ភ្នំពេញៈ ទោះបីជាការរីករាលដាលនៃជំងឺកូវីដ១៩ជាសកលជះឥទ្ធិពលអវិជ្ជមានដល់ការនាំចេញផលិតផលសម្លៀកបំពាក់ និងវាយនភ័ណ្ឌកាលពីឆ្នាំ ២០២០ ក៏ដោយ ក៏ប្រទេសកម្ពុជាបាននាំចេញកសិផលសរុបជាង ១៣ លានតោនកាលពីឆ្នាំ ២០២០ ឬគិតជាទឹកប្រាក់ប្រមាណជាង ៣,៤ ពាន់លានដុល្លារ។ នេះបើតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ។
ក្រសួងកសិកម្មឲ្យដឹងថា កម្ពុជាបានផលិតនូវផលិតផលកសិកម្មសរុបជាង ២០ លានតោនកាលពីឆ្នាំមុន ក្នុងនោះកម្ពុជាបាននាំចេញកសិផលសរុបចំនួនជាង ១៣ លានតោន ដោយរកចំណូលពីការនាំចេញចំនួនជាង ៣ ៤៣៣ លានដុល្លារកាលពីឆ្នាំទៅ។ នេះបង្ហាញថា ការនាំចេញកសិផលរបស់កម្ពុជាបង្ហាញកំណើនល្អប្រសើរ។
ក្រសួងកសិកម្មបន្ថែមថា ក្នុងនោះកម្ពុជាបាននាំចេញអង្ករ និងស្រូវក្នុងបរិមាណសរុបជាង ៣,៥៨ លានតោនដែលមានតម្លៃជាង ១,២៦ ពាន់លានដុល្លារ នៅឆ្នាំ ២០២០។ ក្នុងនោះ ការនាំចេញស្រូវគិតជាទឹកប្រាក់មានតម្លៃជាង ៧២៣ លានដុល្លារ។
ក្រសួងកសិកម្មឲ្យដឹងទៀតថា ដើម្បីដោះស្រាយបញ្ហាទីផ្សារកសិករកម្ពុជា ក្រសួងបានខិតខំជំរុញការចរចាស្តីពីលក្ខខណ្ឌតម្រូវភូតគាមអនាម័យលើមុខដំណាំសំខាន់ៗ ដើម្បីបើកទីផ្សារជាមួយបណ្តាប្រទេសដែលមានបំណងនាំចូលកសិផលកម្ពុជារហូតបានសម្រេចបានជោគជ័យរួចមកហើយនាពេលកន្លង។
ក្នុងខែមិថុនា ឆ្នាំ២០២០ កម្ពុជាបានចុះហត្ថលេខាលើកិច្ចព្រមព្រៀងជាមួយប្រទេសចិន ដោយអាចនាំចេញស្វាយស្រស់ ៥០ ម៉ឺនតោនក្នុង ១ ឆ្នាំ។
ក្រសួងកសិកម្មបន្ថែមថា៖ «ក្រសួងនឹងបន្តជំរុញកិច្ចសហការយ៉ាងជិតស្និទ្ធជាមួយដៃគូអភិវឌ្ឍន៍វិស័យឯកជន ពិសេសក្រុមហ៊ុនវិនិយោគផ្នែកកសិកម្ម និងកសិឧស្សាហកម្ម ដើម្បីសម្រេចបាននូវគោលដៅរួមនៃការអភិវឌ្ឍវិស័យកសិកម្មនៅកម្ពុជាប្រកបដោយប្រសិទ្ធភាពខ្ពស់»។
អ្នកស្រី ប៉ាន់ ចន្ទ្រា ម្ចាស់រោងម៉ាស៊ីនកិនស្រូវ ថន ជា ស្ថិតនៅស្រុកអូររាំងឪ ខេត្តត្បូងឃ្មុំ ប្រាប់ភ្នំពេញ ប៉ុស្តិ៍ថា ប្រទេសវៀតណាមភាគច្រើនមានតម្រូវការស្រូវប្រភេទអង្ករស។ អ្នកស្រីនិយាយថា៖ «យើងមិនចង់ឲ្យមានការនាំចេញស្រូវច្រើនពេកទេព្រោះរោងម៉ាស៊ីនកិនស្រូវនឹងប្រឈមកង្វះស្រូវកិនសម្រាប់នាំចេញ ហើយយើងនាំចេញផលិតផលសម្រេចល្អប្រសើរជាង»។
លោក គី សិរីវឌ្ឍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា សង្កេតឃើញថា ការនាំចេញកសិផលរបស់កម្ពុជាភាគច្រើនគឺផលិតផលស្រូវដែលត្រូវបាននាំចេញទៅកាន់ប្រទេសជិតខាងកម្ពុជា។ ជាមួយគ្នានេះ ផ្លែចេកស្រស់ និងស្វាយស្រស់ក៏ត្រូវបាននាំចេញច្រើនគួរឲ្យកត់សម្គាល់ផងដែរ កាលពីឆ្នាំទៅ។
លោកថ្លែងថា៖ «ខ្ញុំសម្គាល់ថា ការនាំចេញកសិផលរបស់កម្ពុជា ភាគច្រើនស្រូវទៅប្រទេសជិតខាងកម្ពុជាគឺថៃនិងវៀតណាមហើយផ្លែស្វាយ និងចេកត្រូវបាននាំចេញដោយក្រុមហ៊ុនដូច្នេះការវេចខ្ចប់ និងភូតគាមអនាម័យត្រូវតាមស្តង់ដារយ៉ាងល្អដឹកចេញទៅកាន់ទីផ្សារប្រទេសចិន»។
លោកថ្លែងទៀតថា ទោះបីយ៉ាងណាកម្ពុជាចាំបាច់ជំរុញបច្ចេកទេសបន្ថែមទៀតដល់កសិករ ដើម្បីកសិករអាចផលិតផលិតផលកសិផលត្រឹមត្រូវតាមស្តង់ដាសម្រាប់នាំចេញ។
លោកនិយាយថា៖ «នេះបង្ហាញថាសន្ទុះនៃការបើកច្រកសេដ្ឋកិច្ចកម្ពុជាតាមរយៈនាំចេញកសិផលងើបឡើងហើយ តែមិនទាន់គ្រប់គ្រាន់នៅឡើយទេ ដោយសារកសិផលមួយចំនួនមិនអាចផ្គត់ផ្គង់គ្រប់គ្រាន់ ហើយត្រូវផ្តល់បច្ចេកទេសទៅដល់កសិករឲ្យត្រូវស្តង់ដានាំចេញ ដើម្បីផ្តល់លទ្ធភាពដល់កសិករគ្រប់រូបអាចនាំចេញកសិផល ដូច្នេះរដ្ឋាភិបាលគួរតែជំរុញបន្ថែមទៀត»៕