ភ្នំពេញៈ វៀតណាមបន្តផ្តល់កូតាថ្នាំជក់រួចពន្ធ ៣ ០០០ តោន ឱ្យកម្ពុជាក្នុងឆ្នាំ ២០២១ ដើម្បីឆ្លើយតបតម្រូវការទីផ្សារ។ នេះបើយោងតាមមន្ត្រីជាន់ខ្ពស់នៃក្រសួងពាណិជ្ជកម្ម។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានឱ្យដឹងថា ការបន្តកូតាថ្មីបានធ្វើឡើងក្នុងកិច្ចប្រជុំគណៈកម្មការចម្រុះ (JC) កម្ពុជា-វៀតណាម លើកទី១៨ កាលពីថ្ងៃទី ២២ ខែ ធ្នូ ឆ្នាំ ២០២០។ តាមកិច្ចព្រមព្រៀងនេះ វៀតណាមបន្តផ្តល់កូតា នាំចូលរួចពន្ធលើសន្លឹកថ្នាំជក់ ៣ ០០០ តោន និងអង្ករ ៣០០ ០០០ តោននៅឆ្នាំនេះ។
លោកថ្លែងថា៖ «ផ្អែកតាមលទ្ធផលកិច្ចប្រជុំនេះ ភាគីទាំង ២ បានឯកភាពគ្នាក្នុងការបន្តសុពលភាពកិច្ចសម្របសម្រួលជំរុញពាណិជ្ជកម្មទ្វេភាគីដោយអនុវត្តបន្តសម្រាប់ឆ្នាំ ២០២១-២០២២ ដែលមានសុពលភាពពីថ្ងៃទី ១ ខែ មករា ឆ្នាំ ២០២១»។
លោកបន្ថែមថា ភាគីកម្ពុជាតាមរយៈក្រសួងពាណិជ្ជកម្មក៏បានយល់ព្រមជាគោលការណ៍ពីរដ្ឋាភិបាលឱ្យបន្តសុពលភាពរយៈពេល ២ ឆ្នាំ (ឆ្នាំ ២០២១-២០២២) នៃកិច្ចព្រមព្រៀងកិច្ចសម្របសម្រួលជំរុញពាណិជ្ជកម្មទ្វេភាគីនៃប្រទេសទាំង ២។
លោកនិយាយថា៖ «ដើម្បីបន្តសុពលភាពការអនុវត្តកិច្ចព្រមព្រៀងនេះ ភាគីទាំង ២ ត្រូវរៀបចំនីតិវិធីផ្ទៃក្នុង ហើយភាគីវៀតណាមនឹងជូនដំណឹងមកកម្ពុជាវិញនៅពេលដែលបញ្ចប់នីតិវិធីផ្ទៃក្នុងរួចរាល់»។
កម្ពុជា និងវៀតណាមបានយល់ព្រមលើការអនុគ្រោះពន្ធសម្រាប់ផលិតផលកសិកម្មឆ្លងកាត់ព្រំដែនទាំង ២ កាលពីឆ្នាំ ២០១៦។
ទិន្នន័យក្រសួងពាណិជ្ជកម្មឱ្យដឹងថា កម្ពុជាបាននាំចេញសន្លឹកថ្នាំជក់ស្ងួតទៅវៀតណាម ១ ៣៧៧ តោន ដែលមានតម្លៃជិត ៤,២ លានដុល្លារកាលពីឆ្នាំ ២០២០ ធ្លាក់ ៣៤,៣៦ ភាគរយ ធៀបនឹងឆ្នាំ ២០១៩។
អ្នកស្រី នោ រី កសិករថ្នាំជក់នៅខេត្តត្បូងឃ្មុំ ប្រាប់ ភ្នំពេញ ប៉ុស្តិ៍ថា នៅថ្ងៃអង្គារ (ថ្ងៃទី ២៣ ខែមីនា) សន្លឹកថ្នាំស្ងួតមានតម្លៃ ១០ ០០០ រៀល ក្នុង ១ គីឡូក្រាម ដែលតម្លៃនេះប្រហាក់ប្រហែលឆ្នាំមុន។ អ្នកស្រីរំពឹងថា ឆ្នាំនេះគាត់នឹងអាចប្រមូលផលបានចន្លោះពី ៣ ទៅ ៤ តោន។
អ្នកស្រីនិយាយថា៖ «ទីផ្សារថ្នាំជក់ល្អគ្រាន់បើឆ្នាំនេះ មានប៉ុន្មានតោនគេប្រមូលទិញទាំងអស់ តែតម្លៃមិនខុសគ្នាទៅនឹងឆ្នាំមុននោះទេ»។
ទិន្នន័យពីលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបង្ហាញថា កម្ពុជាបាននាំចេញថ្នាំជក់ ៥ ៨២០,៨២ តោន កាលពីឆ្នាំ ២០២០ ធ្លាក់ ១៤,០២ ភាគរយ ធៀបឆ្នាំ ២០១៩។ ចំណែកប្រាក់ទទួលបានមាន ១៧,៤៦ លានដុល្លារ ធ្លាក់ចុះ ២៨,៣៤ ភាគរយ ធៀបនឹងឆ្នាំ ២០១៩។ ស្លឹកថ្នាំជក់ស្ងួតត្រូវបាននាំទៅប្រទេសវៀតណាម ហុងគ្រី ឥណ្ឌូនេស៊ី អារ៉ាប់រួម បែលហ្ស៊ិក អាហ្វ្រិកខាងត្បូង ក្រិក សិង្ហបុរី និងអាលឺ្លម៉ង់។
ទិន្នន័យពីក្រសួងកសិកម្មឱ្យដឹងថា ក្នុងឆ្នាំ ២០២០ ផ្ទៃដីដាំថ្នាំជក់មាន ៥ ១៧៥ ហិកតា ក្នុងនោះផ្ទៃដីប្រមូលផលមាន ៤ ៨៧៥ ហិកតា។ ការប្រមូលផលបាន ៦ ១៣២ តោន ធ្លាក់ចុះ ១ ភាគរយ បើធៀបនឹងឆ្នាំ ២០១៩៕ LA