ភ្នំពេញៈ កម្ពុជានឹងរៀបចំវេទិកា ឌីជីថលកម្ពុជាលើកទី ២ ឆ្នាំ ២០២០ ស្ថិតក្រោមប្រធានបទ «ទេពកោសល្យនៃឌីជីថល» នៅខែមីនាឆ្នាំក្រោយក្នុងកិច្ចខិតខំប្រឹងប្រែងកសាងសមត្ថភាពធនធានមនុស្សដើម្បីសម្រេចបានផែនការសេដ្ឋកិច្ចឌីជីថលរបស់រដ្ឋាភិបាលត្រឹមឆ្នាំ ២០២៥។
លោក កាន ច័ន្ទមេតា រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានលើកឡើងនៅក្នុងសន្និសីទកាលពីថ្ងៃពុធថា ការរៀបចំ វេទិកា ឌីជីថលកម្ពុជាលើកទី ២ ឆ្នាំ ២០២០ នឹងធ្វើឡើងចាប់ពីថ្ងៃទី ២០ ដល់ថ្ងៃទី ២៣ មីនា ឆ្នាំ ២០២០ ដែលហៅថា DC 2020។ កម្ពុជាបានរៀបចំវេទិកានេះម្តងហើយកាលពីដើមឆ្នាំនេះដែលបានប្រមូលធាតុចូល និងអនុសាសន៍ពីវិស័យសំខាន់ ស្ថាប័នរដ្ឋាភិបាល និងពីអ្នកជំនាញនៅក្នុងតំបន់។
លោកបន្តថាចាប់តាំងពីរដ្ឋាភិបាលបានកំណត់ទិសដៅក្នុងការប្រែក្លាយជារដ្ឋាភិបាលសេដ្ឋកិច្ចឌីជីថលសម្រាប់កំណើនថ្មីមកមានតម្រូវការធាតុចូលជាច្រើនពីភាគីពាក់ព័ន្ធដើម្បីដាក់បញ្ចូលទៅក្នុងគោលនយោបាយ និងទិសដៅបង្ហាញផ្លូវសម្រាប់ការអនុវត្ត និងបង្កើនសមត្ថភាពធនធានមនុស្ស។
លោកថ្លែងថា៖ «តាមរយៈព្រឹត្តិការណ៍ វានឹងជំរុញយុវជនឲ្យផ្តោតលើបច្ចេកវិទ្យាឌីជីថលដែលជំរុញដល់ការអភិវឌ្ឍសេដ្ឋកិច្ចឌីជីថលរបស់កម្ពុជា»។ លោកបានបន្តថា នៅក្នុងព្រឹត្តិការណ៍នេះនឹងមានការចូលរួមពីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងអ្នកជំនាញក្នុងតំបន់ដែលវិស័យឯកជនអាចសន្ទនាដោយផ្ទាល់ជាមួយរដ្ឋមន្ត្រី និងវិស័យឯកជនជាច្រើនពីក្នុងតំបន់។
វេទិកាឌីជីថលលើទី ១ ត្រូវបានធ្វើឡើងកាលពីខែមីនា ឆ្នាំ ២០១៩ ដែលមានការប្រមូលផ្តុំក្រុមហ៊ុនបច្ចេកវិទ្យា និងអាជីវកម្មបង្កើតថ្មីជាង ១០០ ទូទាំងប្រទេស និងតំបន់។
កាលពីខែតុលា រដ្ឋាភិបាលបានបង្កើតគណៈកម្មាធិការអន្តរក្រសួងមួយ ដើម្បីធ្វើការចងក្រងសេចក្តីព្រាងក្របខ័ណ្ឌស្តីពីសេដ្ឋកិច្ចឌីជីថល និងគោលនយោបាយរដ្ឋាភិបាលឌីជីថលបន្ទាប់ពីលោកនាយករដ្ឋមន្ត្រី ហ៊ុន សែន កាលពីខែមីនាបានប្រកាសផ្តល់ថវិកា ៥ លានដុល្លារក្នុងមួយឆ្នាំ ដើម្បីគាំទ្រដល់ការបង្កើតអាជីវកម្មថ្មីទាក់ទងនឹងហិរញ្ញវត្ថុ បច្ចេកវិទ្យា ជំនាញទីផ្សារ ផលិតកម្ម និងការបណ្តុះបណ្តាល។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោក អូន ព័ន្ធមុនីរ័ត្ន ធ្លាប់បានលើកឡើងក្នុងសិក្ខាសាលាថ្នាក់ជាតិស្តីពី «គោលនយោបាយ និងទិសដៅនៃសេដ្ឋកិច្ចឌីជីថលកម្ពុជា» កាលពីខែមីនាថា កម្ពុជាអាចត្រូវការរយៈពេលយ៉ាងហោចណាស់ ១០ ឆ្នាំ ដើម្បីអាចប្រែក្លាយកំណើនសេដ្ឋកិច្ចកម្ពុជាដោយផ្អែកលើបច្ចេកវិទ្យាព័ត៌មាន។
លោកបានលើកឡើងថា សេដ្ឋកិច្ចឌីជីថលនៅកម្ពុជាកំពុងលេចរូបរាងជាបណ្ដើរៗស្របពេលដែលមានការបង្កើតសកម្មភាពអាជីវកម្មថ្មីៗ ដូចជាការប្រើប្រាស់ការទូទាត់ឌីជីថល ការកើនឡើងនូវសកម្មភាពការកម្សាន្តអនឡាញ សកម្មភាពពាណិជ្ជកម្មអេឡិចត្រូនិកជាដើមស្របពេលចំនួនអ្នកប្រើប្រាស់កំពុងកើនឡើង និងកំពុងសម្របខ្លួនទៅនឹងការប្រើប្រាស់បច្ចេកវិទ្យាទាំងនោះ៕