ភ្នំពេញ: កម្ពុជាបានរៀបចំធ្វើសន្និសីទអាស៊ានស្តីពីការប្រកួតប្រជែងលើកទី ៨ ក្នុងគោលបំណងលើកកម្ពស់ភាពប្រកួតប្រជែងដោយស្មើភាពគ្នាក្នុងវិស័យធុរកិច្ច ខណៈពេលកម្ពុជាសង្ឃឹមថា ច្បាប់ប្រកួតប្រជែងនេះនឹងទទួលបានការអនុម័តនៅដើមឆ្នាំ ២០២០។ នេះបើយោងតាមរដ្ឋមន្ត្រីក្រសួងពាណិជ្ជកម្មកម្ពុជា។
សន្និសីទអាស៊ានស្តីពីការប្រកួតប្រជែងលើកទី ៨ ឆ្នាំនេះបានរៀបចំនៅភ្នំពេញកាលពីថ្ងៃពុធ ក្រោមប្រធានបទ «ការឈានទៅរកគោលដៅ និងការដោះស្រាយបញ្ហាប្រឈម» ដែលសហការរៀបចំដោយអគ្គនាយកដ្ឋានកាំកុងត្រូលក្រសួងពាណិជ្ជកម្ម លេខាធិការអាស៊ាន និងអង្គការ GIZ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងបើកសន្និសីទ ACC ថា ច្បាប់ការប្រកួតប្រជែងនឹងដើរតួនាទីយ៉ាងសំខាន់ក្នុងការគាំទ្រការធ្វើពាណិជ្ជកម្ម ការលើកកម្ពស់ទីលានប្រកួតប្រជែងដោយស្មើភាព ការបង្កើតធុរកិច្ចថ្មីៗ និងការការពារផលប្រយោជន៍អ្នកប្រើប្រាស់ ដើម្បីស្របតាមការវិវត្តបច្ចេកវិទ្យាការធ្វើពាណិជ្ជកម្មតាមប្រព័ន្ធអេឡិចត្រូនិក និងភាពបម្រែបម្រួលបរិយាកាសធុរកិច្ច។
លោកបានបន្តថា ប្រទេសជាសមាជិកអាស៊ានចំនួន ៩ បានរៀបចំ និងអនុវត្តច្បាប់ប្រកួតប្រជែងរបស់ខ្លួន ខណៈកម្ពុជាសង្ឃឹមថាច្បាប់ប្រកួតប្រជែងរបស់ខ្លួននឹងត្រូវអនុម័តនៅដើមឆ្នាំ ២០២០ ខាងមុខ។
លោកថ្លែងថា៖ «ច្បាប់នេះនឹងជំរុញឲ្យមានបរិយាកាសប្រកួតប្រជែងក្នុងវិស័យធុរកិច្ច និងជាទីលានប្រកួតប្រជែងដោយស្មើភាពគ្នារបស់ក្រុមហ៊ុន ហើយវាក៏នឹងជួយទាក់ទាញអ្នកវិនិយោគបរទេសមកកម្ពុជាក៏ដូចជាតំបន់អាស៊ានផងដែរ»។
លោក Michael Tene អគ្គលេខាធិការរងអាស៊ានថ្លែងនៅពេលផ្តល់បទសម្ភាសដល់អ្នកសារព័ត៌មានថា ច្បាប់ប្រកួតប្រជែងនេះនឹងផ្តល់ផលប្រយោជន៍ដល់ប្រទេសទាំងអស់ក្នុងតំបន់អាស៊ាន ហើយតាមរយៈសន្និសីទនេះប្រទេសជាសមាជិកអាស៊ានអាចរៀនសូត្រពីគ្នាទៅវិញទៅមកក្នុងការរកដំណោះស្រាយលើបញ្ហាប្រឈមនានា។ លោកថ្លែងថា៖ «ច្បាប់នេះក៏នឹងជួយជំរុញភាពច្នៃប្រឌិត និងការវិនិយោគ ហើយការប្រើប្រាស់ធនធានប្រកបដោយប្រសិទ្ធភាព ជាពិសេសជួយដល់សហគ្រាសធុនតូច និងមធ្យម»។
សិន្និសីទស្តីពីការប្រកួតប្រជែងអាស៊ាន (ACC) ត្រូវបានគេរៀបចំឡើងចាប់តាំងពីឆ្នាំ ២០១១ មកក្នុងគោលបំណងដើម្បីបង្ហាញ និងពិភាក្សាអំពីវឌ្ឍនភាពនៃដំណើរការតាក់តែង និងអនុវត្តច្បាប់ប្រកួតប្រជែងនៅក្នុងតំបន់អាស៊ាន៕ LA