ភ្នំពេញៈ លោកនាយករដ្ឋមន្ត្រី ហ៊ុន សែន កាលពីថ្ងៃចន្ទបានបញ្ជាឲ្យផ្អាកការនាំចេញអង្ករស និងស្រូវពីកម្ពុជាទៅក្រៅប្រទេសចាប់ពីម៉ោង ២៣:៥៩ នាទីថ្ងៃទី ៥ ខែមេសា តទៅ ក្រោមហេតុផលដើម្បីធានាការផ្គត់ផ្គង់ក្នុងស្រុក ខណៈដែលជំងឺកូវីដ១៩ កំពុងបន្តការរីករាលដាលនៅកម្ពុជា។
ថ្លែងក្នុងសន្និសីទសារព័ត៌មានបន្ទាប់ពីកិច្ចប្រជុំសភាវិសាមញ្ញដើម្បីបោះឆ្នោតផ្តល់សេចក្តីទុកចិត្តលើការតែងតាំង និងកែសម្រួលសមាសភាពរាជរដ្ឋាភិបាលកម្ពុជានាព្រឹកថ្ងៃទី ៣០ ខែមីនា នេះលោក ហ៊ុន សែន បាននិយាយថា ការដាក់ចេញនូវយុទ្ធសាស្ត្របង្ការជាមុនគឺពិតជាមានសារៈសំខាន់ណាស់ក្នុងការរក្សាឲ្យបានការគ្រប់គ្រងប្រទេសក្នុងគ្រាមានអាសន្ន ខណៈជំងឺកូវីដ១៩ កំពុងរាតត្បាតនៅប្រទេសជាច្រើនរួមទាំងកម្ពុជាផងដែរ។
លោកបន្តថា ការសម្រេចដាក់ចេញនូវវិធានការផ្អាកការនាំចេញស្រូវ និងអង្ករសនាពេលនេះគឺដើម្បីធានានូវស្ថិរភាពស្រូវក្នុងស្តុកឲ្យបានល្អប្រសើរ។
លោកបានថ្លែងថា៖ «ខ្ញុំចង់និយាយនៅពេលនេះគឺចេញបញ្ជាឲ្យផ្អាកការនាំចេញអង្ករស និងស្រូវតែអនុញ្ញាតឲ្យនាំចេញអង្ករក្រអូបរហូតដល់មានបទបញ្ជាជាថ្មី ដើម្បីរក្សាទុកផ្គត់ផ្គង់ក្នុងស្រុក ហើយត្រូវចាប់អនុវត្តពីថ្ងៃទី ៥ ខែមេសា ឆ្នាំ ២០២០ តទៅ»។
ទោះយ៉ាងណាលោកបញ្ជាក់ថា ការផ្អាកការនាំចេញនេះនឹងអនុវត្តចំពោះតែអង្ករស និងស្រូវដែលមានតម្រូវការខ្ពស់សម្រាប់ក្នុងស្រុកប៉ុណ្ណោះ ហើយចំពោះអង្ករក្រអូបដែលមានចំនួនតិច និងមិនសូវមានតម្រូវការក្នុងស្រុកច្រើននោះ គឺអនុញ្ញាតឲ្យនាំចេញធម្មតា។
លោកបន្តថា៖ «យើងត្រូវតែរក្សាស្បៀងនៅក្នុងស្រុកយើង ហើយស្បៀងនេះ ខ្ញុំមិនសំដៅទៅលើដំឡូងមី ដំឡូង ពោត និងសណ្តែកទេ គឺទៅលើអង្ករតែម្តង ហើយអង្ករនេះសំដៅតែអង្ករស និងស្រូវប៉ុណ្ណោះ ប៉ុន្តែអង្ករក្រអូបរបស់យើងដែលចុះកុងត្រានាំចេញទៅកាន់សហភាពអឺរ៉ុប និងប្រទេសមួយចំនួន ហើយដែលមានបរិមាណមិនច្រើន គឺសុំឲ្យនៅបន្តការនាំចេញទៅចុះ»។
ទាក់ទងនឹងការកំណត់កាលបរិច្ឆេទនៃការបិទការនាំចេញ លោក ហ៊ុន សែន បានពន្យល់ថា ដើម្បីទុកពេលឲ្យប្រជាជន ឬឈ្មួញដែលបានប្រមូលទិញស្រូវរួចហើយ និងត្រៀមនាំទៅប្រទេសថៃ និងវៀតណាម នាំចេញឲ្យអស់នូវអ្វីដែលគាត់បានប្រមូលទិញកន្លងមក។
ក្រៅពីនោះលោកក៏បានប្រាប់ឲ្យក្រសួងសេដ្ឋកិច្ច និងហិរញ្ញវត្ថុ ពិនិត្យលទ្ធភាពទម្លាក់ប្រាក់កម្ចីទៅឲ្យរោងម៉ាស៊ីនកិនស្រូវ ដើម្បីទទួលទិញនូវស្រូវអង្ករពីប្រជាពលរដ្ឋដែលកន្លងមកតែងតែលក់ទៅឲ្យឈ្មួញនៅប្រទេសជិតខាងផងដែរ។
លោកនិយាយថា៖ «សូមឲ្យរោងម៉ាស៊ីនកិនស្រូវយកចិត្តទុកដាក់ក្នុងការប្រមូលទិញស្រូវនៅតាមទីកន្លែងដែលប្រជាជនធ្វើការច្រូតកាត់ ហើយត្រូវការលក់ស្រូវ ប្រមូលទិញស្រូវទាំងនោះដោយរក្សាតម្លៃស្រូវឲ្យបានល្អ ចៀសវាងការបង្អាប់ថ្លៃ ខណៈមិនមានឈ្មួញមកពីប្រទេសថៃ និងវៀតណាម»។
លោក ចាន់ សុខឃាំង អនុប្រធានសហព័ន្ធស្រូវអង្ករកម្ពុជា (CRF) បានប្រាប់ភ្នំពេញប៉ុស្តិ៍កាលពីថ្ងៃចន្ទថា វិធានការរបស់រដ្ឋាភិបាលក្នុងការផ្អាកការនាំចេញអង្ករស និងស្រូវនឹងជួយឲ្យកម្ពុជាមានស្តុកស្រូវកាន់តែរឹងមាំក្នុងកាលៈទេសៈដែលប្រទេសនានាលើពិភពលោកកំពុងមានបញ្ហាដែលបណ្តាលមកពីការរីករាលដាលជំងឺកូវីដ ១៩។
លោកថ្លែងថា៖ «សហព័ន្ធស្រូវអង្ករកម្ពុជាសូមគាំទ្រចំពោះវិធានការរបស់រដ្ឋាភិបាលក្នុងការពង្រីកស្តុកស្រូវក្នុងស្រុកឲ្យកាន់តែរឹងមាំ និងបង្ការការខ្វះខាតជាយថាហេតុណាមួយកើតឡើង»។
លោកបន្តថា ទោះយ៉ាងណាការផ្អាកការនាំចេញអង្ករសនេះក៏បានធ្វើឲ្យប៉ះពាល់ដល់ការបញ្ជាទិញពីប្រទេសមួយចំនួនផងដែរ។ លោកនិយាយថា៖ «នេះគឺជាស្ថានភាពមួយដែលយើងហៅថា ប្រធានស័ក្តិ ហេតុនេះការចុះកិច្ចព្រមព្រៀងបញ្ជាទិញមួយចំនួននឹងត្រូវលើកលែង»។
បើតាមលោក សុខឃាំង ជាមធ្យមការនាំចេញអង្ករសទៅកាន់ទីផ្សារអន្តរជាតិមានបរិមាណប្រហែល ២០ ភាគរយ ចំណែក ៨០ ភាគរយទៀតជាអង្ករក្រអូប។
របាយការណ៍របស់សហព័ន្ធស្រូវអង្ករកម្ពុជាបានឲ្យដឹងថា កាលពីឆ្នាំ ២០១៩ ការនាំអង្ករចេញកម្ពុជាទៅកាន់ទីផ្សារអន្តរជាតិមានតម្លៃប្រមាណ ៥០១ លានដុល្លារធ្លាក់ចុះ ៤,៣ ភាគរយបើធៀបនឹងឆ្នាំ ២០១៨ ដែលមាន ៥២៤ លានដុល្លារ។
ជាមួយគ្នានេះក្នុងនាមសហព័ន្ធស្រូវអង្ករកម្ពុជា លោកក៏បានស្នើឲ្យក្រសួងសេដ្ឋកិច្ច និងហិរញ្ញវត្ថុបង្កើនការផ្តល់ទុនបន្ថែមដើម្បីឲ្យអ្នកប្រមូលទិញស្រូវ និងរោងម៉ាស៊ីនមានលទ្ធភាពកាន់តែច្រើននៅក្នុងការប្រមូលស្រូវពីប្រជាកសិករយកមកស្តុកទុក។
ទិន្នន័យពីក្រសួងកសិកម្ម រុក្ខាប្រមាញ់ និងនេសាទដែលភ្នំពេញប៉ុស្តិ៍ទទួលបានកាលពីម្សិលមិញឲ្យដឹងថា គិតពីដើមឆ្នាំ ២០២០ រហូតដល់ថ្ងៃទី ២៥ ខែមីនា កម្ពុជានាំចេញអង្ករទៅកាន់ទីផ្សារអន្តរជាតិបានចំនួន ២១៤ ៦១២ តោនក្នុងនោះនាំទៅប្រទេសចិនមានបរិមាណ ៩៤ ០៦០ តោន ទៅសហភាពអឺរ៉ុបមាន ៦២ ៩៩៨ តោន ទៅបណ្តាប្រទេសក្នុងតំបន់អាស៊ាន ២៧ ៩៣៧ តោន និងទិសដៅដទៃទៀត ២៩ ៦១៧ តោន ខណៈការនាំចេញស្រូវទៅប្រទេស វៀតណាម មានបរិមាណ ៨៣៦ ៦៩២ តោន។
កាលពីឆ្នាំ ២០១៩ ការនាំចេញអង្ករទៅទីផ្សារអន្តរជាតិសម្រេចបាន ៦២០ ១០៦ តោន ធ្លាក់ចុះ ០,៩៧ ភាគរយ ធៀបនឹងឆ្នាំ ២០១៨ ដែលមានចំនួន ៦២៦ ២២៥ តោន។ តួលេខឲ្យដឹងទៀតថា ការនាំចេញទៅចិនមានចំណែក ៤០,៧៣ ភាគរយ ស្មើនឹង ២៤៨ ១០៥ តោន ទីផ្សារអឺរ៉ុប ៣២,០១ ភាគរយ ស្មើនឹង ២០២ ៩៩០ តោន តំបន់អាស៊ាន មាន ១៣,៤១ ភាគរយ ស្មើ ៨៣ ១៦៤ តោន និងទិសដៅផ្សេងទៀត ១៣,៨៤ ភាគរយ ស្មើនឹង ៨៥ ៨៤៧ តោន។ ចំណែកការនាំចេញស្រូវទៅប្រទេសវៀតណាមមាន ២,១៥ លានតោន។ នេះបើយោងតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ៕ LA
វីដេអូ៖