.jpg)
កិច្ចប្រជុំតុមូលក៏មានការចូលរួមដោយ អង្គការស្បៀង និងកសិកម្មនៃសហប្រជាជាតិ (FAO) អគ្គលេខាធិការអាស៊ាន និងអង្គការជាតិ និងអន្តរជាតិមួយចំនួនទៀតស្តីពីប្រព័ន្ធស្បៀងឆ្នាំ ២០៣០ ក្រោមប្រធានបទ (Building Back Better) ក្នុងតំបន់អាស៊ីប៉ាស៊ីហ្វិក។ រូបភាព ហ្វេសប៊ុកផេក Sakhon Veng
ភ្នំពេញៈ រដ្ឋាភិបាលកម្ពុជាតាមរយៈក្រសួងកសិកម្ម រុក្ខាប្រមាញ់ និងនេសាទ បានបន្តប្តេជ្ញាជំរុញពិពិធកម្មកសិកម្ម ដើម្បីឆ្លើយតបនឹងការប្រយុទ្ធប្រឆាំងជំងឺកូវីដ១៩ក្នុងគោលដៅរក្សាលំនឹងជីវភាព និងធុរកិច្ចអាចបន្តរស់រានបានក្នុងអំឡុងវិបត្តិសុខភាពនេះ។
ការប្តេជ្ញានេះត្រូវបានធ្វើឡើងនៅក្នុងកិច្ចប្រជុំតុមូលកម្រិតរដ្ឋមន្ត្រីក្រសួងកសិកម្មនៃប្រទេសឥណ្ឌូនេស៊ី ឡាវ ម៉ាឡេស៊ី ម៉ុងហ្គោលី ប៉ាពូញូហ្គីនេ ហ្វីលីពីន វៀតណាម និងទីម័រខាងកើតកាលពីថ្ងៃទី ២៣ មេសារៀបចំដោយធនាគារពិភពលោកដែលសម្របសម្រួលដោយលោកស្រី Mari Pangestu នាយកប្រតិបត្តិនៃធនាគារពិភពលោក។
កិច្ចប្រជុំតុមូលក៏មានការចូលរួមដោយ អង្គការស្បៀង និងកសិកម្មនៃសហប្រជាជាតិ (FAO) អគ្គលេខាធិការអាស៊ាន និងអង្គការជាតិ និងអន្តរជាតិមួយចំនួនទៀតស្តីពីប្រព័ន្ធស្បៀងឆ្នាំ ២០៣០ ក្រោមប្រធានបទ (Building Back Better) ក្នុងតំបន់អាស៊ីប៉ាស៊ីហ្វិក។
កិច្ចប្រជុំនេះធ្វើឡើងក្នុងគោលបំណងសំខាន់ ដើម្បីពិភាក្សាលើបញ្ហានានា និងស្វែងរកជម្រើស និងសកម្មភាពជាអាទិភាពក្នុងការធានាឲ្យបាននូវនិរន្តរភាពនៃសន្តិសុខស្បៀងអាហារ និងអាហារូបត្ថម្ភនៅក្នុងតំបន់អាស៊ីប៉ាស៊ីហ្វិក។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលដឹកនាំសហការីបានចូលរួមកិច្ចប្រជុំតុមូលនេះបានថ្លែងសុន្ទរកថាគន្លឹះថា រដ្ឋាភិបាលកម្ពុជាបានដាក់ចេញផែនការ និងគោលនយោបាយរួចហើយ ដើម្បីឆ្លើយតបនឹងការប្រយុទ្ធប្រឆាំងជំងឺកូវីដ១៩ក្នុងគោលដៅរក្សាលំនឹងជីវភាពរស់នៅប្រចាំថ្ងៃ ព្រមទាំងខិតខំជួយឱ្យអស់លទ្ធភាព ដើម្បីធ្វើឱ្យធុរកិច្ច និងអាជីវកម្មអាចរស់បានក្នុងអំឡុងពេលនេះ។
លោកថ្លែងថា៖ «ឆ្លើយតបទៅនឹងទិសដៅនេះ រាជរដ្ឋាភិបាលកម្ពុជាបានដាក់ឱ្យអនុវត្តកម្មវិធីសាច់ប្រាក់ពលកម្មសម្រាប់អភិវឌ្ឍន៍ហេដ្ឋារចនាសម្ព័ន្ធជនបទ ដើម្បីដោះស្រាយការងារធ្វើដល់អ្នកបាត់បង់ការងារកម្មវិធីផ្តល់ប្រាក់ឧបត្ថម្ភសម្រាប់កម្មករ និយោជិត និងគ្រួសារក្រីក្រ»។
លោកថ្លែងទៀតថា៖ «រដ្ឋាភិបាលក៏ជួយរកការងារធ្វើឱ្យកម្មករតាមរយៈទីភ្នាក់ងារជាតិមុខរបរ និងការងារ កម្មវិធីផ្តល់ប្រាក់កម្ចីការប្រាក់ទាបដល់សហគ្រាសធុនតូច និងមធ្យម និងការផ្តល់ធនធានបន្ថែមសម្រាប់ការបង្កើនផលិតកម្មស្បៀង និងការលើកលែងពន្ធមួយចំនួនទៀត»។
លោករដ្ឋមន្ត្រីឲ្យដឹងថា ទន្ទឹមនឹងនេះក្រសួងកសិកម្មបាននិងកំពុងអនុវត្តគម្រោងឆ្លើយតបបន្ទាន់ទៅនឹងជំងឺកូវីត១៩ ស្ថិតនៅក្រោមក្របខ័ណ្ឌគម្រោងពិពិធកម្មកសិកម្មកម្ពុជា ដែលគាំទ្រហិរញ្ញប្បទានសហប្រតិបត្តិការពីធនាគារពិភពលោក។
លោកមានប្រសាសន៍ថា៖ «កម្ពុជានៅមានបញ្ហាប្រឈមមួយចំនួនក្នុងការអភិវឌ្ឍវិស័យកសិកម្ម ពិសេសគឺផលិតភាពកសិកម្មនៅមានកម្រិតទាប និងការប្រកួតប្រជែងទីផ្សារនៃផលិតផលកសិកម្មនៅពុំទាន់ដោះស្រាយបានល្អប្រសើរ ដែលនេះជាហេតុធ្វើឱ្យកសិករកម្ពុជាមានការលំបាក»។
លោករដ្ឋមន្ត្រីបន្ថែមថា ទោះជាយ៉ាងណាក្នុងបរិកាណ៍នៃការឆ្លងរាលដាលជំងឺកូវីដ១៩ ក្រសួងបានផ្តោតលើការងារសំខាន់ៗមួយចំនួនទៀតដែលជាការឆ្លើយតបទៅនឹងបញ្ហាប្រឈមទាំងនេះរួមមានជំរុញការអភិវឌ្ឍដំណាំស្រូវ ដំណាំសាកវប្បកម្ម និងដំណាំឧស្សាហកម្ម ដោយលើកកម្ពស់ផលិតភាព គុណភាព និងសុវត្ថិភាព ដើម្បីផ្គត់ផ្គង់តម្រូវការប្រើប្រាស់ និងទីផ្សារក្នុងស្រុក។
លោកនិយាយថា៖ «ក្រសួងបានរៀបចំកសាងគម្រោងផែនការផលិតកម្មស្បៀង ស្របតាមផែនការមេវិស័យកសិកម្មឆ្នាំ ២០៣០ និងជំរុញការអនុវត្តផែនការសកម្មភាពនេះ ដើម្បីបង្កើនផលិតកម្មស្បៀងអាហារ (បន្លែ ផ្លែឈើ ត្រី សាច់) សម្រាប់ផ្គត់ផ្គង់សេចក្តីត្រូវការហូបចុកក្នុងប្រទេសឱ្យបានគ្រប់គ្រាន់ក្នុងបរិការណ៍ជំងឺកូវីដ១៩នេះ»៕
