.jpg)
ភ្នំពេញ: កម្ពុជាបានស្នើឲ្យថៃបើកច្រកព្រំដែនស្ទឹងបត់បានណងអៀងជាបណ្តោះអាសន្ន ដើម្បីសម្រួលដល់ការនាំចេញទំនិញ ខណៈច្រកព្រំដែនអន្តរជាតិប៉ោយប៉ែតមិនទាន់អាចបំពេញតម្រូវការចរាចរណ៍ទំនិញដែលកំពុងកើនឡើង។ នេះបើយោងតាមអ្នកនាំពាក្យក្រសួងសាធារណការ និងដឹកជញ្ជូន។
លោក វ៉ា ស៊ឹមសុរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍កាលពីថ្ងៃអង្គារថា ប្រទេសកម្ពុជាបានលើកសំណើនេះក្នុងកិច្ចប្រជុំមួយរវាងលោក ហេង រ័ត្នពិសិដ្ឋ អគ្គនាយកនៃអគ្គនាយកដ្ឋានសាធារណការជាមួយលោក Apichart Junratasup អនុប្រធាននាយកដ្ឋានអាជ្ញាធរផ្លូវល្បឿនលឿនរបស់ថៃស្តីពីគណៈកម្មាធិការទទួលបន្ទុករៀបចំសេចក្តីព្រាងកិច្ចព្រមព្រៀងលើកទី ២ កាលពីថ្ងៃចន្ទ។
លោកថ្លែងថា៖ «គណៈប្រតិភូថៃបានទទួលយកសំណើរបស់ពួកយើង ក៏ប៉ុន្តែពួកគេស្នើសុំរយៈពេល ១២ ខែដើម្បីរៀបចំហេដ្ឋារចនាសម្ព័ន្ធ»។
លោកបន្ថែមថាច្រកព្រំដែនស្ទឹងបត់ដែលស្ថិតនៅក្នុងខេត្តបន្ទាយមានជ័យនឹងជួយជំរុញកំណើនសេដ្ឋកិច្ច ពាណិជ្ជកម្ម និងការវិនិយោគរវាងកម្ពុជា និងថៃ។ លោកបន្តថា៖ «បើច្រកព្រំដែននេះបើកវានឹងជួយសម្រួលដល់ការនាំចេញ និងនាំចូលទំនិញ ហើយវាក៏នឹងជួយកាត់បន្ថយការកកស្ទះចរាចរណ៍នៅឯច្រកព្រំដែនអន្តរជាតិប៉ោយប៉ែតផងដែរ»។
ច្រកព្រំដែនស្ទឹងបត់ត្រូវបានបើកការដ្ឋានសាងសង់ និងតភ្ជាប់ទៅផ្លូវជាតិលេខ ៥ កាលពីអំឡុងខែមេសាឆ្នាំមុនដែលមកដល់ពេលនេះមិនទាន់ប្រើដំណើរការនៅឡើយទេ។
លោក ឈួ វិចិត្រ ប្រធានក្រុមហ៊ុនតំបន់សេដ្ឋកិច្ចពិសេស Sanco Cambo Investment Group Co Ltd ដែលមានផ្ទៃដីជាង ៨០ ហិកតានៅក្រុងប៉ោយប៉ែតជាប់ព្រំដែនថៃបានឲ្យដឹងថា ច្រកព្រំដែនថ្មីនេះនឹងដើរតួនាទីយ៉ាងសំខាន់ដល់ការនាំចេញទំនិញរវាងប្រទេសទាំងពីរ។
លោកថ្លែងថា៖ «បច្ចុប្បន្នយើងកំពុងប្រឈមនឹងបញ្ហាកក់ស្ទះចរាចរណ៍នៅច្រកព្រំដែនអន្តរជាតិប៉ោយប៉ែត ដែលវាមានការកកស្ទះយ៉ាងខ្លាំងធ្វើឲ្យរាំងស្ទះដល់ការដឹកទំនិញរបស់យើងមិនទាន់ពេលវេលា។ ប្រសិនបើច្រកនេះត្រូវបានបើកវានឹងជួយសម្រួលដល់ការដឹកជញ្ជូនរបស់វិស័យឯកជនក៏ដូចជាក្រុមហ៊ុនខ្ញុំ»។
លោកបញ្ជាក់ថា៖ «ខ្ញុំគិតថាច្រកនេះអាចបើកដំណើរជាបណ្តោះអាសន្នបាន ប្រសិនពួកគេចង់ ព្រោះស្ពាន និងផ្លូវបានសាងសង់រួចរាល់ហើយ ដែលវាអាចបម្រើដល់ការដឹកជញ្ជូនទំនិញបានយ៉ាងងាយ»។
ក្នុងកិច្ចសម្ភាសន៍ជាមួយកាសែតភ្នំពេញប៉ុស្តិ៍កាលពីដើមខែកុម្ភៈលោក អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃបានថ្លែងថា ការនាំចេញរបស់កម្ពុជាទៅប្រទេសថៃភាគច្រើនគឺផលិតផលកសិកម្ម រួមមាន អង្ករ ពោត សណ្តែកសៀង ដំឡូងមី គ្រាប់ស្វាយចន្ទី និងផ្លែស្វាយ ខណៈការនាំចូលមកវិញ ប្រេង គ្រឿងយន្តកសិកម្ម ឧបករណ៍អេឡិចត្រូនិក សម្ភារសំណង់ គ្រឿងសម្អាង និងឧបករណ៍ប្រើប្រាស់ក្នុងគេហដ្ឋាន។
លោកបានថ្លែងថា៖ «ខ្ញុំមានសុទិដ្ឋិនិយមអំពីទំនាក់ទំនងពាណិជ្ជកម្មរបស់ប្រទេសទាំង ២ ដោយសារតែទំហំពាណិជ្ជកម្មទ្វេភាគីរបស់យើងបន្តកើនឡើងពី ១ ឆ្នាំទៅ ១ ឆ្នាំ»។
ស្ថានទូតថៃប្រចាំនៅកម្ពុជាបានឲ្យដឹងថា ពាណិជ្ជកម្មទ្វេភាគីរវាងកម្ពុជា និងថៃមានតម្លៃជាង ៩ ពាន់លានដុល្លារកាលពីឆ្នាំមុនកើនឡើង ៧,១៤ ភាគរយបើធៀបនឹងឆ្នាំ ២០១៨។
ផ្លូវដែករវាងកម្ពុជា និងថៃត្រូវបានតភ្ជាប់កាលពីខែមេសា ២០១៩ ដោយមានការចូលរួមពីនាយករដ្ឋមន្ត្រី ហ៊ុន សែន និងនាយករដ្ឋមន្ត្រីថៃ ប្រាយុធ ចានអូចា ក្នុងគោលបំណងដើម្បីបង្កើនការដឹកជញ្ជូនតាមផ្លូវដែក ប៉ុន្តែមកដល់ពេលនេះផ្លូវដែកនេះមិនមានសកម្មភាពដឹកជញ្ជូននៅឡើយទេ៕ LA
