.jpg)
កម្ពុជារំពឹងថា នឹងនាំស្វាយទៅទីផ្សារចិននៅដើមឆ្នាំ ២០២០។ នេះបើយោងតាមលទ្ធផលនៃកិច្ចប្រជុំរបស់ថ្នាក់ដឹកនាំក្រសួងកសិកម្មកម្ពុជា ជាមួយនឹងអ្នកជំនាញមកពីប្រទេស ចិន។ ហេង ជីវ័ន
ភ្នំពេញៈ ការនាំចេញផ្លែស្វាយជាផ្លូវការពីកម្ពុជាទៅកាន់ទីផ្សារប្រទេសចិនអាចនឹងចាប់ផ្តើមនៅដើមឆ្នាំ ២០២០ ខាងមុខ ខណៈក្រុមអ្នកជំនាញចិនបានវាយតម្លៃជាទូទៅថា ស្វាយកម្ពុជាមានគុណភាពល្អប្រសើរ។ នេះបើយោងតាមលទ្ធផលនៃកិច្ចប្រជុំរបស់ថ្នាក់ដឹកនាំក្រសួងកសិកម្មកម្ពុជា ជាមួយនឹងអ្នកជំនាញមកពីប្រទេស ចិន។
ក្រុមអ្នកជំនាញគយប្រទេស ចិន (GACC) កាលពីថ្ងៃទី ២៤ ខែវិច្ឆិកា បានធ្វើដំណើរមកកម្ពុជាដើម្បីធ្វើការពិនិត្យគុណភាព និងស្ថានភាពនៃការដាំដុះដំណាំស្វាយមុននឹងសម្រេចអនុញ្ញាត ឬមិនអនុញ្ញាតឲ្យកម្ពុជាអាចនាំចេញផ្លែស្វាយទៅចិនជាផ្លូវការ។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទដែលបានជួបប្រជុំជាមួយក្រុមជំនាញការផ្នែកគយចិនកាលពីចុងសប្តាហ៍មុននិយាយថា តាមរយៈការចុះមកអង្កេត សិក្សា និងវាយតម្លៃជាក់ស្តែងនៅតាមចម្ការស្វាយក្នុងខេត្តចំនួន ៥ របស់កម្ពុជាក្រុមអ្នកជំនាញចិនបានវាយតម្លៃថា ស្ថានភាពផ្លែស្វាយនៅកម្ពុជាមានភាពល្អប្រសើរ។
ក្នុងពេលចូលរួមសិក្ខាសាលាស្តីពីផ្ទះអភិរក្សត្រចៀកកាំកាលពីថ្ងៃទី ២៤ ខែវិច្ឆិកាកន្លងមកលោក ងិន ឆាយ បានថ្លែងថា៖ «បើចិនមកពិនិត្យមើលឃើញចម្ការស្វាយល្អ កន្លែងធ្វើពិពិធកម្មល្អនឹងអាចអនុញ្ញាតឲ្យនាំចេញនៅក្នុងខែកុម្ភៈ ឬខែមីនាខាងមុខ»។
លោក វណ្ណ ឫទ្ធី ប្រធានគ្រប់គ្រងទូទៅក្រុមហ៊ុន Angkor Mango ដែលជាក្រុមហ៊ុនប្រមូលទិញ និងនាំចេញផ្លែស្វាយនៅកាន់ទីផ្សារអន្តរជាតិកាលពីម្សិលមិញបាននិយាយថា ចិនជាទីផ្សារធំ តម្រូវការច្រើន និងមានតម្លៃខ្ពស់ ដូច្នេះបើមានការនាំចេញជាផ្លូវការនោះវានឹងចូលរួមចំណែកយ៉ាងច្រើនក្នុងការជួយអភិវឌ្ឍន៍កំណើនសេដ្ឋកិច្ចកម្ពុជា។
លោកបន្តថា បច្ចុប្បន្នផ្លែស្វាយកម្ពុជាក៏ត្រូវមាននាំចេញក្រៅផ្លូវការទៅចិនដែរ ដោយឆ្លងកាត់តាមប្រទេសវៀតណាម និងថៃ។ លោកថ្លែងថា៖ «នៅពេលមានការនាំចេញផ្លែស្វាយជាផ្លូវការទៅប្រទេសចិន វានឹងផ្តល់នូវផលប្រយោជន៍ជាច្រើនសម្រាប់កម្ពុជា ពិសេសតម្លៃ»។
តាមលោក ងិន ឆាយ កម្ពុជាបច្ចុប្បន្នមានចម្ការស្វាយប្រមាណពី ៦ ទៅ ៧ ម៉ឺនហិកតា៕LA
