.jpg)
កម្ពុជារក្សាទុកមាស ៣៦,៥ តោន ជាទុនបម្រុងអន្តរជាតិ។ រូបថត AFP
ភ្នំពេញៈ លោកនាយករដ្ឋមន្ត្រី ហ៊ុន សែន បានថ្លែងអះអាងថា គិតមកទល់នឹងបច្ចុប្បន្ននេះកម្ពុជាបានរក្សាមាសដែលជាទុនបម្រុងអន្តរជាតិចំនួន ៣៦,៥ តោនដែលនេះគឺជាការឆ្លើយតបទៅនឹងការរិះគន់ដែលថា មាសនេះត្រូវបានគេយកមកទុកជាកម្មសិទ្ធិផ្ទាល់ខ្លួនអំឡុងពេលនៃការរីករាលដាលនៃជំងឺកូវីដ ១៩ នេះ។
លោកនាយករដ្ឋមន្ត្រី ហ៊ុន សែន បានសរសេរឆ្លើយតបនៅលើទំព័រហ្វេសប៊ុកផ្លូវការកាលពីថ្ងៃព្រហស្បតិ៍ដោយភ្ជាប់ជាមួយនឹងសេចក្តីប្រកាសព័ត៌មានរបស់ធនាគារជាតិនៃកម្ពុជាអំពីចំនួនមាសនេះ ដើម្បីជាការឆ្លើយតបនៅនឹងការរិះគន់នេះ។
លោកនាយករដ្ឋមន្ត្រីបានសរសេរយ៉ាងដូច្នេះថា៖ «មួយរយៈពេលចុងក្រោយនេះមានបងប្អូនយើងមួយចំនួនចង់ដឹងអំពីមាសដែលជាទុនបម្រុងរបស់ជាតិ។ ការចង់ដឹងរបស់បងប្អូនមួយចំនួនធំមានភាពសុចរិតពីព្រោះវាជារបស់ជាតិតែនៅមានជនអាក្រក់មួយចំនួនតូចបាននិងកំពុងប្រើប្រាស់ការបាត់បង់ដំណឹងអំពីមាសដើម្បីវាយប្រហាររាជរដ្ឋាភិបាលថា ចង់បន្លំយកមាសក្នុងពេលមានជំងឺឆ្លងកូវីដ-១៩ ព្រោះមិនដែលឮលោក ហ៊ុន សែន និយាយពីមាសនេះទៀតទេ»។
«ដើម្បីច្បាស់ពីមាសសូមមើលការពន្យល់របស់ធនាគារជាតិនៃកម្ពុជានោះបងប្អូនប្រាកដជាយល់ និងអបអរសាទរជាមួយទុនបម្រុងរបស់ជាតិយើងដែលកើនឡើងជាលំដាប់។ ប្រហែលមួយឆ្នាំមុនខ្ញុំធ្លាប់ប្រកាសថាមាសរបស់យើងមាន ៣០ តោនតែតាមតួលេខថ្មីនេះមាសរបស់យើងមានដល់ ៣៦,៥ តោន។ នេះមិនមែនជាមារយាទស្រីកញ្ជើធ្លុះក្នុងការគ្រប់គ្រងសេដ្ឋកិច្ចជាតិនោះទេ» នេះជាការបញ្ជាក់ពីលោកនាយករដ្ឋមន្ត្រី។
លោក Alejandro Gonzalez-Davidson ស្ថាបនិកនៃអង្គការមាតាធម្មជាតិបានសរសេរលើទំព័រហ្វេសប៊ុកផ្ទាល់ខ្លួនកាលពីថ្ងៃពុធស្នើឲ្យសាធារណជនជួយចែករំលែកនូវសាររបស់ខ្លួនដោយចង់ដឹងអំពីតួលេខមាសពិតប្រាកដដែលកម្ពុជាមានដោយបានលើកឡើងនូវសម្តីរបស់លោកនាយករដ្ឋមន្ត្រី ហ៊ុន សែន ធ្លាប់មានប្រសាសន៍កាលពីខែតុលា ឆ្នាំ ២០១៩ ថា កម្ពុជាបានរក្សាមាសបម្រុងចំនួន ៣០ តោន តែគ្មានឯកសារបញ្ជាក់ច្បាស់លាស់នោះឡើយ។
លោកបានសរសេរថា៖ «សម្ដេចជាទីស្រឡាញ់របស់យើងបានមានប្រសាសន៍កាលពីខែតុលា ឆ្នាំ ២០១៩ ថា៖ «បច្ចុប្បន្នកម្ពុជាមានមាស ៣០ តោន។ ក្នុងនោះ ១២ តោនតម្កល់នៅប្រទេសស្វ៊ីស ១៥ តោនតម្កល់នៅអង់គ្លេស និង ៣ តោន តម្កល់នៅធនាគារជាតិនៃកម្ពុជា។
ខ្ញុំជឿថា យើងគ្រប់គ្នាពិតជាសប្បាយចិត្តពេលឮព័ត៌មានមួយនេះ ជាពិសេសនៅពេលដែលជំងឺកូវីដដ៏កាចសាហាវកំពុងតែធ្វើឲ្យប៉ះពាល់មកដល់សេដ្ឋកិច្ចកម្ពុជា និងទូទាំងពិភពលោកយ៉ាងធ្ងន់ធ្ងរ ហើយរដ្ឋអាចនឹងខ្វះខាតលុយក្នុងពេលដ៏ខ្លីខាងមុខ»។
លោកថា កម្ពុជាមិនបានរាយការណ៍ទៅស្ថាប័នអន្តរជាតិ (រួមទាំង មូលនិធិរូបិយវត្ថុអន្តរជាតិ ឬហៅថា IMF) ថា ខ្លួនមានមាស ៣០ តោននោះទេ ប៉ុន្ដែផ្ទុយទៅវិញបានរាយការណ៍ថា មានត្រឹមតែ ១២,៤ តោនដោយអះអាងថា តួលេខនេះគឺវាខុសគ្នារហូតទៅដល់ ១៧,៥ តោនដែលតម្លៃប្រហាក់ប្រហែល ១ ពាន់លានដុល្លារ។
យោងតាមសេចក្តីបញ្ជាក់ពីធនាគារជាតិនៃកម្ពុជាចេញផ្សាយកាលពីថ្ងៃម្សិលមិញបច្ចុប្បន្នទុនបម្រុងអន្តរជាតិ (រួមមានរូបិយប័ណ្ណបរទេស និងមាស) របស់កម្ពុជាគិតជាដុល្លារអាមេរិកចំនួន ១៩,៥ ប៊ីលានគិតត្រឹមចុងខែមិថុនា ឆ្នាំ ២០២០។ ធនាគារជាតិវិនិយោគលើឧបករណ៍ដែលមានស្ថិរភាពខ្ពស់ដូចជារូបិយប័ណ្ណខ្លាំង និងមាស។
បច្ចុប្បន្នធនាគារជាតិនៃកម្ពុជារក្សាមាស ៣៦,៥ តោនដែលក្នុងនោះរួមមាន៖ មាសដែលជាកេរមរតកតាំងពីមុនសម័យសង្គ្រាមមានចំនួន ១២,៤ តោន ដែលកំពុងរក្សាទុកនៅប្រទេសស្វ៊ីស។ មាសចំនួន ១៤,១ តោនកំពុងវិនិយោគនៅធនាគារកណ្តាលអង់គ្លេស និងមាសចំនួន ១០ តោនត្រូវបានរក្សាទុកនៅកម្ពុជា។
«ធនាគារជាតិនៃកម្ពុជាមានកាតព្វកិច្ចរាយការណ៍ជាទៀងទាត់នូវរាល់តួលេខនៃទុនបម្រុងអន្តរជាតិនេះដល់ស្ថាប័នមានសមត្ថកិច្ចជាតិ និងអន្តរជាតិ» នេះបើយោងតាមសេចក្តីបញ្ជាក់របស់ធនាគារជាតិ៕
