ភ្នំពេញៈ រដ្ឋាភិបាលនឹងធ្វើការបញ្ចុះតម្លៃអគ្គិសនី ៤០ រៀល ក្នុង ១ គីឡូវ៉ាត់ម៉ោង សម្រាប់វិស័យឧស្សាហកម្ម ដើម្បីរក្សាភាពប្រកួតប្រជែងក្នុងវិស័យឧស្សាហកម្ម។ នេះបើតាមរដ្ឋមន្ត្រីក្រសួងរ៉ែ និងថាមពល។
អ្នកក្នុងវិស័យស្រូវអង្ករ និងសហគ្រាសធនតូចបានអបអរសាទរការបញ្ចុះតម្លៃរបស់រដ្ឋាភិបាលនេះ ប៉ុន្តែបានអំពាវនាវឲ្យបង្កើនគុណភាពនៃការផ្គត់ផ្គង់អគ្គិសនីឲ្យកាន់តែប្រសើរ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពលបានថ្លែងកាលពីថ្ងៃអង្គារថា ការបញ្ចុះតម្លៃអគ្គិសនីរបស់រដ្ឋាភិបាល ៤០ រៀលក្នុង ១ គីឡូវ៉ាត់ម៉ោង ដើម្បីបង្កើនភាពប្រកួតប្រជែងក្នុងវិស័យឧស្សាហកម្មនៅឆ្នាំនេះ។
លោកបានបន្តថា៖ «តាមគោលនយោបាយរបស់រដ្ឋាភិបាល យើងសម្រេចបញ្ចុះតម្លៃអគ្គិសនី ៤០ រៀលក្នុង ១ គីឡូវ៉ាត់ម៉ោង សម្រាប់អ្នកវិនិយោគក្នុងវិស័យឧស្សាហកម្មទាំងអស់នៅប្រទេសរបស់យើង ខណៈឆ្នាំមុនការបញ្ចុះតម្លៃ ៨០ រៀលរួចទៅហើយក្នុងមួយគីឡូវ៉ាត់ម៉ោង យើងនឹងធ្វើការបញ្ចុះជាបន្តបន្ទាប់ទៀត។ គោលការណ៍ថ្មីនឹងបញ្ចុះនេះនឹងចាប់អនុវត្តនៅក្នុងខែកុម្ភៈតទៅ»។
បច្ចុប្បន្នកម្ពុជាផលិតថាមពលអគ្គិសនីភាគច្រើនពីប្រភពវារីអគ្គិសនី ដែលមាន ៤៨ ភាគរយ និង ៤៧ ភាពរយ ប្រភពពីថាមពលធ្យូងថ្ម ខណៈកម្ពុជានាំចូលថាមពលអគ្គិសនី ១៥ ភាគរយពីប្រទេសជិតខាង។
វិស័យឯកជនដែលជាម្ចាស់អាជីវកម្មរោងម៉ាស៊ីនកិនស្រូវជាង ៣០០ នឹងទទួលបានផលប្រយោជន៍ធំពីការបញ្ចុះតម្លៃអគ្គិសនីនេះ បើទោះបីជាកម្រិតទាបក៏ដោយ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាដែលមានសមាជិកជាង ៣០០ រោងម៉ាស៊ីនបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ការបញ្ចុះតម្លៃអគ្គិសនីរបស់រដ្ឋាភិបាលនឹងជួយជំរុញខ្សែចង្វាក់ផលិតកម្ម និងរក្សាភាពប្រកួតប្រជែងក្នុងវិស័យស្រូវអង្ករ។ លោកបន្ថែមថា រដ្ឋាភិបាលសម្រេចបញ្ចុះតម្លៃពី ០,១៤៧ ដុល្លារ មកត្រឹម ០,១៤៦ ដុល្លារនៅឆ្នាំនេះ។
លោកថ្លែងថា៖ «យើងស្វាគមន៍ហើយវាជាដំណឹងល្អ។ ចំពោះវិស័យស្រូវអង្ករ យើងចង់ឲ្យមានស្ថិរភាព និងគុណភាពការផ្គត់ផ្គង់អគ្គិសនីដែលវានឹងបង្កើនភាពប្រកួតប្រជែងរបស់យើង»។
លោកបន្ថែមថា ម្ចាស់រោងម៉ាស៊ីនកិនស្រូវមួយចំនួនបានចំណាយប្រាក់បង់ភ្លើងជាមធ្យមចន្លោះពី ៣០ ០០០ ដុល្លារ ទៅ ៤០ ០០០ ដុល្លារ ក្នុង ១ ខែ។ លោកបន្តថា៖ «វាក៏នឹងជួយកាត់បន្ថយថ្លៃដើមផលិតផងដែរ»។
លោក ស៊ុយ សែម បានធានាថាកម្ពុជានឹងមិនប្រឈមបញ្ហាកង្វះថាមពលអគ្គិសនីទៀតទេនៅឆ្នាំ ២០២០។ កម្ពុជានឹងផ្គត់ផ្គង់ភ្លើង ២ ២១៤ គីឡូវ៉ាត់នៅឆ្នាំនេះកើនឡើងជាង ៤១៤ គីឡូវ៉ាត់ បើធៀបនឹងឆ្នាំមុន។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាបានឲ្យដឹងថា ការបញ្ចុះតម្លៃអគ្គិសនីនេះបានបង្ហាញពីស្ថិរភាពថាមពលអគ្គិសនីដែលរដ្ឋាភិបាលអាចធ្វើការបញ្ចុះតម្លៃនៅពេលនេះ តែបែបនេះក្តីតម្លៃនេះនៅតែខ្ពស់ជាងប្រទេសជិតខាង។ លោកបានថ្លែងថា៖ «សហគ្រាសធុនតូច និងមធ្យមនឹងទទួលបានផលប្រយោជន៍ពីការបញ្ចុះតម្លៃនេះ ប៉ុន្តែតម្លៃអគ្គិសនីនៅតែខ្ពស់បើធៀបនឹងប្រទេសជិតខាង»៕