.jpg)
ទិដ្ឋភាពទីក្រុងភ្នំពេញ។ រូបថត រ៉ាស់ហ៊ីម
ភ្នំពេញៈ ប្រទេសអភិវឌ្ឍន៍តិចតួចចំនួន ៤ រួមទាំងកម្ពុជាបានជួបពិភាក្សាគ្នាស្វែងរកដំណោះស្រាយនៃការចាកចេញប្រកបដោយរលូនពីប្រទេសអភិវឌ្ឍន៍តិចតួចមកលើវិស័យវាយនភ័ណ្ឌ និងសម្លៀកបំពាក់កាលពីសប្តាហ៍មុន។
លោក ពេជ ឬទ្ធី រដ្ឋលេខាធិការក្រសួងបពាណិជ្ជកម្មបានចូលរួមជាវាគ្មិនក្នុងសិក្ខាសាលានេះ កាលពីថ្ងៃទី ៧ ឧសភា តាមប្រព័ន្ធវីដេអូដែលសហការរៀបចំដោយអង្គការ WTO, UN,DESA, UNCTAD និង ITC។
សិក្ខាសាលានេះធ្វើឡើងក្នុងគោលបំណង ដើម្បីពិភាក្សាអំពីបញ្ហាប្រឈមដែលអាចកើតមានក្រោយការចាកចេញពីឋានៈជាប្រទេសអភិវឌ្ឍន៍តិចតួច និងផលប៉ះពាល់បង្កដោយជំងឺកូវីដ១៩ មកលើវិស័យវាយនភ័ណ្ឌ និងសម្លៀកបំពាក់ ក៏ដូចជា ស្វែងរកដំណោះស្រាយសម្រាប់ដំណើរការចាកចេញពីប្រទេសអភិវឌ្ឍន៍តិចតួចឱ្យមានភាពរលូន។
ក្រៅពីកម្ពុជាក៏មានតំណាងមកពីប្រទេសអភិវឌ្ឍន៍តិចតួច រួមមានបង់ក្លាដែស ឡាវ និងនេប៉ាល់បានចូលរួមក្នុងសិក្ខាសាលានេះផងដែរ។
ក្នុងសិក្ខាសាលានេះ លោក ពេជ ឬទ្ធី ធ្វើបទបង្ហាញអំពីសារៈសំខាន់នៃវិស័យកាត់ដេរក្នុងការជំរុញកំណើនសេដ្ឋកិច្ចកម្ពុជា និងអត្ថប្រយោជន៍នៃភាពអនុគ្រោះពន្ធសម្រាប់កំណើនការនាំចេញរបស់កម្ពុជា។
លោកក៏បានបង្ហាញពីបញ្ហាប្រឈមនៃការចាកចេញពីឋានៈជាប្រទេសអភិវឌ្ឍន៍តិចតួចដែលអាចបង្កផលប៉ះពាល់ដល់ភាពអនុគ្រោះពន្ធ លក្ខខណ្ឌនៃប្រភពដើមកំណើតទំនិញ ភាពទាក់ទាញសម្រាប់ការវិនិយោគ ភាពប្រកួតប្រជែងរបស់កម្ពុជា ព្រមទាំងលើកឡើងពីផលប៉ះពាល់នៃវិបត្តិកូវីដ១៩លើវិស័យកាត់ដេរ និងសម្លៀកបំពាក់ និងឱកាសក្នុងការទទួលជំនួយពាណិជ្ជកម្មផងដែរ។
លោកលើកឡើងទៀតថា៖ «ដើម្បីដោះស្រាយបញ្ហាប្រឈមទាំងនេះ កម្ពុជាលើកឡើងអំពីគោលនយោបាយ និងយុទ្ធសាស្ត្រដើម្បីកម្ពុជាអាចពង្រឹងភាពប្រកួតប្រជែង និងត្រៀមខ្លួនសម្រាប់ចាកចេញពីឋានៈជាប្រទេសអភិវឌ្ឍន៍តិចតួចប្រកបដោយជោគជ័យ ក្នុងនោះ រួមមាន ការធ្វើពិពិធកម្មទីផ្សារនាំចេញតាមរយៈកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី»។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជាបានប្រាប់ភ្នំពេញប៉ុស្តិ៍ថាការអភិវឌ្ឍវិស័យឯកជនគឺជាក្បាលម៉ាស៊ីននៃកំណើនសេដ្ឋកិច្ច និងជួយបង្កើនកម្រិតជីវភាពប្រជាជន។
លោកបានលើកឡើងថា៖ «អ្នករាល់គ្នាចូលចិត្តផ្លែផ្កានៃកំណើននេះមិនត្រឹមតែកម្មករប៉ុណ្ណោះទេ។ ក្នុងចំណោមដៃគូវិស័យឯកជនដទៃទៀតយើងគឺជាដៃគូរបស់រដ្ឋាភិបាលដែលធ្វើការរួមគ្នា ដើម្បីសម្រេចគោលដៅនេះតាមរយៈការធ្វើកំណែទម្រង់រដ្ឋបាល និងគោលនយោបាយជាបន្តបន្ទាប់សម្រាប់បរិយាកាសអាជីវកម្ម»។
«នៅពេលយើងរីកចម្រើន និងអភិវឌ្ឍ យើងនឹងបញ្ចប់ចាកចេញពីឋានៈជាប្រទេសអភិវឌ្ឍន៍តិចតួច ដែលជាព្រឹត្តិការណ៍ដ៏គួរឲ្យស្វាគមន៍មួយ ទោះបីជាមានការបាត់បង់អត្ថប្រយោជន៍មួយចំនួនដូចជាការអនុគ្រោះពាណិជ្ជកម្មដែលផ្តល់ដោយប្រទេសអភិវឌ្ឍន៍ក៏ដោយ»។ នេះបើយោងតាមលោក កាំង។
លោកបានមានប្រសាសន៍បន្ថែមទៀតថា៖« យើងសូមកោតសរសើរ និងគាំទ្រដល់កិច្ចខិតខំប្រឹងប្រែងរបស់រដ្ឋាភិបាលក្នុងការព្យាយាមរក្សាឱ្យបាននូវការវិនិយោគ និងទីផ្សារកាន់តែប្រសើរ និងទូលំទូលាយតាមរយៈកិច្ចព្រមព្រៀងពាណិជ្ជកម្មទ្វេភាគី និងក្នុងតំបន់។ ការអភិវឌ្ឍជំនាញ ការកែលម្អផលិតភាព និងកំណែទម្រង់រដ្ឋបាលផ្ទៃក្នុងគឺជាការងារដែលកំពុងដំណើរការរបស់យើង។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជាចាប់ពីខែមករា ដល់ខែមីនា ឆ្នាំ ២០២១ កម្ពុជាបាននាំចេញផលិតផលវាយនភណ្ឌក្នុងតម្លៃសរុប ២ ៤១០ លានដុល្លារ ធ្លាក់ចុះ ៦,៤៨ ភាគរយ ពីចំនួន ២ ៥៧៧ លានដុល្លារ កាលពីត្រីមាសទី ១ ឆ្នាំ ២០២០៕
