ភ្នំពេញៈ ប្រទេសកម្ពុជាកំពុងពិនិត្យមើលសំណើក្នុងការបង្កើនកូតារថយន្តដឹកជញ្ជូនអ្នកដំណើរ និងទំនិញឆ្លងព្រំដែនចេញពីបណ្ដាប្រទេសជិតខាង។
ខណៈការបង្កើនកូដតារថយន្តពីប្រទេសវៀតណាម និងថៃឆ្លងមកប្រទេសកម្ពុជាត្រូវបានគេមើលឃើញថា ជាការបង្កើនការប្រកួតប្រជែងកាន់តែខ្លាំងសម្រាប់ប្រតិបត្តិការក្នុងស្រុកនៅក្នុងឧស្សាហកម្មដឹកជញ្ជូន។ មន្ដ្រីរដ្ឋាភិបាលថ្លែងថា វានឹងផ្ដល់អត្ថប្រយោជន៍ដល់សេដ្ឋកិច្ចរបស់កម្ពុជា។
វៀតណាមបានស្នើបន្ថែមរថយន្ត ១០០ គ្រឿងទៀតជាការបន្ថែមលើរថយន្តបច្ចុប្បន្នដែលចំនួន ៥០០ គ្រឿងឆ្លងកាត់ព្រំដែនរវាងប្រទេសទាំងពីរនេះ។ យោងតាមមន្ដ្រីមកពីក្រសួងសាធារណការ និងដឹកជញ្ជូនដែលបានស្នើសុំមិនបញ្ចេញឈ្មោះបានឲ្យដឹងថា ប្រទេស
ថៃក៏បានបង្ហាញចំណាប់អារម្មណ៍នៅក្នុងការពិភាក្សាពីការបង្កើនកូតារថយន្តបច្ចុប្បន្ន ៤០ គ្រឿងរបស់ខ្លួនឲ្យដល់៥០០គ្រឿងជាមួយប្រទេសកម្ពុជាផងដែរ។
លោកបានលើកឡើងថា៖ «យើងកំពុងពិភាក្សាថា តើត្រូវយល់ព្រមលើការស្នើសុំរបស់ប្រទេសវៀតណាមដែរឬទេខណៈមានការបារម្ភថា ប្រតិបត្តិករក្នុងស្រុកនឹងមិនមានលទ្ធភាពប្រកួតប្រជែងជាមួយនឹងការបង្កើនរថយន្តដឹកទំនិញ និងអ្នកដំណើរមកពីប្រទេសវៀតណាមនោះទេ»។
លោកថ្លែងថា៖ «សម្រាប់ប្រទេសថៃ រដ្ឋាភិបាលកម្ពុជាបានស្នើសុំបង្កើនឲ្យដល់ ៥០០ គ្រឿង។ កន្លងមករដ្ឋាភិបាលថៃមិនបង្ហាញចំណាប់អារម្មណ៍ច្រើននៅក្នុងការពិភាក្សាទ្វេភាគីទេទើបតែថ្មីៗនេះប៉ុណ្ណោះ»។
លោកបានបន្ថែមថា ប្រសិនបើការបង្កើនកូតារថយន្តដល់៥០០គ្រឿងជាមួយប្រទេស ថៃ នឹងមានច្រកទា្វរព្រំដែនកាន់តែច្រើនទៀតបន្ថែមលើច្រកអន្តរជាតិប៉ោយប៉ែត»។
លោកបានបន្ថែមថា ប្រទេសកម្ពុជានឹងឆ្លើយតបនឹងការស្នើសុំដល់ប្រទេសវៀតណាមបន្ទាប់ពីការពិភាក្សានៅក្នុងក្រសួង ហើយវានឹងត្រូវការពេលវេលាយ៉ាងហោចណាស់មួយឆ្នាំសម្រាប់ប្រទេសកម្ពុជា និងថៃក្នុងការពិភាក្សាទ្វេភាគីស្ដីពីការចុះហត្ថលេខាលើកិច្ចព្រមព្រៀងនេះ។
លោកលើកឡើងថា៖ «វាត្រូវការពេលវេលាយ៉ាងហោចណាស់មួយឆ្នាំ ខណៈដែលកិច្ចប្រជុំផ្លូវការរវាងប្រទេសកម្ពុជា និងថៃ ត្រូវការមានអនុស្សរណៈនៃការយោគយល់គ្នា (MOU) ត្រូវបានចុះហត្ថលេខា»។
លោកបន្តថា ការបង្កើនចំនួនរថយន្តឆ្លងកាត់ព្រំដែនមកពីបណ្ដាប្រទេសជិតខាងមកកាន់កម្ពុជាមានន័យថា ជាការបង្កើនទំហំពាណិជ្ជកម្មទ្វេភាគីសម្រាប់សេដ្ឋកិច្ចរបស់ប្រទេសកម្ពុជា។
កម្ពុជាបានចុះហត្ថលេខាលើកិច្ចព្រមព្រៀងទេ្វភាគីស្ដីពីការដឹកជញ្ជូនតាមផ្លូវថ្នល់ជាមួយប្រទេសវៀតណាម៥០០គ្រឿង ប្រទេសឡាវ ៤០គ្រឿង និង ប្រទេសថៃ៤០គ្រឿង។
លោក សុខ ចាន់មុនី ប្រធានសមាគមរថយន្តក្រុងកម្ពុជា បានថ្លែងកាលពីម្សិលមិញថា លោកមិនជំទាស់នឹងការបង្កើនកូដតានៅក្នុងកិច្ចព្រមព្រៀងទ្វេភាគីរវាងបណ្ដាប្រទេសជិតខាងនោះទេ ប៉ុន្តែលោកបានជំរុញឲ្យរដ្ឋាភិបាលត្រូវធានាឲ្យប្រាកដថា កិច្ចព្រមព្រៀងនេះមានយុត្តិធម៌សម្រាប់ប្រទេសកម្ពុជា។
លោកបញ្ជាក់ថា៖ «ប្រសិនបើរថយន្តមកពីប្រទេសថៃអាចដឹកជញ្ជូនទំនិញ និងអ្នកដំណើរមកទីក្រុងភ្នំពេញ និងសៀមរាប រថយន្តមកពីកម្ពុជាគួរតែត្រូវបានគេអនុញ្ញាតឲ្យដឹកជញ្ជូនទៅកាន់ទិសដៅទេសចរណ៍ធំពួកគេបានផងដែរ។ ប៉ុន្តែរហូតមកដល់ពេលនេះយើងអាចឈប់បានតែនៅក្នុងទីក្រុងបាងកកតែប៉ុណ្ណោះ ហើយបានបង្ខំឲ្យប្រើប្រាស់ការដឹកជញ្ជូនក្នុងស្រុករបស់ពួកគេដើម្បីទៅដល់តំបន់ទេសចរណ៍ផ្សេងទៀត របស់ពួកគេ»។
លោកចាន់ មុនីលើកឡើងថា កម្ពុជាមិនធ្លាប់បានបង្កើនកូតាជាមួយប្រទេសវៀតណាមនៅឡើយទេ។ លោកបន្ថែមថា រដ្ឋាភិបាលគួរតែជំរុញឲ្យមានការនាំចេញផលិតផលក្នុងស្រុកកាន់តែច្រើនមុនពេលការបង្កើនចំនួនរថយន្តឆ្លងកាត់ព្រំដែនមកពីបណ្ដាប្រទេសជិតខាងមកកាន់ប្រទេសកម្ពុជា។
លោក ចាន់ សុផល អ្នកនាំពាក្យសមាគមសេដ្ឋកិច្ចកម្ពុជាបានថ្លែងថា ការប្រកួតប្រជែងគឺចៀសមិនរួចទេសម្រាប់ ប្រតិបត្តិករដឹកជញ្ជូនក្នុងស្រុកដោយសារតែបណ្ដាប្រទេស អាស៊ានទាំង១០នឹងក្លាយទៅជាទីផ្សារតែមួយនៅក្នុងពេលអនាគតឆាប់ៗខាងមុខនេះ។
លោកថ្លែងថា៖ «ប្រតិបតិ្តករជាច្រើននឹងប្រឈមនឹងការប្រកួតប្រជែងកាន់តែខ្លាំងខណៈដែលត្រូវផ្ដល់អត្ថប្រយោជន៍សេវាដល់អ្នកប្រើប្រាស់។ ក្រុមហ៊ុនរកស៊ីនៅក្នុងឧស្សាហកម្មនេះដែលមានសេវាដឹកជញ្ជូនមានតម្លៃទាប និងមានប្រសិទ្ធភាពនឹងក្លាយជាអ្នកឈ្នះ»។
លោកបន្ថែមថា៖«តម្លៃទាបនិងសេវាដឹកជញ្ជូនកាន់តែមាន ប្រសិទ្ធភាពនឹងបង្កើនល្បឿនពាណិជ្ជកម្មទំនិញ និងការបង្កើនកំណើនសេដ្ឋកិច្ច»៕
