.jpg)
អាជីវករលក់ត្រីនៅផ្សារខេត្តក្រចេះកំពុងច្រកត្រីចូលថង់។ រូបថត ហ៊ាន រង្សី
ភ្នំពេញៈ កម្ពុជារំពឹងថានឹងអាចនាំចេញផលវារីវប្បកម្មរបស់ខ្លួនជាផ្លូវការទៅកាន់ទីផ្សារអន្តរជាតិក្នុងរយៈពេល ២-៣ ឆ្នាំខាងមុខ ខណៈការនាំចេញកន្លងមកគឺជាផលិតផលនេសាទធម្មជាតិ។ នេះបើយោងតាមថ្នាក់ដឹកនាំនៃរដ្ឋបាលជលផល។
លោក អេង ជាសាន ប្រធានរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍កាលពីថ្ងៃអាទិត្យ ថាបច្ចុប្បន្នកម្ពុជាកំពុងធ្វើសិក្សាពីលទ្ធភាពក្នុងការបង្កើនការវិនិយោគលើវារីវប្បកម្មឲ្យបានកាន់តែច្រើនបន្ថែមទៀត ដើម្បីលើកកម្ពស់សមត្ថភាពនាំចេញជាផ្លូវការទៅកាន់ទីផ្សារអន្តរជាតិ។
លោកបន្តថា កន្លងមកកម្ពុជាក៏បាននាំចេញផលវារីវប្បកម្ម (ត្រីទីឡាព្យ៉ា) សាកល្បងទៅកាន់ប្រទេសជិតខាង និងទៅប្រទេសជប៉ុនរួចហើយ តែមិនទាន់មានការនាំចេញជាផ្លូវការទេ។
លោកថ្លែងថា៖ «យើងសង្ឃឹមថា ក្នុងរយៈពេល ២-៣ ឆ្នាំខាងមុខ ផលិតផលពីវារីវប្បកម្មខ្មែរនឹងត្រូវបាននាំចេញជាផ្លូវការទៅកាន់ទីផ្សារប្រទេសចិន សហគមន៍អឺរ៉ុប និងប្រទេសជប៉ុនជាដើម»។
លោកបន្តថា ដើម្បីអាចនាំចេញផលវារីវប្បកម្ម កម្ពុជាចាំបាច់ត្រូវតែខិតខំពង្រីកការចិញ្ចឹមត្រី និងគុណភាពអនាម័យឲ្យបានស្របតាមកម្រិតស្តង់ដាក្នុងស្រុក និងនាំចេញ។ លោកបន្តថា៖ «ជាមួយនឹងកំណើនប្រជាជនជារៀងរាល់ថ្ងៃកម្ពុជាក៏ត្រូវខិតខំក្នុងការពង្រឹងការវិនិយោគលើវារីវប្បកម្មបន្ថែមទៀត ដើម្បីបំពេញកំណើនតម្រូវការក្នុងស្រុកនឹងឈានឆ្ពោះទៅការនាំចេញទៅកាន់ទីផ្សារអន្តរជាតិជាផ្លូវការ»។
បើតាមលោក ជាសាន ក្នុងរយៈពេល ៣-៤ ឆ្នាំចុងក្រោយនេះទិន្នផលវារីវប្បកម្មនៅកម្ពុជាបានកើនឡើងជាមធ្យម ២០ ភាគរយជារៀងរាល់ឆ្នាំ។ ទោះយ៉ាងណាលោកបញ្ជាក់ថាចំនួននេះបើធៀបជាមួយនឹងប្រទេសជិតខាងគឺនៅមានកម្រិតទាបនៅឡើយ។
លោកថ្លែងថា៖ «បច្ចុប្បន្នយើងកំពុងជំរុញខ្លាំងលើការងារវារីវប្បកម្មនេះ ជាក់ស្តែងកាលពីឆ្នាំមុនយើងបានធ្វើការសិក្សា និងស្រាវជ្រាវនៅតាមកសិដ្ឋានចិញ្ចឹម ដោយបានណែនាំ និងបង្រៀនពីវិធីសាស្ត្រក្នុងការចិញ្ចឹមត្រី ដែលមានដូចជា ការជ្រើសរើសពូជ ចំណី ការប្រើប្រាស់ថ្នាំ ជាដើម»។
របាយការណ៍ប្រចាំឆ្នាំ ២០១៩ របស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ផ្នែកវារីវប្បកម្មចិញ្ចឹមត្រី និងបង្គាអនុវត្តបានចំនួន ៣០៧ ៤០៨ តោន កើនឡើង ៥៣ ៣៦០ តោនធៀបនឹងឆ្នាំ ២០១៨។
កាលពីចុងសប្តាហ៍មុនក្នុងឱកាសជួបពិភាក្សាជាមួយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក Fumiaki Takahashi ប្រធានសមាគមជប៉ុន-កម្ពុជា និងជាអតីតឯកអគ្គរាជទូតជប៉ុនប្រចាំកម្ពុជា បាននិយាយថា កម្ពុជាគឺជាប្រទេសដែលមានសក្តានុពលវិនិយោគលើវិស័យជាច្រើនក្នុងនោះវារីវប្បកម្មគឺជាផ្នែកមួយដែលកំពុងទទួលបានការចាប់អារម្មណ៍ពីវិនិយោគិនជប៉ុន។
លោកនិយាយថា៖ «បច្ចុប្បន្នមានក្រុមហ៊ុនជប៉ុនមួយកំពុងសិក្សាលើលទ្ធភាពក្នុងការវិនិយោគលើវារីវប្បកម្ម (ចិញ្ចឹមត្រីទីឡាព្យ៉ា) ដើម្បីកែច្នៃរួចនាំចេញនៅប្រទេសជប៉ុន»។
លោកប្រាប់ទៀតថា ជាមួយនឹងឱកាសវិនិយោគជាច្រើននេះលោកក៏គ្រោងនឹងដឹកនាំគណប្រតិភូនៃក្រុមហ៊ុនពាណិជ្ជកម្មនាំមុខធំៗរបស់ជប៉ុនមកធ្វើទស្សនកិច្ចនៅកម្ពុជាក្នុងខែធ្នូ ឆ្នាំ ២០២០ នេះដើម្បីធ្វើការសិក្សាស្វែងយល់បន្ថែមអំពីឱកាសវិនិយោគ គោលនយោបាយ និងលក្ខខណ្ឌសំខាន់ៗមួយចំនួនផងដែរ។
លោក វេង សាខុន បានលើកឡើងថា វិស័យកសិកម្ម រុក្ខាប្រមាញ់ និងនេសាទនៅកម្ពុជានារយៈពេលប៉ុន្មានឆ្នាំចុងក្រោយនេះមានការរីកចម្រើនគួរឲ្យកត់សម្គាល់តាមរយៈគោលនយោបាយ និងផែនការអភិវឌ្ឍន៍វិស័យកសិកម្មឆ្នាំ ២០១៩-២០២៣ និងគោលនយោបាយលើកទឹកចិត្តជាច្រើនទៀត។
លោកបន្តថា ការវិនិយោគលើវារីវប្បកម្មនឹងជួយផ្តល់នូវអត្ថប្រយោជន៍យ៉ាងច្រើនសម្រាប់កម្ពុជា ហើយលោកសូមសម្តែងនូវឆន្ទ:គាំទ្រ និងលើកទឹកចិត្តដល់ក្រុមហ៊ុនជប៉ុនក្នុងការវិនិយោគលើវិស័យវារីវប្បកម្មនៅកម្ពុជាផងដែរ។
លោកថ្លែងថា៖ «ការចិញ្ចឹមត្រីពិតជាបានចូលរួមចំណែកជួយដល់កសិករទាំងការងារ និងប្រាក់ចំណូល ព្រមទាំងរួមចំណែកកាត់បន្ថយការនេសាទធម្មជាតិពីទន្លេ ស្ទឹង បឹង ព្រែក ស្របពេលដែលទិន្នផលត្រីមាននិន្នាការធ្លាក់ចុះដោយសារសេចក្តីត្រូវការមានការកើនឡើងជាលំដាប់ និងការប្រែប្រួលអាកាសធាតុ»៕LA
