ភ្នំពេញៈ កម្ពុជានឹងរៀបចំការតាំងពិព័រណ៍ស្តីពីឧស្សាហកម្មគ្រឿងយន្ត និងឧស្សាហកម្មកាត់ដេរសម្លៀកបំពាក់អន្តរជាតិឆ្នាំ ២០១៩ នៅខែក្រោយ ដែលមានស្តង់តាំងបង្ហាញជិត ៣០០ ស្តង់។ នេះបើតាមសេចក្តីប្រកាសព័ត៌មាន។
ព្រឹត្តិការណ៍នេះមានការតាំងបង្ហាញពីបរិក្ខារបច្ចេកវិទ្យាថ្មីនៅក្នុងវិស័យឧស្សាហកម្ម ដែលនឹងប្រព្រឹត្តទៅនៅថ្ងៃទី ២២ ដល់ថ្ងៃទី ២៥ សីហា នៅសាលពិព័រណ៍កោះពេជ្រ រាជធានីភ្នំពេញ។
សេចក្តីប្រកាសព័ត៌មានបានឲ្យដឹងថា៖ «កំណើនសេដ្ឋកិច្ចដែលមានស្ថិរភាព ១ ទសវត្សរ៍មកនេះ បានធ្វើឲ្យកម្ពុជាក្លាយជាគោលដៅក្នុងការទាក់ទាញអ្នកវិនិយោគនៅតំបន់អាស៊ី។ បច្ចុប្បន្នកម្ពុជាកំពុងប្រឈមនឹងបញ្ហាមួយចំនួនផងដែរ ប៉ុន្តែដំណោះស្រាយផ្នែកបច្ចេកវិទ្យានឹងធ្វើឲ្យមានប្រសិទ្ធភាពដល់ការផលិត និងភាពប្រកួតប្រជែងក្នុងទីផ្សារសកល»។
ពិព័រណ៍នេះមានស្តង់ជាង ២៨០ ដែលមានក្រុមហ៊ុន ២០០ មកពី ១៥ ប្រទេស នៅក្នុងតំបន់ នឹងតាំងបង្ហាញពីផលិតផល និងដំណោះស្រាយប្រកបដោយភាពច្នៃប្រឌិត។
ក្រុមហ៊ុនទាំងនោះនឹងតាំងបង្ហាញពីវិស័យឧស្សាហកម្ម រួមមាន ផលិតផលប្លាស្ទិក ការបោះពុម្ព ការវេចខ្ចប់ កសិកម្ម គ្រឿងយន្ត ស្វ័យប្រវត្តិកម្ម ឧបករណ៍ហាដវែរ និងឧបករណ៍ វិស្វកម្មអគ្គិសនី វាយនភណ្ឌ និងសម្លៀកបំពាក់។
សេចក្តីប្រកាសព័ត៌មានបន្តថា៖ «ជាមួយនឹងវត្តមានដ៏រឹងមាំបែបនោះនៃយីហោអន្តរជាតិនៅក្នុងព្រឹត្តិការណ៍នេះអ្នកចូលរួមអាចរកទីតាំងក្រុមហ៊ុនផ្គត់ផ្គង់បាន ជាពិសេសផលិតផលឧស្សាហកម្ម ដែលពួកគេកំពុងស្វែងរក»៕