ភ្នំពេញៈ កម្ពុជារកប្រាក់ចំណូលបានជាង ៣៥ លានដុល្លារ ពីការលក់សំបុត្រចូលទស្សនាតំបន់ទេសចរណ៍ប្រវត្តិសាស្ដ្រដ៏ល្បីល្បាញរបស់ខ្លួននៅក្នុងរយៈពេល ៣ ខែដំបូងឆ្នាំនេះដោយធ្លាក់ចុះ ៩,៣៤ ភាគរយធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមតួលេខ របស់គ្រឹះស្ថានអង្គរកាលពីថ្ងៃម្សិលមិញ។
មន្ដ្រីក្រសួងទេសចរណ៍ បានឲ្យដឹងថា ការធ្លាក់ចុះទាំងប្រាក់ចំណូល និងភ្ញៀវទេសចរទៅទស្សនាតំបន់អង្គរ ដោយសារតែអាកាសធាតុក្ដៅ ខណៈភ្ញៀវទេសចរបានផ្លាស់ប្តូរទៅទិសដៅផ្សេងទៀត។
តួលេខបានពីគ្រឹះស្ថានអង្គរ ដែលចេញផ្សាយកាលពីថ្ងៃចន្ទ បានកត់ត្រាភ្ញៀវទេសចរបរទេស ៧៨៧ ៩០០ នាក់ បានមកទស្សនាតំបន់ឧទ្យានអង្គរចាប់ពីខែមករា ដល់ខែមីនា ដែលចំនួននេះបានធ្លាក់ចុះ ៨,២៣ ភាគរយ ធៀបនឹងរយៈពេលដូចគ្នាកាលពីឆ្នាំមុន ខណៈចំណូលបានពីការលក់សំបុត្រទទួលបានជាង ៣៥ ៩៥២ ៨៤០ ដុល្លារ ធ្លាក់ចុះ ៩,៣៤ ភាគរយ។
ប្រាសាទអង្គរ នៅតែជាតំបន់រកចំណូលពីភ្ញៀវទេសចរឈានមុខគេ បើធៀបនឹងតំបន់បេតិកភណ្ឌពិភពលោកល្បីឈ្មោះ ២ ផ្សេងទៀតរបស់ប្រទេស កម្ពុជា គឺប្រាសាទព្រះវិហារ នៅខេត្តព្រះវិហារ និងតំបន់ប្រាសាទបុរាណសំបូរព្រៃគុក នៅខេត្តកំពង់ធំ។
លោក តុប សុភ័ក អ្នកនាំពាក្យក្រសួងទេសចរណ៍ បានឲ្យដឹងថា ការធ្លាក់ចុះនេះគ្រាន់តែជានិន្នាការធម្មតាប៉ុណ្ណោះ ហើយវាកើតឡើងដោយសារការប្រែប្រួលទីផ្សារទេសចរណ៍។ លោកបានថ្លែងថា៖ «វាជានិន្នាការធម្មតាមួយ ដោយសារតែអាកាសធាតុក្ដៅខ្លាំង ភ្ញៀវទេសចរអាចផ្លាស់ប្តូរទិសដៅទៅតំបន់ឆ្នេរ ឬទៅលេងតំបន់អេកូទេសចរណ៍»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍បានឲ្យដឹងថា និន្នាការទេសចរជារួមនៅតែរក្សាស្ថិរភាព ប៉ុន្តែអំឡុងពេលនៃការស្នាក់នៅត្រូវបានកាត់បន្ថយ។ លោកស្រីថ្លែងថា៖ «ការមកដល់របស់ភ្ញៀវទេសចរនៅតែមានស្ថិរភាព ប៉ុន្តែខ្ញុំបានកត់សម្គាល់ថា ពួកគេបានកាត់បន្ថយរយៈពេលនៃការស្នាក់នៅទីនេះ [ទីក្រុងអង្គរ]»។
លោកស្រីបន្តថា៖ «ជាធម្មតាជនបរទេសស្នាក់នៅ ៣ ថ្ងៃ តែនៅពេលនេះភាគច្រើនពួកគេស្នាក់តែ ១ ថ្ងៃប៉ុណ្ណោះ»។ ប៉ុន្តែលោកស្រីបញ្ជាក់ថា ការធ្លាក់ចុះនេះ អាចជាប់ទាក់ទងនឹងតម្លៃសំបុត្រផងដែរ។
លោកស្រីថ្លែងថា៖ «ខណៈសំបុត្រចូលទស្សនាប្រាសាទរបស់យើង គឺមានតម្លៃខ្ពស់បន្តិច ភ្ញៀវទេសចរចង់សាកល្បងទិសដៅថ្មីនៅក្នុងប្រទេស កម្ពុជា ផងដែរ»។
តម្លៃសំបុត្រចូលទស្សនាតំបន់អង្គរសម្រាប់ជនបរទេស នៅពេលនេះគឺ ៣៧ ដុល្លារម្នាក់សម្រាប់សំបុត្រ ១ ថ្ងៃ ៦២ ដុល្លារសម្រាប់សំបុត្ររយៈពេល ៣ ថ្ងៃ និង ៧២ ដុល្លារសម្រាប់សំបុត្រ ១ សប្ដាហ៍។ កាលពីមុនតម្លៃសំបុត្រគឺ ២០ ដុល្លារ ៤០ ដុល្លារ និង ៦០ ដុល្លារ។
លោក ធូន ស៊ីណាន ប្រធានសហព័ន្ធទេសចរណ៍កម្ពុជា បានមើលឃើញថា ទីផ្សារទេសចរណ៍របស់កម្ពុជាមិនមានតុល្យភាព និងស្នើឲ្យរដ្ឋាភិបាលត្រូវបង្កើតផលិតផលទេសចរណ៍កាន់តែច្រើន ដើម្បីទាក់ទាញភ្ញៀវទេសចរឲ្យស្នាក់នៅកាន់តែយូរ ខណៈកង្វះការកែលម្អហេដ្ឋារចនាសម្ព័ន្ធនៅខេត្តសៀមរាប គឺជាបញ្ហាសម្រាប់វិស័យនេះផងដែរ។
លោកថ្លែងថា៖ «ខណៈយើងមានភ្ញៀវទេសចរចិនកាន់តែច្រើន យើងបាត់បង់ភ្ញៀវទេសចរបរទេសផ្សេងទៀត ដូចដែលយើងបានដឹងនៅក្នុងខេត្តព្រះសីហនុ»។
លោកបន្តថា៖ «ដើម្បីរក្សាភ្ញៀវទេសចររបស់យើងរដ្ឋាភិបាលគួរតែព្យាយាមធ្វើឲ្យតំបន់អង្គរមានពណ៌បៃតងកាន់តែច្រើន ក្នុងអំឡុងរដូវប្រាំង ព្រមទាំងសេវាមានគុណភាពនៅក្នុងបរិវេណនេះផងដែរ»។
ប្រទេស កម្ពុជា បានទាក់ទាញភ្ញៀវទេសចរបរទេសសរុប ១,២៤ លាននាក់ក្នុងអំឡុងពេល ២ ខែដំបូងឆ្នាំនេះ កើនឡើងជិត ១០ ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលត្រូវបាននាំមុខដោយភ្ញៀវទេសចរចិន។ នេះបើតាមទិន្នន័យពីក្រសួងទេសចរណ៍។
ទិន្នន័យបានបង្ហាញថា ក្នុងអំឡុងពេលនេះ ប្រទេស កម្ពុជា បានទាក់ទាញភ្ញៀវទេសចរចិន ៤១៨ ៥៧២ នាក់ កើនឡើង ៣១,៧ ភាគរយធៀបនឹងរយៈពេលដូចគ្នាកាលពីឆ្នាំមុន ខណៈភ្ញៀវវៀតណាម ឈរលំដាប់លេខ ២ ដោយមានចំនួន ១២៤ ២៦៦ នាក់៕ LA