ភ្នំពេញៈ រដ្ឋាភិបាលកម្ពុជាគ្រោងសាងសង់កំពង់ផែសមុទ្រខ្នាតមធ្យមដែលមានតម្លៃជាង ១ លានដុល្លារនៅខេត្តកោះកុង ដើម្បីសម្រួលដល់ការដឹកជញ្ជូនទំនិញឆ្លងកាត់ព្រំដែនទឹករវាងប្រទេសកម្ពុជា និងថៃ។
លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្តកោះកុងបានប្រាប់ឱ្យដឹងថា គម្រោងសាងសង់កំពង់ផែថ្មីនេះ គឺជាប្រភេទបេតុងដែលមានប្រវែង ៦៩ ម៉ែត្រ និងទទឹង ៦,៥ ម៉ែត្រ។ ក្នុងគម្រោងនេះក៏មានសង់ស្ពានបេតុងទៅកំពង់ផែផងដែរ ដោយមានប្រវែង ២៨ ម៉ែត្រ និងទទឹង ៨ ម៉ែត្រចំនួន ២។ កំពង់ផែនេះស្ថិតនៅក្រុងខេមរភូមិន្ទ ខេត្តកោះកុង។
លោកឱ្យដឹងទៀតថា គម្រោងអភិវឌ្ឍន៍កំពង់ផែសមុទ្រនេះនឹងចំណាយថវិកាប្រមាណ ១,៥ លានដុល្លារ ដោយប្រើរយៈពេលសាងសង់ ២ ឆ្នាំ។
លោកប្រាប់ថា៖ «ដោយសារការរីករាលដាលជំងឺកូវីដ ១៩ គម្រោងនេះមិនទាន់បានចាប់ផ្តើមនៅឡើយទេ»។
លោកបន្តថា កំពង់ផែខ្នាតមធ្យមនេះមិនត្រឹមតែជួយសម្រួលដល់ប្រព័ន្ធដឹកជញ្ជូនទំនិញរាយ និងវិស័យទេសចរណ៍ប៉ុណ្ណោះទេ ប៉ុន្តែវានឹងប្រើប្រាស់បានជាលក្ខណៈពហុវិស័យផងដែរ។
លោកបញ្ជាក់ថា៖ «កំពង់ផែថ្មីនេះនឹងជំនួសឱ្យកំពង់ផែចាស់ដែលមានសភាពទ្រុឌទ្រោមយូរមកហើយ»។
បើតាមលោក ដាវុធ កំពង់ផែចាស់នឹងត្រូវរក្សាទុកដដែលដោយមិនមានការវាយកម្ទេចចោលឡើយ។
សព្វថ្ងៃខេត្តកោះកុងមានកំពង់ផែមួយឈ្មោះ «កំពង់ផែដងទង់» ស្ថិតក្នុងសង្កាត់ស្មាច់មានជ័យ ក្រុងខេមរភូមិន្ទត្រូវបានកែលម្អជាបន្តបន្ទាប់ ដែលការកែលម្អចុងក្រោយគឺនៅឆ្នាំ ១៩៩១។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញបានប្រាប់ថា ការសាងសង់កំពង់ផែខ្នាតមធ្យមនេះនឹងជួយសម្រួលដល់ការដឹកជញ្ជូនទំនិញរាយឆ្លងកាត់ព្រំដែនរវាងកម្ពុជា និងថៃកាន់តែប្រសើរ។ លោកបន្ថែមថា កំពង់ផែនេះក៏នឹងបម្រើឱ្យវិស័យទេសចរណ៍ផងដែរ។
លោកនិយាយថា៖ «ផែនេះនឹងអនុញ្ញាតឱ្យកប៉ាល់ដឹកទំនិញរាយពីថៃមកកម្ពុជាកាន់តែងាយស្រួល និងមានសុវត្ថិភាព។ ទំនិញភាគច្រើនរួមមាន ស៊ីម៉ងត៍ គ្រឿងបរិក្ខារប្រើប្រាស់ និងគ្រឿងបរិភោគ»។
រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល បានថ្លែងនៅក្នុងកិច្ចពិភាក្សាលើការរៀបចំសេចក្តីព្រាងច្បាប់ស្ដីពីកំពង់ផែកាលពីខែតុលា ឆ្នាំ ២០២០ ថា មុខងារកំពង់ផែទាំងនោះត្រូវបានបែងចែកចេញជាកំពង់ផែពាណិជ្ជកម្ម ឧស្សាហកម្ម ទេសចរណ៍ និងផែប្រេង ជាដើម។
លោកបានថ្លែងថា៖ «កំពង់ផែមានតួនាទីសំខាន់ណាស់នៅក្នុងការជំរុញសកម្មភាពពាណិជ្ជកម្មគ្រប់ប្រភេទក្នុងដំណើរការអភិវឌ្ឍន៍សេដ្ឋកិច្ចជាតិ តំបន់ និងអន្តរជាតិ»។
យោងតាមលោក ចាន់ថុល កម្ពុជាមានកំពង់ផែសរុប ១០៥ កន្លែងក្នុងនោះកំពង់ផែទន្លេមាន ៧៨ និងកំពង់ផែសមុទ្រមាន ចំនួន ២៧ កន្លែង។
ទិន្នន័យក្រសួងពាណិជ្ជកម្មប្រទេសថៃបានឱ្យដឹងថា ពាណិជ្ជកម្មទ្វេភាគីកម្ពុជា និងថៃសម្រេចបាន ៧ ២៣៦ លានដុល្លារ កាលពីឆ្នាំ ២០២០ ធ្លាក់ចុះ ២៣,១៧ ភាគរយបើធៀបទៅនឹងឆ្នាំ ២០១៩៕ LA
វីដេអូ៖