.jpg)
រថយន្តដឹកកុងតឺន័រដែលទើបស្ទូចចេញពីកប៉ាល់នៅកំពង់ផៃស្វយ័តក្រុងព្រះសីហនុ។ រូបថត ហ៊ឹន ពិសី
ភ្នំពេញ: កម្ពុជារំពឹងថានឹងទទួលបានជំនាញបន្ថែមក្នុងការគ្រប់គ្រង និងអភិវឌ្ឍហេដ្ឋារចនាសម្ព័ន្ធតាមផ្លូវទឹក និងកំពង់ផែ បន្ទាប់ពីចូលជាសមាជិកក្នុងសមាគមពិភពលោកសម្រាប់ហេដ្ឋារចនាសម្ព័ន្ធដឹកជញ្ជូនតាមផ្លូវទឹកហៅកាត់ថា (PIANC)។ នេះបើតាមរដ្ឋលេខាធិការក្រសួងសាធារណៈការ និងដឹកជញ្ជូន។
ការលើកឡើងនេះធ្វើឡើងក្នុងសិក្ខាសាលាស្តីពី PIANC ជាលើកដំបូងនៅកម្ពុជាក្រោមប្រធានបទការអភិវឌ្ឍហេដ្ឋារចនាសម្ព័ន្ធផ្លូវទឹកកាលពីថ្ងៃម្សិលមិញ។ សិក្ខាសាលានេះប្រព្រឹត្តទៅរយៈពេល ២ ថ្ងៃ ចាប់ពីថ្ងៃទី ២៤ ដល់ ២៥ ខែ តុលា ឆ្នាំ ២០១៩។
PIANC ជាសមាគមអន្តរជាតិមួយត្រូវបានទទួលស្គាល់ជាសកលសម្រាប់ហេដ្ឋារចនាសម្ព័ន្ធដឹកជញ្ជូនតាមផ្លូវទឹកលើការងារលើកកម្ពស់ការថែរក្សា និងការអភិវឌ្ឍហេដ្ឋារចនាសម្ព័ន្ធផ្លូវទឹក និងការកសាងកំពង់ផែ។
បច្ចុប្បន្ន PIANC មានសមាជិក ៦៥ ប្រទេសនៅជុំវិញពិភពលោកក្នុងនោះប្រទេសចំនួន ៣៨ ជាសមាជិកដែលមានលក្ខណសម្បត្តិគ្រប់គ្រាន់ រួមទាំងកម្ពុជាផងដែរ។
លោក អៀង វ៉េងស៊ុន រដ្ឋលេខាធិការក្រសួងសាធារណការ និងដឹកជញ្ជូន បានថ្លែងក្នុងសិក្ខាសាលានេះថា ការដឹកជញ្ជូនតាមផ្លូវទឹកបានដើរតួនាទីយ៉ាងសំខាន់សម្រាប់ជំរុញកំណើនសេដ្ឋកិច្ចរបស់កម្ពុជា។ លោកបន្តថា ឆ្លើយតបនឹងតម្រូវការខ្ពស់ក្នុងការប្រើប្រាស់ក្នុងស្រុក វិស័យដឹកជញ្ជូនតាមផ្លូវទឹក និងកំពង់ផែចាំបាច់ត្រូវបង្កើតឡើងទៅតាមស្តង់ដាបច្ចេកទេសអន្តរជាតិ។
លោកថ្លែងថា៖ «យើងសង្ឃឹមថា សិក្ខាសាលានេះនឹងជួយជំរុញឲ្យសហគមន៍កំពង់ផែកម្ពុជាចូលរួមគាំទ្រ និងសម្រួលដល់លំហូរទំនិញក្នុងពាណិជ្ជកម្មអន្តរជាតិ និងក្នុងស្រុក»។
កម្ពុជាត្រូវបានទទួលស្គាល់ជាសមាជិកដែលមានលក្ខណៈគ្រប់គ្រាន់របស់ PIANC នៅខែកញ្ញា ឆ្នាំ ២០១៨។ នេះបើយោងតាមលោក អៀង វ៉េងស៊ុន។ លោកបានថ្លែងឲ្យដឹងថា៖ «ការចូលរួមជាមួយ PIANC នឹងជួយបង្កើនជំនាញក្នុងការគ្រប់គ្រង និងអភិវឌ្ឍហេដ្ឋារចនាសម្ព័ន្ធកំពង់ផែ និងផ្លូវទឹកនៅកម្ពុជា សម្រាប់ការតភ្ជាប់ជាមួយកំពង់ផែ និងសហគមន៍ដឹកជញ្ជូនទូទាំងពិភពលោក»។
លោក Hiroshi Hayashida អនុប្រធាន PIANC និងប្រធាន PIANC-Japan បានថ្លែងក្នុងសិក្ខាសាលានេះថា បេសកកម្មរបស់ PIANC នៅថ្ងៃនេះ ដើម្បីផ្តល់នូវជំនាញបច្ចេកទេស និងការតម្រង់ទិសដោយអ្នកជំនាញអន្តរជាតិល្អបំផុតព្រមទាំងវិស័យរដ្ឋ និងឯកជនលើបញ្ហាបច្ចេកទេស សេដ្ឋកិច្ច បរិស្ថាន ដែលទាក់ទងនឹងហេដ្ឋារចនាសម្ព័ន្ធដឹកជញ្ជូនតាមផ្លូវទឹក។
លោកថ្លែងថា៖ «យើងចង់ពង្រឹងកិច្ចសហប្រតិបត្តិការទៅវិញទៅមកជាមួយមិត្តកម្ពុជារួមទាំងជាមួយសមាគម PIANC។ សិក្ខាសាលាថ្ងៃនេះជានិមិត្តរូបនៃការចាប់ផ្តើមកិច្ចសហប្រតិបត្តិការរវាង PIANC ជាមួយកម្ពុជាឡើងវិញ»។
លោក Hayashida បន្តថាកម្ពុជាចាំបាច់ត្រូវធ្វើការពង្រឹងលើការគ្រប់គ្រង និងការអភិវឌ្ឍបច្ចេកវិទ្យាក្នុងវិស័យដឹកជញ្ជូនតាមផ្លូវទឹកនេះបន្ថែមទៀត។ លោកថ្លែងថា៖ «រដ្ឋាភិបាលជប៉ុនបានជួយអភិវឌ្ឍកំពង់ផែ ក្រុងព្រះសីហនុ ការអភិវឌ្ឍបច្ចេកវិទ្យាថ្មី ដើម្បីបម្រើក្នុងសេវាក្នុងវិស័យនេះ និងចំណេះដឹងផ្នែកប្រតិបត្តិការ និងគ្រប់គ្រង»។
លោក ស៊ិន ចន្ធី ប្រធានសមាគមដឹកជញ្ជូនទំនិញកម្ពុជាបានឲ្យដឹងថា វិស័យដឹកជញ្ជូនតាមផ្លូវសមុទ្រកម្ពុជានៅមានបញ្ហាប្រឈមដោយមិនអាចទាក់ទាញកប៉ាល់ធំៗបានទេ ខណៈសេវាដឹកជញ្ជូនតាមផ្លូវសមុទ្រមានតម្លៃខ្ពស់ជាងប្រទេសវៀតណាម និងថៃ។ លោកថ្លែងថា៖ «ខ្ញុំឃើញថា មានកប៉ាល់តូចៗ ដឹកទំនិញកាត់តាមកំពង់ផែកម្ពុជា យើងមិនមានកប៉ាល់ធំៗទេ»។
លោកបន្តថា រដ្ឋាភិបាលគួរជំរុញឲ្យមានការដឹកជញ្ជូនទំនិញតាមផ្លូវទឹក ជាជាងតាមផ្លូវគោកដែលត្រូវចំណាយខ្ពស់ និងធ្វើឲ្យខូចផ្លូវថែមទៀតផង។ លោកបន្តថា៖ «ការដឹកជញ្ជូនតាមផ្លូវទឹកសាបនៅមិនទាន់មានហេដ្ឋារចនាសម្ព័ន្ធល្អប្រសើរនោះទេ»។
លោក ចាន់ ដារ៉ា អនុរដ្ឋលេខាធិការក្រសួងសាធារណៈការ និងដឹកជញ្ជូនបានឲ្យដឹងថា បច្ចុប្បន្នរដ្ឋាភិបាលកំពុងយកចិត្តទុកដាក់អភិវឌ្ឍក្នុងវិស័យដឹកជញ្ជូន។
លោកថ្លែងថា៖ «ព្រោះយើងមិនចង់ផ្លូវទឹកយើងស្ងាត់ គ្មានសកម្មភាពទេ សកម្មភាពដឹកជញ្ជូនតាមផ្លូវទឹកជាសកម្មភាពដែលនឹងជំរុញសេដ្ឋកិច្ចរបស់កម្ពុជា វានឹងធ្វើឲ្យមានចំណូលដល់ប្រជាពលរដ្ឋ និងរួមចំណែកកាត់បន្ថយភាពក្រីក្រនៅកម្ពុជា»៕ LA
