.jpg)
កម្ពុជានឹងរៀបចំការប្រកួតស្វែងរកជើងឯកវិស័យ SME លើកទី ១ ដើម្បីផ្តល់កម្ចីសម្រាប់ពួកគេយកទៅពង្រីកអាជីវកម្ម។ រូបថត ភ្នំពេញ ប៉ុស្តិ៍
ភ្នំពេញៈ វិស័យឯកជនគ្រោងនឹងរៀបចំកម្មវិធីប្រកួតប្រជែងជើងឯកសហគ្រិនខ្នាតតូច និងមធ្យមជាលើកដំបូងនៅកម្ពុជាក្នុងគោលបំណងលើកកម្ពស់វិស័យសហគ្រាសធុនតូច និងមធ្យម និងស្វែងរកការគាំទ្រហិរញ្ញប្បទានពីគ្រឹះស្ថានហិរញ្ញវត្ថុនានា ដើម្បីផ្តល់កម្ចីសម្រាប់ពួកគេយកទៅពង្រីកអាជីវកម្ម។
ក្រុមហ៊ុន PLMP Venture Capital និងសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានរួមគ្នារៀបចំកម្មវិធីប្រកួតប្រជែងជើងឯកសហគ្រាសធុនតូច និងមធ្យមជាលើកដំបូងនៅកម្ពុជាក្នុងគោលបំណងជំរុញឲ្យវិនិយោគិនផ្តល់មូលនិធិដល់សហគ្រាសធុនតូច និងមធ្យមសម្រាប់ពង្រីកអាជីវកម្ម។ កម្មវិធីនេះនឹងប្រព្រឹត្តទៅនៅថ្ងៃទី ៣ ខែកក្កដា នៅសណ្ឋាគារហ៊ីម៉ាវ៉ារី ក្រុងភ្នំពេញ។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាប្រាប់ភ្នំពេញប៉ុស្តិ៍កាលពីថ្ងៃចន្ទថា កម្មវិធីនេះនឹងជួយលើកកម្ពស់សហគ្រាសធុនតូច និងមធ្យមដែលកំពុងប្រឈមនឹងបញ្ហាកង្វះដើមទុនក្នុងការពង្រីកអាជីវកម្ម។ លោកបានថ្លែងថា៖ «យើងបង្កើតកម្មវិធីប្រកួតនេះឡើង ដើម្បីរកអ្នកមានស្នាដៃក្នុងវិស័យសហគ្រាសធុនតូច និងមធ្យម និងដើម្បីលើកតម្កើងពួកគេ»។
លោកបានបន្តថា តាមរយៈកម្មវិធីប្រកួតនេះ បេក្ខភាពសហគ្រិននឹងបង្ហាញពីសមត្ថភាពក្នុងការគ្រប់គ្រងអាជីវកម្មរបស់ពួកគេ។ លោកបញ្ជាក់ថា៖ «នេះជាការលើកកម្ពស់វិស័យសហគ្រាសធុនតូច និងមធ្យមដែលមានសមត្ថភាព និងគោរពគោលការណ៍ស្តង់ដាអនាម័យនៃផលិតផលរបស់ពួកគេ»។
អ្នកស្រី ម៉ៅ សុធា អ្នកគ្រប់គ្រងផ្នែកលក់ក្រុមហ៊ុន Kirirom Food Product Co., Ltd បានឲ្យដឹងថា ការបង្កើតកម្មវិធីប្រកួតប្រជែងសម្រាប់សហគ្រាសធុនតូន និងមធ្យមនេះនឹងផ្តល់ឱកាសឲ្យពួកគេអាចស្វែងរកប្រភពហិរញ្ញប្បទានជួយដល់អាជីវកម្មរបស់ពួកគេ។ អ្នកស្រីបន្តថា កម្មវិធីនេះក៏នឹងជួយពង្រឹងសមត្ថភាពរបស់សហគ្រិនបន្ថែមផងដែរ។
អ្នកស្រីថ្លែងថា៖ «កម្មវិធីនេះនឹងផ្តល់ឱកាសឲ្យសហគ្រាសធុនតូច និងមធ្យម អាចស្វែងរកដៃគូវិនិយោគ និងពង្រីកសមត្ថភាព ព្រោះសហគ្រិនខ្នាតតូចមួយចំនួនមានស្តង់ដា និងចំនួនទៀតកង្វះស្តង់ដា»។
បច្ចុប្បន្នរដ្ឋាភិបាលកំពុងខិតខំប្រឹងប្រែងជួយដល់សហគ្រាសធុនតូច និងមធ្យមតាមរយៈធនាគារ SME Bank ដែលមានដើមទុនរហូតដល់ជិត ១៥០ លានដុល្លារ។
សហគ្រិនទទួលជយលាភីលំដាប់កំពូល ៣ នាក់ពីកម្មវិធីនេះនឹងទទួលបានពានរង្វាន់ វិញ្ញាបនបត្រ ព្រមទាំងទុនវិនិយោគរហូតដល់ $១ លានពីក្រុមហ៊ុន PLMP Venture Capital។ នេះបើតាមសេចក្តីប្រកាសព័ត៌មានរបស់ក្រុមហ៊ុននេះ៕ LA
