ភ្នំពេញ៖ វិស័យឯកជនមានសុទិដ្ឋនិយមថា ដំណាំកសិ-ឧស្សាហកម្មស្វាយនឹងក្លាយជាផលិតផលមានសក្តានុពលទីផ្សារនាំចេញអន្តរជាតិ បន្ទាប់ពីដំណាំចេកអំបូង។
ការបង្ហាញសុទិដ្ឋនិយមនេះ បន្ទាប់ពីកម្ពុជា និងចិនបានរួមគ្នាសម្ពោធជាផ្លូវការនៃការនាំចេញផ្លែស្វាយស្រស់ទៅកាន់ទីផ្សារប្រទេសចិន ជាលើកដំបូងកាលពីថ្ងៃទី ៧ ឧសភា នៅទីក្រុងភ្នំពេញ។
ការនាំចេញផ្លូវការនេះ បន្ទាប់ពីរដ្ឋបាលគយចិនកាលពីថ្ងៃទី ២៦ ខែមេសា ឆ្នាំនេះ បានអនុម័តទទួលស្គាល់ជាផ្លូវការបញ្ជីឈ្មោះចម្ការស្វាយចំនួន ៣៧ និងរោងចក្រវេចខ្ចប់ចំនួន ៥ អាចនាំចេញផ្លែស្វាយស្រស់ទៅកាន់ប្រទេសចិន។
លោក ហ៊ុន ឡាក់ អគ្គនាយកក្រុមហ៊ុន រីចហ្វាម អេស៊ា ឯក.(Richfarm Asia Co.,Ltd) ដែលវិនិយោគលើដំណាំស្វាយកែវរមៀតនៅខេត្តកំពង់ស្ពឺ ជឿជាក់ថា ផ្លែស្វាយកម្ពុជានឹងក្លាយជាដំណាំកសិ-ឧស្សាហកម្មមួយមានសក្តានុពលទីផ្សារ បន្ទាប់ពីដំណាំចេក ក្រោយពីកម្ពុជាអាចនាំចេញផ្លែស្វាយស្រស់ដោយផ្ទាល់ទៅទីផ្សារចិន។
លោក ហ៊ុន ឡាក់ ប្រាប់ ភ្នំពេញ ប៉ុស្តិ៍ថា៖ «ខ្ញុំគិតថា នៅពេលអនាគតដំណាំស្វាយនឹងក្លាយជាដំណាំដែលមានសក្តានុពលសម្រាប់នាំចេញ ដូចនឹងដំណាំចេកដែរ ព្រោះដំណាំស្វាយបាននិងកំពុងដាំដុះច្រើនដែលផ្ទៃដីប្រមូលប្រមាណ ១០ ម៉ឺនហិកតា ហើយផ្តល់ទិន្នផលបានជាង ១ លានតោន ក្នុង ១ រដូវ ដូច្នេះអ្វីដែលយើងត្រូវធ្វើ គឺពង្រឹងគុណភាពដើម្បីឆ្លើយតបនឹងតម្រូវការទីផ្សារ។ ការវិនិយោគលើរោងចក្រវេចខ្ចប់ក៏នឹងកើនឡើងនាពេលខាងមុខផងដែរ»។
លោកឲ្យដឹងទៀតថា សព្វថ្ងៃមានរោងចក្រប្រព្រឹត្តិកម្មកម្ចាត់ពងរុយចោះផ្លែស្វាយដោយប្រើចំហាយទឹកក្តៅ (VHT) និងរោងចក្រប្រព្រឹត្តិកម្មទឹកក្តៅ (HWT) ចំនួន ៥ ត្រូវបានរដ្ឋបាលគយចិនបានអនុម័តទទួលស្គាល់ជាផ្លូវការ ដែលរោងចក្រទាំងនេះ មានសមត្ថភាពវេចខ្ចប់ក្នុងបរិមាណ ១០ ម៉ឺនតោន ក្នុង ១ ឆ្នាំៗ។
លោកនិយាយថា៖ «ក្រុមហ៊ុនយើងខ្ញុំមានទស្សនវិស័យអភិវឌ្ឍហេដ្ឋរចនាសម្ព័ន្ធក្នុងចម្ការស្វាយបន្ថែមទៀត ដើម្បីឆ្លើយតបនឹងទីផ្សារនាំចេញ យើងនឹងរៀបចំជាប្រព័ន្ធតំណក់ទឹក ដូចនឹងចម្ការចេក ហើយនឹងមានរោងចក្រសម្អាតការវេចខ្ចប់ និងរោងចក្រកែច្នៃដំណាប់ស្វាយផងដែរ»។
លោក ហេង ស្រេង អ្នកគ្រប់គ្រងទូទៅនៅក្រុមហ៊ុន បឹង កេត ផ្លេនធីង & អ៊ិនដាសស្រ្ទៀល ឯ.ក (Boeung Ket Planting & Industrial Co Ltd) ដែលវិនិយោគលើដំណាំស្វាយ ចេក និងកៅស៊ូ បានឲ្យដឹងកាលពីថ្ងៃសុក្រថាលោកក៏បានចូលរួមកម្មវិធីសម្ពោធជាផ្លូវការនៃការនាំចេញស្វាយទៅកាន់ទីផ្សារចិនដោយផ្ទាល់ដែរ ដោយក្រុមហ៊ុនលោកបាននាំចេញផ្លែស្វាយស្រស់ ១ កុងតឺន័រ ទៅប្រទេសចិន ជាលើកដំបូង។
លោកនិយាយថា៖ «ខ្ញុំសប្បាយរីករាយណាស់ដែលយើងអាចនាំចេញស្វាយដោយផ្ទាល់ទៅចិនដែលជាទីផ្សារធំនៅក្នុងតំបន់»។
លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ថ្លែងក្នុងកម្មវិធីសម្ពោធនៃការនាំចេញផ្លែស្វាយស្រស់កាលពីថ្ងៃទី ៧ ឧសភាថា កម្ពុជាបាននាំចេញផ្លែស្វាយស្រស់ទៅចិនជាលើកដំបូងប្រមាណ ១០០ តោន ដោយលោកជឿថា បរិមាណនាំចេញនឹងបន្តកើនឡើងថែមទៀតពី ១ ឆ្នាំ ទៅ ១ ឆ្នាំ។
លោករដ្ឋមន្ត្រីបានឲ្យដឹងថា៖ «វិធានការអនាម័យ និងភូតគាមអនាម័យបាននិងកំពុងដើរតួនាទីមិនអាចខ្វះដែលជាស្ពានចម្លងផលិតផលកសិកម្មទៅកាន់ទីផ្សារបរទេស»។
លោក សាខុន បន្ថែមថា ទន្ទឹមនឹងនេះ រដ្ឋាភិបាលបានដាក់ចេញគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ ២០១៥-២០២៥ ដែលមានគោលដៅសំខាន់ពាក់ព័ន្ធនឹងវិស័យកសិកម្មដោយជំរុញការនាំចេញទំនិញកែច្នៃកសិកម្មឲ្យបាន ១២ ភាគរយ នៃបរិមាណនាំចេញសរុបនៅឆ្នាំ ២០២៥។
លោកបន្ថែមថា៖ «នេះ គឺជាសមិទ្ធផលជោគជ័យប្រកបដោយផ្លែផ្កាថ្មីមួយទៀត ដែលបានប្រសូតចេញពីកិច្ចសហប្រតិបត្តិការដ៏ល្អប្រសើររវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន»។
ទិន្នន័យពីក្រសួងកសិកម្ម រុក្ខាប្រមាញ់ និងនេសាទ បង្ហាញថា កម្ពុជាបាននាំចេញផ្លែស្វាយស្រស់ចំនួន ១៤២ ៥៥៦ តោន ក្នុងរយៈពេល ៤ ខែដំបូង ឆ្នាំ ២០២១ កើនឡើង ២៣៩,១៣ ភាគរយ ធៀបនឹងរយៈពេលដូចគ្នាឆ្នាំមុន។
គិតត្រឹមឆ្នាំ ២០២០ កម្ពុជាមានផ្ទៃដីដាំស្វាយប្រមាណ ១៣ ម៉ឺនហិកតា ក្នុងនោះផ្ទៃដីប្រមូលចំនួន ៩១ ១០៤ ហិកតា ដែលអាចផ្តល់ផលជាមធ្យមប្រមាណជាង ១,៣៨ លានតោន ក្នុង ១ រដូវ។ នេះបើតាមក្រសួងកសិកម្ម៕