.jpg)
លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ រូបថត SPM
ភ្នំពេញ៖លោកនាយករដ្ឋមន្ត្រី ហ៊ុន សែន បានថ្លែងអះអាងនៅព្រឹកថ្ងៃសៅរ៍ ទី ១០ មេសានេះថា កម្ពុជានឹងមិនមានបញ្ហាប្រឈមនៃការខ្វះខាតថវិកាសម្រាប់ការចំណាយដើម្បីបំពេញសេចក្តីត្រូវការរបស់ប្រទេសឡើយ បើទោះបីរាជរដ្ឋាភិបាលបាននិងកំពុងមមាញឹកនៃការប្រយុទ្ធប្រឆាំងនឹងព្រឹត្តិការណ៍ ២០ កុម្ភះ។
ការលើកឡើងរបស់លោក ហ៊ុន សែន បានធ្វើឡើងក្នុងកិច្ចថ្លែងសារពិសេសពាក់ព័ន្ធស្ថានភាពជំងឺកូវីដ១៩នៅកម្ពុជា ដោយថ្លែងថារដ្ឋាភិបាលនៅតែទទួលបានពីការកៀរគរប្រាក់ចំណូលពីពន្ធដារ និងពន្ធគយនៅតែបន្តរក្សាបានកំណើន។ នេះគឺជាការឆ្លើយតបទៅនឹងការលើកឡើងពីសំណាក់ក្រុមប្រឆាំងមួយក្តាប់តូចដែលចោទថារដ្ឋាភិបាលថាការតម្រូវឲ្យមន្ត្រីរាជការដាច់ខាតត្រូវតែចាក់វ៉ាក់សាំង បើពុំដូច្នោះទេនឹងត្រូវលុបចោលពីក្របខ័ណ្ឌដើម្បីសន្សំការចំណាយ។
លោក ហ៊ុន សែន បានថ្លែងបញ្ជាក់យ៉ាងដូច្នេះថា៖ «ខែមីនា កន្លងទៅ ចំណូលថវិកាផ្នែកពន្ធដាទទួលបានជាង ៦០០ លានដុល្លារ និង ផ្នែកគយទទួលបានជាង ២០០ លានដុល្លារ សរុបជាង ៨០០ លានដុល្លារ។ បើពន្ធដារគិតទាំងខែ ១ និងខែ ២ បូកនឹងខែ ៣ បានជាង ១ ពាន់លាន (ដុល្លារ) រួច ទៅ ហើយសូមផ្តាំទៅ។ ឯផ្នែកគយទាំង ៣ ខែបាន (ចំណូល) ជាង ៦០០ លានដុល្លាររួចទៅហើយ។ តើរដ្ឋបាល ហ៊ុន សែន ខ្វះលុយទេ?»។
លោក ហ៊ុន សែន បានថ្លែងបញ្ជាក់ទៀតថា ជាមួយនឹងសាច់ប្រាក់ដែលរដ្ឋាភិបាលមាន និងសន្សំគឺអាចធានាបើកប្រាក់បៀវត្សដល់មន្ត្រីរាជការរបស់ខ្លួនបានជាង ៣ ឆ្នាំទៀត៕
