ភ្នំពេញៈ ការចុះបញ្ជីម៉ាកពាណិជ្ជកម្មនៅក្រសួងពាណិជ្ជកម្មបានចំនួនជិត ៨ ០០០ ម៉ាក កាលពីឆ្នាំ ២០២០ កើនឡើង ៣០ ភាគរយ ធៀបនឹងឆ្នាំ ២០១៩។ នេះបើតាមរបាយការណ៍បូកសរុបលទ្ធផលការងារពាណិជ្ជកម្មឆ្នាំ ២០២០ និងទិសដៅការងារពាណិជ្ជកម្ម ឆ្នាំ ២០២១។
របាយការណ៍ឲ្យដឹងថា ក្រសួងពាណិជ្ជកម្មបានចុះបញ្ជីម៉ាកឲ្យក្រុមហ៊ុនក្នុងស្រុក និងក្រុមហ៊ុនបរទេសសរុបចំនួន ៧ ៩៩៧ ម៉ាក កើនឡើង ៣០ ភាគរយ ធៀបនឹងឆ្នាំ ២០១៩។ ក្នុងនោះ ការចុះបញ្ជីម៉ាកតាមប្រព័ន្ធជាតិបានចំនួន ៥ ៦២៨ ម៉ាក កើនឡើង ៣២ ភាគរយ ខណៈការចុះបញ្ជីម៉ាកតាមប្រព័ន្ធអន្តរជាតិម៉ាឌ្រីដ (Madrid System) បានចំនួន ២ ៣៦៩ ម៉ាក កើនឡើង ២៥ ភាគរយ។
របាយការណ៍នេះឲ្យដឹងទៀតថា ក្នុងឆ្នាំ ២០២០ ក្រសួងបានទទួលពាក្យសុំចុះបញ្ជីម៉ាកពាណិជ្ជកម្មពីក្រុមហ៊ុនក្នុងស្រុក និងក្រៅស្រុកចំនួន ៦ ១១៦ កើន ៦ ភាគរយ ធៀបនឹងឆ្នាំ ២០១៩ ដែលមានចំនួន ៦ ៥៤។
របាយការណ៍នេះ បន្ថែមថា ជាមួយគ្នា ក្រសួងពាណិជ្ជកម្មបានសម្រុះសម្រួលការរំលោភបំពានម៉ាកចំនួន ២៣ ករណី និងលុបចោលចំនួន ៣៧ ម៉ាក ផងដែរ។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម ប្រាប់ភ្នំពេញ ប៉ុស្តិ៍កាលពីដើមខែមេសា ឆ្នាំនេះថាការចុះបញ្ជីម៉ាកពាណិជ្ជកម្មនឹងត្រូវបានការពារដោយមានដើមកំណើតផ្សារភ្ជាប់ជាមួយទីតាំងភូមិសាស្ត្រជាក់លាក់ មានគុណភាព និងគុណតម្លៃច្បាស់លាស់ ព្រមទាំងធ្វើឱ្យប្រជាជន និងផលិតករក្នុងតំបន់អាចធ្វើការផ្ទេរចំណេះ និងជំនាញបន្តពីជំនាន់មួយទៅជំនាន់មួយទៀត។
លោកថ្លែងថា៖ «ការចុះបញ្ជី GI គឺជាឧបករណ៍ដ៏សំខាន់ក្នុងការលើកទឹកចិត្តឱ្យសហគមន៍ផលិតនូវទំនិញសម្គាល់ភូមិសាស្ត្រដែលមានគុណភាពខ្ពស់តាមរយៈការពង្រឹង និងពង្រីកចង្វាក់ផលិតកម្ម បង្កើនការត្រួតពិនិត្យគុណភាពជាប្រព័ន្ធឱ្យកាន់តែប្រសើរ និងឈានទៅនាំចេញទៅក្រៅប្រទេស»។
របាយការណ៍នេះ បង្ហាញថា ក្រសួងនេះក៏កំពុងអនុវត្តគម្រោងចុះបញ្ជីម៉ាកសម្គាល់ភូមិសាស្ត្រទំនិញ «អំបិស និងផ្កាអំបិលកំពត» ហើយក្រសួងក៏កំពុងអនុវត្តគម្រោងកសាងកេរ្តិ៍ឈ្មោះ និងសមត្ថភាពរបស់សមាគមតាមរយៈការជំរុញឲ្យប្រើប្រាស់រូបភាពសញ្ញាជាតិម៉ាកសម្គាល់ភូមិសាស្ត្រ ម្រេចកំពត ស្ករត្នោតកំពង់ស្ពឺ និងក្រូចថ្លុកកោះទ្រង់។
ទន្ទឹមនឹងនេះ ក្រសួងបាននិងកំពុងរៀបចំការចុះបញ្ជីម៉ាកសមូហភាព អំបុកកំពង់ធំ នំបញ្ចុកសៀមរាប ចម្លាក់ប្រាក់ ស្ពាន់ ឃុំកំពង់លួងកោះចិនខេត្តកណ្តាល ស្មូនឆ្នាំងដីខេត្តកំពង់ឆ្នាំង និងពងទាកូនស្រែននោង ខេត្តតាកែវ ហើយក្រសួងកំពុងសិក្សាស្រាវជ្រាវផលិតផលសក្តានុពល សូត្រខ្មែរ អង្ករសរីរាង្គព្រះវិហារ ក្រូចពោធិ៍សាត់ អង្ករស្មាច់ ស្វាយរៀង ធុរេនសំឡូត មៀនប៉ៃលិន អង្ករនាងអំ ដើម្បីត្រៀមចុះបញ្ជីម៉ាកសមូហភាព៕