.jpg)
កិច្ចប្រជុំទ្វេភាគីស្តីពីសហប្រតិបត្តិការប៉ាតង់រវាងលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម ជាមួយលោក António Campinos ប្រធានអង្គភាពប្រកាសនីយបត្រតក្កកម្មអឺរ៉ុប (EPO) កាលពីថ្ងៃចន្ទ។ រូបថត ក្រសួងឧស្សាហកម្ម និងសិប្បកម្ម
ភ្នំពេញ: កម្ពុជាសម្រេចបន្តសុពលភាពប្រកាសនីយបត្រតក្កកម្ម (ប៉ាតង់) របស់សហគមន៍អឺរ៉ុបដើម្បីជំរុញការវិនិយោគពីអឺរ៉ុបក្នុងប្រទេសកម្ពុជា។
ការសម្រេចធ្វើឡើងក្នុងកិច្ចប្រជុំទ្វេភាគីស្តីពីសហប្រតិបត្តិការប៉ាតង់រវាងលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម ជាមួយលោក António Campinos ប្រធានអង្គភាពប្រកាសនីយបត្រតក្កកម្មអឺរ៉ុប (EPO) កាលពីថ្ងៃចន្ទ។
ក្រសួងឧស្សាហកម្ម និងសិប្បកម្ម និងអង្គភាពប្រកាសនីយបត្រតក្កកម្មអឺរ៉ុប បានចុះហត្ថលេខាលើអនុស្សរណៈយោគយល់គ្នាស្តីពីសហប្រតិបត្តិការប៉ាតង់ កាលពីថ្ងៃទី ២៣ ខែមករា ឆ្នាំ ២០១៧។
ការស្នើសុំចុះបញ្ជីការពារទទួលស្គាល់សុពលភាពប៉ាតង់របស់សហគមន៍អឺរ៉ុបនៅកម្ពុជាមានចំនួន ២៣០។ ក្នុងនោះការដាក់ពាក្យស្នើសុំចំនួន ១ ត្រូវបានប្រកាសដោយផ្ទាល់ដោយក្រសួងឧស្សាហកម្ម។
ក្នុងជំនួបនេះលោក ចម ប្រសិទ្ធ បានស្នើសុំឲ្យអង្គភាពប្រកាសនីយបត្រតក្កកម្មអឺរ៉ុបជួយបណ្តុះបណ្តាលធនធានមនុស្សដល់មន្ត្រីរបស់កម្ពុជា។ លោកថ្លែងថា៖ «ការងារកម្មសិទ្ធិបញ្ញាមានសារៈសំខាន់ និងជះឥទ្ធិពលដល់សេដ្ឋកិច្ច»។
លោក António Campinos ប្រធានអង្គភាពប្រកាសនីយបត្រតក្កកម្មអឺរ៉ុបបានឲ្យដឹងថាអង្គភាពនេះនឹងគាំទ្រដល់ការផ្តល់បណ្តុះបណ្តាលធនធានមនុស្ស និងបន្តសហប្រតិបត្តិការជាមួយកម្ពុជា។ លោកថ្លែងថា៖ «ដំណើរទស្សនកិច្ចមកកម្ពុជានៅពេលនេះដើម្បីពង្រឹងទំនាក់ទំនងទ្វេភាគី និងមកចូលរួមបើកសន្និសីទស្តីពី កម្មសិទ្ធិបញ្ញាដែលរៀបចំនៅក្រុងភ្នំពេញ និងខេត្តសៀមរាប»។
លោក ចម ប្រសិទ្ធ បានឲ្យដឹងថា កម្ពុជាមានកិច្ចសហប្រតិបត្តិការជាមួយសិង្ហបុរី ជប៉ុន ចិន និងសហគមន៍អឺរ៉ុបស្តីពីការចុះបញ្ជី និងការទទួលស្គាល់សុពលភាពប្រកាសនីយបត្រតក្កកម្ម។
ទិន្នន័យរបស់ក្រសួងឧស្សាហកម្ម និងសិប្បកម្មបានបង្ហាញថាចាប់តាំងពី ២០១៥ មកទល់នឹងពេលនេះ ក្រសួងទទួលបានពាក្យស្នើសុំចុះបញ្ជីប្រកាសប៉ាតង់ចំនួន ៨១៦ ក្នុងនោះ ១៥០ ត្រូវបានពិនិត្យសម្រេច។
អនុស្សរណៈយោគយល់គ្នានេះត្រូវបានចូលជាធរមានចាប់ពីថ្ងៃហត្ថលេខានេះតទៅ និងមានសុពលភាព ៥ ឆ្នាំ នឹងអាចបន្ត ៥ ឆ្នាំទៀតដោយស្វ័យប្រវត្តិ បើគ្មានភាគីណាមួយស្នើសុំមិនបន្តសុពលភាព៕LA
