ភ្នំពេញៈ ក្នុងរយៈពេល ២៥ ឆ្នាំ គិតត្រឹមឆ្នាំ ២០១៨ កម្ពុជាបានទូទាត់បំណុលសរុបបូកបញ្ចូលគ្នាចំនួន ១,៣៩ ពាន់លានដុល្លារ ដែលក្នុងនោះនៅឆ្នាំ ២០១៨ ទឹកប្រាក់នៃការទូទាត់បំណុលមានចំនួន ២៦៥,៦ លានដុល្លារ។ នេះបើយោងតាមព្រឹត្តិបត្រស្ថិតិបំណុលសាធារណៈកម្ពុជា ដែលទើបចេញផ្សាយកាលពីថ្ងៃអង្គារ។
ព្រឹត្តិបត្របំណុល ដែលជាការរៀបចំដោយក្រសួងសេដ្ឋកិច្ច និងហិរញ្ញវត្ថុ និងជាការចេញផ្សាយ ប្រចាំឆ្នាំលើកទី៧ បានបង្ហាញថា គិតចាប់ពីឆ្នាំ ១៩៩៣ ដល់ដំណាច់ឆ្នាំ ២០១៨ រដ្ឋាភិបាលបានចុះកិច្ចព្រមព្រៀងលើកម្ចីសម្បទានសរុបចំនួន ១១,៣៩ ពាន់លានដុល្លារ តែក្នុងអំឡុងពេលនេះ រដ្ឋាភិបាលបានដកសាច់ប្រាក់មកប្រើប្រាស់ជាក់ស្តែងសរុបចំនួន ៧,២៩ ពាន់លានដុល្លារ។ គិតត្រឹមដំណាច់ឆ្នាំ ២០១៨ កម្ពុជាមានសន្និធិបំណុលសាធារណៈសរុប ៧,០២ ពាន់លានដុល្លារ ក្នុងនោះជាង ៩៩ ភាគរយជាបំណុលក្រៅប្រទេស។
ព្រឹត្តិបត្របំណុលដែលមានហត្ថលេខាលោករដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុនីរ័ត្ន បានបញ្ជាក់ថា សម្រាប់ឆ្នាំ ២០១៨ ទំហំបំណុលសាធារណៈកម្ពុជា ដែលយកមកធៀបនឹងកត្តាវាស់វែងសំខាន់ៗដូចជា ធៀបនឹងទំហំសេដ្ឋកិច្ច និងធៀបនឹងប្រាក់ចំណូលដុល សុទ្ធសឹងស្ថិតនៅក្រោមចំណុចមិនគួរឲ្យបារម្ភ។
សេចក្តីរាយការណ៍ក្នុងព្រឹត្តិបត្របំណុលឆ្នាំ ២០១៨ បានបង្ហាញថា៖ «ដោយផ្អែកតាមបទដ្ឋានបច្ចេកទេសអន្តរជាតិ លទ្ធផលខាងលើនេះបញ្ជាក់ថា ស្ថានភាពបំណុលសាធារណៈកម្ពុជាបច្ចុប្បន្នមានចីរភាព និងហានិភ័យកម្រិតទាប»។
គិតមកត្រឹមដំណាច់ឆ្នាំ ២០១៨ បំណុលសាធារណៈកម្ពុជាត្រូវបានទទួលភាគច្រើនពីបំណុលទ្វេភាគី និងពហុភាគី ដែលសុទ្ធសឹងជាកម្ចីសម្បទាន។ កម្ចីមួយចំណែកធំបានមកពីចិនដែលមានជិតពាក់កណ្តាលនៃទំហំកម្ចីសរុបឬស្មើនឹង ៣,៤ ពាន់លានដុល្លារ។
នៅក្នុងច្បាប់ថវិកាជាតិឆ្នាំ ២០១៩ រដ្ឋាភិបាលបានគ្រោងទទួលកម្ចីបន្ថែម ១,៤ ពាន់លាន SDR ឬស្មើនឹង ១,៩៤ ពាន់លានដុល្លារដើម្បីឆ្លើយតបផែនការចំណាយនៅឆ្នាំនេះ។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ កាលពីម្សិលមិញ បានឯកភាពនឹងការលើកឡើងរបស់របាយការណ៍បំណុលសាធារណៈ ដោយចាត់ទុកថា កម្រិតបំណុលបច្ចុប្បន្នរបស់កម្ពុជា គឺអាចគ្រប់គ្រងបាន។ លោកបន្តថា តាមពិតទៅកម្ពុជាអាចខ្ចីបន្ថែមដើម្បីអភិវឌ្ឍ ផ្លូវថ្នល់ ស្ពាន និងប្រព័ន្ធធារាសាស្រ្ដ ប៉ុន្តែចាំបាច់ត្រូវធានាថា បន្តប្រើប្រាស់កម្ចីប្រកបដោយការទទួលខុសត្រូវ។
លោកបន្តថា៖ «កម្ពុជា មានការប្រយ័ត្នប្រយែងបានល្អក្នុងការទទួលកម្ចីនេះ តាមពិតទៅកម្ពុជាមានលទ្ធភាពច្រើនជាងនេះផង ក្នុងការទទួលកម្ចីដើម្បីអភិវឌ្ឍហេដ្ឋារចនាសម្ព័ន្ធ។ សំខាន់គឺយកកម្ចីមកប្រើចំគោលដៅ និងប្រកបដោយការទទួលខុសត្រូវ»។
លោក ង៉ែត ជូ អ្នកប្រឹក្សាជាន់ខ្ពស់នៃក្រុមហ៊ុន Emerging Markets Consulting បានលើកឡើងថា កម្រិតបំណុលធៀបនឹងទំហំសេដ្ឋកិច្ច ដែលមានប្រមាណ ៣០ ភាគរយ គឺជាកម្រិតដែលស្ថិតក្នុងហានិភ័យទាបនៅឡើយ។
លោកបញ្ជាក់ថា ប្រទេសជាច្រើននៅក្នុងតំបន់មានកម្រិតបំណុលធៀបនឹងទំហំសេដ្ឋកិច្ចលើសពី ៦០ ភាគរយ ឬ ខ្លះច្រើនជាង ១០០ ភាគរយទៅទៀត។ លោកបន្តថា អ្វីដែលប្រជាពលរដ្ឋជាទូទៅ តែងតែខ្វល់ខ្វាយថា កើតមកជំពាក់គេ ៣០០ ដុល្លារ ឬ ៦០០ ដុល្លារអីភ្លាម គឺជាការបារម្ភដោយមិនបានសំអាងលើការគិតតាមបែបបច្ចេកទេសសេដ្ឋកិច្ចទេ។
លោកថ្លែងថា៖ «បើយើងគិតមីក្រូសេដ្ឋកិច្ច អាជីវកម្មលក្ខណៈគ្រួសារ ការខ្ចីគេមិនសុទ្ធតែអាក្រក់ទេ សំខាន់ថា តើយើងខ្ចីយកមកប្រើចំគោលដៅឬទេ? ខ្ចីដើម្បីជាសកម្មភាពដើម្បីរកចំណូល បានចំណេញ និងអាចសងត្រឡប់ទៅគេវិញបាន»។ លោកបន្តថា៖ «កម្រិតបំណុលរបស់កម្ពុជា មិនស្ថិតក្នុងវិបត្តិ ឬ ហានិភ័យទេ តែសំខាន់តើការវិនិយោគសាធារណៈរបស់យើងមានតម្លាភាពប៉ុនណា និងប្រសិទ្ធភាពប៉ុនណា»៕