ភ្នំពេញ៖ កម្ពុជាបាននិងកំពុងពន្លឿនការសាងសង់ហេដ្ឋារចនាសម្ព័ន្ធផ្លូវ និងប៉ុស្តិ៍ត្រួតពិនិត្យទំនិញនៅច្រកព្រំដែនអន្តរជាតិស្ទឹងបត់ (កម្ពុជា)-បានណងអៀន (ថៃ) ខណៈដំណើរការសាងសង់ផ្លូវរបស់ថៃតភ្ជាប់មកច្រកទ្វារនេះ សម្រេចបាន ៧០ ភាគរយហើយ។
កាសែត Bangkok Post បានឲ្យដឹងថា ផ្លូវនេះមាន ៤ គន្លង តភ្ជាប់ពីព្រំដែនបានណងអៀននៅខេត្តស្រះកែវរបស់ថៃ មកព្រំដែនស្ទឹងបត់ក្នុងខេត្តបន្ទាយមានជ័យរបស់កម្ពុជា។
កាសែត Bangkok Post បន្ថែមទៀតថា ផ្លូវនេះនឹងចំណាយថវិកាចំនួន ២ ពាន់លានបាត (ប្រហែល ៦៣,៧១ លានដុល្លារ) មានប្រវែងប្រហែល ២៥ គីឡូម៉ែត្រ ដែលនឹងជួយសម្រួលដល់ការដឹកជញ្ជូន និងទេសចរណ៍ដល់ភាគីទាំង ២ នាពេលអនាគត។ ការស្ថាបនាផ្លូវនេះ គ្រោងនឹងបញ្ចប់នៅខែកុម្ភៈ ឆ្នាំក្រោយ។
លោក វ៉ា ស៊ឹមសុរិយា អ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងថា សព្វថ្ងៃកម្ពុជាបាននិងកំពុងដំណើរការសាងសង់ផ្លូវ និងហេដ្ឋារចនាសម្ព័ន្ធនៅច្រកព្រំដែនស្ទឹងបត់យ៉ាងមមាញឹក។
លោកឲ្យដឹងថា៖ «យើងកំពុងតែឌីហ្សាញប្លង់ប៉ុស្តិ៍ត្រួតពិនិត្យទំនិញបណ្តោះអាសន្នរបស់យើង និងហេដ្ឋារចនាសម្ព័ន្ធផ្សេងទៀតកំពុងសាងសង់។ យើងឃើញថា ច្រកព្រំដែនប៉ោយប៉ែតមានកកស្ទះរថយន្តដឹកទំនិញយ៉ាងខ្លាំង ដូច្នេះទាមទារឱ្យមានហេដ្ឋារចនាសម្ព័ន្ធថ្មីសមរម្យសម្រាប់ត្រួតពិនិត្យទំនិញ និងអ្នកដំណើរចេញចូលប្រទេសទាំង ២»។
បើតាមរដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ការសាងសង់គម្រោងនេះ ត្រូវបានចំណាយថវិកាចំនួន ២៦, ៨៥ លានដុល្លារ ដែលជាគម្រោងឥណទានទីភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ចប្រទេសជិតខាង (NEDA)។
ទំហំពាណិជ្ជកម្មកម្ពុជា-ថៃ ក្នុងត្រីមាសទី១ ឆ្នាំ ២០២១ មានចំនួនសរុប ២ ០៩៧,៣៤ លានដុល្លារ ធ្លាក់ចុះ ២១,៣៦ ភាគរយ ធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យពីនាយកដ្ឋានពាណិជ្ជកម្មបរទេសប្រទេសថៃ។
ទិន្នន័យបង្ហាញថា ក្នុងនោះការនាំទំនិញពីកម្ពុជាទៅប្រទេសថៃ មានតម្លៃ ៣២៩,៥៤ លានដុល្លារ ធ្លាក់ចុះ ៤៨,៩២ ភាគរយ ខណៈការនាំទំនិញពីប្រទេសថៃ មកកម្ពុជាមានតម្លៃ ១ ៧៦៧,៨ លានដុល្លារ ធ្លាក់ ១២,៥៧ ភាគរយ ធៀបនឹងរយៈពេលដូចគ្នាកាលពីឆ្នាំមុន៕