ភ្នំពេញៈ កម្ពុជានឹងរៀបចំពិព័រណ៍ទេសចរណ៍កម្ពុជាអន្តរជាតិលើកទី ២ នៅចុងឆ្នាំ ២០១៨ (CTM 2018)។ នេះបើយោងតាមសេចក្តីប្រកាសកាលពីចុងសប្តាហ៍មុន។
ពិព័រណ៍ទេសចរណ៍លើកទី ២ នេះនឹងត្រូវធ្វើឡើងរយៈពេល ៣ ថ្ងៃចាប់ពីថ្ងៃទី ១១ ដល់ថ្ងៃទី ១៣ ខែតុលា ឆ្នាំ ២០១៨។ កម្ពុជាធ្លាប់បានរៀបចំពិព័រណ៍នេះរួចម្តងហើយកាលពីឆ្នាំមុនដែលធ្វើឡើងនៅខេត្តសៀមរាបដែលមានការចូលរួមពីស្ថាប័នទេសចរណ៍ជាតិ អ្នកទិញ អ្នកលក់ ភ្នាក់ងារសារព័ត៌មានជាតិ និងអន្តរជាតិជាង ៥០០ ក្រុមហ៊ុនមកពី ៦០ ប្រទេស។
ក្រសួងទេសចរណ៍នឹងសហការជាមួយក្រុមហ៊ុន SlickBooth និងផ្នែកឯកជន ដើម្បីរៀបចំព្រឹត្តិការណ៍នេះ។
សម្រាប់ព្រឹត្តិការណ៍លើកទី ២ នេះលោក ថោង ខុន រដ្ឋមន្ត្រី ក្រសួងទេសចរណ៍អំពាវនាវដល់ក្រុមហ៊ុនក្នុងស្រុកទាំងក្នុងប្រព័ន្ធ និងក្រៅប្រព័ន្ធទេសចរណ៍កម្ពុជា និងសមាគមឧស្សាហកម្មទេសចរណ៍ចូលរួមគាំទ្រ និងជួយជំរុញសមាជិករបស់ខ្លួនឲ្យសហការផ្សព្វផ្សាយ និងដាក់តាំងពិព័រណ៍ផលិតផល សេវារបស់ខ្លួននៅក្នុងព្រឹត្តិការណ៍នេះ។
ឆ្នាំ ២០១៧ កម្ពុជាទទួលបានទេសចរអន្តរជាតិ ៥,៦ លាននាក់បានចំណូលជាង ៣ ពាន់លានដុល្លារ៕