាគរយនៃមុខទំនិញសរុប ខណៈកម្ពុជាបានបើកទីផ្សារឱ្យភាគីចិន ៩០ ភាគរយនៃ ទំនិញសរុបមិនជាប់កាតព្វកិច្ចពន្ធគយ។
យោងតាមស្ថានទូតចិនប្រចាំនៅកម្ពុជា ទំហំពាណិជ្ជកម្មទ្វេភាគីរវាងកម្ពុជា និងចិនមានតម្លៃ ៩,៤២ ពាន់លានដុល្លារកាលពីឆ្នាំ ២០១៩ កើនឡើង ២៧,២៩ ភាគរយបើធៀបនឹងឆ្នាំ ២០១៨ ដែលមាន ៧,៤ ពាន់លានដុល្លារ៕ LA
