ភ្នំពេញៈ ក្រុមហ៊ុននាំចេញ និងនាំចូលទាំងអស់នៅកម្ពុជាចាប់ពីពេលនេះតទៅអាចដាក់ពាក្យសុំផ្លាស់ប្តូរទិន្នន័យប្រតិវេទន៍គយអាស៊ាន (ACDD) តាមប្រព័ន្ធអេឡិចត្រូនិកជាមួយបណ្ដាប្រទេសសមាជិកអាស៊ាន តាមរយៈប្រព័ន្ធបញ្ជរតែមួយរបស់អាស៊ាន (ASW) ដែលនេះជាវិធានការមួយដើម្បីលើកកម្ពស់បន្ថែមទៀតនូវប្រសិទ្ធភាពនៃកិច្ចសម្រួលពាណិជ្ជកម្ម និងគយក្នុងតំបន់។
អគ្គនាយកដ្ឋានគយ និងរដ្ឋាករកម្ពុជា (GDCE) កាលពីថ្ងៃទី ២៤ ខែធ្នូ បានជូនដំណឹងថា ដើម្បីចូលរួមលើកកម្ពស់បន្ថែមទៀតនូវប្រសិទ្ធភាពកិច្ចសម្រួលពាណិជ្ជកម្ម និងស្របទៅតាមគោលនយោបាយរបស់រដ្ឋាភិបាល GDCE បានអភិវឌ្ឍរួចហើយនូវមុខងារសម្រាប់ផ្លាស់ប្តូរទិន្នន័យប្រតិវេទន៍គយអាស៊ាន (ACDD) ក្នុងទម្រង់អេឡិចត្រូនិកជាមួយបណ្ដាប្រទេសសមាជិកអាស៊ានផ្សេងទៀត តាមរយៈប្រព័ន្ធបញ្ជរអាស៊ានតែមួយ (ASW)។
GDCE បន្តថា៖ «ក្នុងន័យដូចបានជម្រាបជូនខាងលើអគ្គនាយកដ្ឋានគយ និងរដ្ឋាករកម្ពុជា សម្រេចដាក់ឱ្យអនុវត្តការផ្លាស់ប្តូរទិន្នន័យប្រតិវេទន៍គយអាស៊ាន (ACDD) បន្ថែមលើការផ្លាស់ប្តូរវិញ្ញាបនបត្របញ្ជាក់ដើមកំណើតទំនិញទម្រង់ D ក្នុងទម្រង់អេឡិចត្រូនិក ATIGA e-Form ដែលចេញដោយអាជ្ញាធរមានសមត្ថកិច្ចនៃប្រទេសសមាជិកអាស៊ានចាប់ពីថ្ងៃជូនដំណឹងនេះតទៅ»។
លោក លឹម ហេង អនុប្រធានសភាពាណិជ្ជកម្មកម្ពុជាបានឱ្យដឹងថា គំនិតផ្តួចផ្ដើមនៃប្រព័ន្ធមិនប្រើប្រាស់ក្រដាសគឺជាការរីកចម្រើនល្អមួយក្នុងការលើកកម្ពស់ពាណិជ្ជកម្មឆ្លងព្រំដែន និងជួយសម្រួលពាណិជ្ជកម្មនៅកន្លែងណាដែលវិស័យឯកជនចង់បាន។
លោកថ្លែងថា៖ «យើងស្វាគមន៍ចំពោះការងារដែលគ្មានក្រដាសស្នាមនេះ។ វាជាការរួមចំណែកកាត់បន្ថយការិយាធិបតេយ្យ និងចំណាយមិនចាំបាច់នានា។ យើងអង្កេតឃើញថា រដ្ឋាភិបាលធ្វើទំនើបកម្មមិនគ្រាន់តែផ្នែកគយប៉ុណ្ណោះទេ ប៉ុន្តែថែមទាំងពន្ធដារតាមរយៈការប្រើប្រាស់បច្ចេកវិទ្យានៃការធ្វើការផងដែរ»។
លោកបន្ថែមថា៖ «យើងចង់ឃើញប្រព័ន្ធគ្មានក្រដាសស្នាមប្រភេទនេះត្រូវបានអនុវត្តមិនគ្រាន់តែជាមួយនឹងបណ្ដារដ្ឋជាសមាជិកអាស៊ានប៉ុណ្ណោះទេ ប៉ុន្តែថែមទាំងជាមួយបណ្ដាប្រទេសជាច្រើនផ្សេងទៀត»។
ប្រព័ន្ធបញ្ជរអាស៊ានតែមួយ (ASW) គឺជាគំនិតផ្តួចផ្ដើមថ្នាក់តំបន់ដែលតភ្ជាប់ និងរួមបញ្ចូលប្រព័ន្ធបញ្ជរជាតិតែមួយ (ASW) នៃរដ្ឋជាសមាជិកអាស៊ាន។ គោលបំណង ASW នឹងបង្កើនល្បឿននៃការបំពេញបែបបទនាំចេញទំនិញ និងលើកកម្ពស់ការធ្វើសមាហរណកម្មសេដ្ឋកិច្ចអាស៊ាន តាមរយៈការជំរុញការផ្លាស់ប្តូរតាមទម្រង់អេឡិចត្រូនិកនៃឯកសារទាក់ទងនឹងពាណិជ្ជកម្មតាមព្រំដែនក្នុងចំណោមរដ្ឋជាសមាជិក។
កាលពីចុងឆ្នាំ ២០១៩ បណ្ដារដ្ឋជាសមាជិកអាស៊ានទាំងអស់បានចូលរួមនៅក្នុងប្រតិបត្តិការផ្ទាល់ ASW ជាកន្លែងដែលផ្ដល់ការអនុគ្រោះពន្ធនឹងត្រូវពឹងផ្អែកលើវិញ្ញាបនបត្របញ្ជាក់ដើមកំណើតទម្រង់ D នៅក្នុងទម្រង់អេឡិចត្រូនិក ATIGA e-Form តាមរយៈ ASW។
លោក Anthony Galliano អគ្គនាយកក្រុមហ៊ុន Cambodian Investment Management Holding Co Ltd បានកត់សម្គាល់ថា កម្ពុជាគឺដូចគ្នានឹងសមាជិកអាស៊ានផ្សេងទៀតដែលបានធ្វើឱ្យរីកចម្រើនលើគំនិតផ្តួចផ្ដើមប្រព័ន្ធបញ្ជរអាស៊ានតែមួយ ដែលមានន័យថា ដើម្បីតភ្ជាប់ និងដាក់បញ្ចូលប្រព័ន្ធបញ្ជរជាតិតែមួយ។
លោកថ្លែងថា៖ «កម្ពុជាអាចទាញយកប្រយោជន៍ពីស្ថាបត្យកម្មព័ត៌មានវិទ្យា និងក្របខ័ណ្ឌច្បាប់ប្រកបដោយសុវត្ថិភាពនេះ ដែលនឹងអាចឱ្យទិន្នន័យអាជីវកម្ម ការដឹកជញ្ជូន និងពាណិជ្ជកម្មត្រូវបានផ្លាស់ប្តូរគ្នាតាមទម្រង់អេឡិចត្រូនិក ក្នុងចំណោមភ្នាក់ងាររដ្ឋាភិបាល និងសហគមន៍ពាណិជ្ជកម្ម»។
លោកបន្តថា ក្នុងចំណោមអត្ថប្រយោជន៍នេះ គឺជាការផ្លាស់ប្តូរដោយរលូន សុវត្ថិភាព និងអាចទុកចិត្តបាននៃទិន្នន័យដោយពឹងផ្អែកលើស្ដង់ដាអន្តរជាតិរវាងបណ្ដារដ្ឋជាសមាជិក និងដៃគូពាណិជ្ជកម្មដែលប្រើប្រាស់ស្ដង់ដាទាំងនេះ។ អត្ថប្រយោជន៍បន្ថែមរួមមានការចងភ្ជាប់ក្របខ័ណ្ឌច្បាប់ដែលគ្រប់គ្រងទាំងការផ្លាស់ប្តូរទិន្នន័យក្នុងស្រុក និងឆ្លងកាត់ព្រំដែន និងការមើលឃើញនៃទិន្នន័យលើការបំពេញបែបបទនាំចេញទំនិញរវាងបណ្ដារដ្ឋជាសមាជិកដែលផ្ដល់ព័ត៌មានដ៏មានតម្លៃស្ដីពីការធ្វើសមាហរណកម្មសេដ្ឋកិច្ច។
លោកពន្យល់ថា៖ «វិញ្ញាបនបត្របញ្ជាក់ដើមកំណើតទំនិញទម្រង់ D ក្នុងទម្រង់អេឡិចត្រូនិក ATIGA e-Form ជួយសម្រួលដំណើរការនៃការបំពេញបែបបទនាំចេញទំនិញ កាត់បន្ថយចំណាយ បង្កើនល្បឿនដំណើរការទាន់ពេលវេលា និង មានតម្លាភាព និងប្រសិទ្ធភាពពាណិជ្ជកម្ម និងសមត្ថភាពប្រកួតប្រជែង»។
កាលពីឆ្នាំ ២០១៨ ការនាំចេញផលិតផលស្បៀងអាហារអាស៊ានសរុបបានកើនឡើងដល់ ៥៥,៦ ពាន់លានដុល្លារ ដែលស្មើនឹង ៩,២ ភាគរយ នៃការនាំចេញរបស់ពិភពលោក ខណៈដែលការនាំចូលស្បៀងអាហារបានកើនឡើងដល់ ៤៣,២ ពាន់លានដុល្លារ ដែលស្មើនឹង ៧,៣ ភាគរយ នៃការនាំចូលស្បៀងអាហារពិភពលោកសរុប៕LA