ភ្នំពេញៈ ធនាគារជាតិនៃកម្ពុជាបានឱ្យដឹងថា កម្ពុជារក្សាបានកម្រិតអតិផរណាទាបប្រមាណ ៣ ភាគរយប៉ុណ្ណោះ ក្នុងរយៈពេលជាង ៨ ខែដើមឆ្នាំនេះ បើទោះបីជាសេដ្ឋកិច្ចបាននិងកំពុងញាំញី ដោយសារការរីករាលដាលនៃជំងឺកូវីដ ១៩ ក៏ដោយ។
លោក ជា ចាន់តូ ទេសាភិបាលធនាគារជាតិនៃកម្ពុជាបានថ្លែងប្រាប់លោក Yasuhisa Ojima តំណាងមូលនិធិរូបិយវត្ថុអន្តរជាតិ (IMF) ប្រចាំប្រទេសកម្ពុជាអំពីស្ថានភាពម៉ាក្រូសេដ្ឋកិច្ច និងវិស័យធនាគារកម្ពុជាក្នុងរយៈពេល ៨ ខែដើមឆ្នាំ ២០២០ នេះដោយអតិផរណាបន្តរក្សាបានក្នុងកម្រិតទាបប្រមាណ ៣% ជាមួយនឹងស្ថិរភាពល្អនៃអត្រាប្តូរប្រាក់ ខណៈដែលទុនបម្រុងអន្តរជាតិបន្តកើនឡើង និងមានកម្រិតស្មើនឹង ១០ ខែនៃការនាំចូលទំនិញ និងសេវា។
លោកបានថ្លែងយ៉ាងដូច្នេះថា៖ «ប្រព័ន្ធធនាគារមានភាពរឹងមាំ និងបានរួមចំណែកយ៉ាងសកម្មក្នុងការគាំទ្រសកម្មភាពសេដ្ឋកិច្ច និងជួយបន្ធូរបន្ថយការលំបាករបស់វិស័យនានា និងប្រជាជនដែលទទួលរងផលប៉ះពាល់ពីឥទ្ធិពលនៃការរីករាលដាលពីជំងឺកូវីដ ១៩ ស្របតាមគោលនយោបាយរបស់រាជរដ្ឋាភិបាល»។
លោក Yasuhisa Ojima បានអបអរសាទរចំពោះប្រសិទ្ធភាពនៃការបង្ការការឆ្លងជំងឺកូវីដ ១៩ នៅកម្ពុជារបស់រាជរដ្ឋាភិបាល។ តំណាងឱ្យ IMF លោកក៏បានគាំទ្រគោលនយោបាយរបស់រាជរដ្ឋាភិបាល និងធនាគារជាតិនៃកម្ពុជាក្នុងការគាំទ្រសកម្មភាពសេដ្ឋកិច្ចក្នុងដំណាក់កាលនេះ ស្របពេលដែលប្រទេសនានាលើពិភពលោកកំពុងប្រឈមនឹងការធ្លាក់ចុះសេដ្ឋកិច្ច និងការរីករាលដាលនៃជំងឺកូវីដ ១៩។
លោកថា៖ «IMF ក៏បានត្រៀមខ្លួនសហការ និងផ្តល់ជាអនុសាសន៍ក្នុងដំណើរការស្តារកំណើនសេដ្ឋកិច្ចរបស់កម្ពុជាដែលកំពុងតែងើបឡើងវិញជាលំដាប់»។
គួររំឭកផងដែរថា រាជរដ្ឋាភិបាលកម្ពុជាបានដាក់ចេញនូវវិធានការស្តារ និងស្រោចស្រង់សេដ្ឋកិច្ច និងសុខុមាលភាពសង្គមចំនួន ៥ លើកមក ហើយដែលស្មើនឹងកញ្ចប់ថវិកាប្រមាណជា ២ ពាន់លានដុល្លារ។
ធនាគារអភិវឌ្ឍន៍អាស៊ី (ADB) បានព្យាករពីការធ្លាក់ចុះនៃផលិតផលក្នុងស្រុកសរុបក្នុងឆ្នាំ ២០២០ ក្នុងរង្វង់ដក ៤,០ ភាគរយធៀបនឹងដក ៥,៥ ភាគរយ នៃការព្យាករកាលពីខែមិថុនា កន្លងមកដោយផ្អែកលើភាពប្រសើរជាងមុននៃផលិតកម្មវិស័យកសិកម្ម និងការកើនឡើងនៃការនាំចេញផលិតផលមិនមែនសម្លៀកបំពាក់ដូចជាកង់ និងគ្រឿងអេឡិចត្រូនិក។
លោកស្រី Sunniya Durrani-Jamal នាយិកាប្រចាំប្រទេសកម្ពុជារបស់ ADB បានឱ្យដឹងថា ជំងឺរាតត្បាតបណ្ដាលមកពីវីរុសកូរ៉ូណាជាបញ្ហាប្រឈមពិភពលោកដែលមិនធ្លាប់មានពីមុនមក ប៉ុន្តែជាសំណាងល្អប្រទេសកម្ពុជាមិនមានវិបត្តិផ្នែកសុខាភិបាលនោះទេ។
លោកស្រីថ្លែងថា៖ «យើងរំពឹងថាកំណើនសេដ្ឋកិច្ចកម្ពុជានឹងស្ទុះងើបឡើងវិញដល់ ៥,៩ ភាគរយ ក្នុងឆ្នាំ ២០២១ ដោយសារតែកម្លាំងជំរុញនៃគោលយោបាយគាំទ្ររបស់រដ្ឋាភិបាល ដើម្បីជួយដល់ជនក្រីក្រ និងការគាំទ្រផ្នែកហិរញ្ញប្បទានដល់សហគ្រាសធុនតូច និងមធ្យម»។
លោកស្រីបានថ្លែងបន្តទៀតថា៖ «វិធានការទាំងនេះរួមជាមួយនឹងការកែទម្រង់រចនាសម្ព័ន្ធដែលចាំបាច់ និងកាត់បន្ថយផលប៉ះពាល់ដោយផ្ទាល់ និងប្រយោលនៃកូវីដ ១៩ ទៅលើគ្រួសារ និងអាជីវកម្មនានា ហើយនឹងជួយឱ្យសេដ្ឋកិច្ចកម្ពុជាស្ទុះងើបឡើងខ្លាំងជាងមុន បន្ទាប់ពីកូវីដ ១៩»៕