The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ស្នើ​ចិន​ឲ្យ​ជួយ​សង់​មណ្ឌល​ចែកចាយ​ទំនិញ

កម្ពុជា​ស្នើ​ចិន​ឲ្យ​ជួយ​សង់​មណ្ឌល​ចែកចាយ​ទំនិញ

កប៉ាល់​ដឹក​កុងតឺន័រ​​ចូល​​ចត​នៅ​កំពង់ផែ​ក្រុង​ឈីងចូវ ប្រទេស​ចិន។
កប៉ាល់​ដឹក​កុងតឺន័រ​​ចូល​​ចត​នៅ​កំពង់ផែ​ក្រុង​ឈីងចូវ ប្រទេស​ចិន។ រូបថត លាង ផាន់ណារ៉ា

កម្ពុជា​ស្នើ​ចិន​ឲ្យ​ជួយ​សង់​មណ្ឌល​ចែកចាយ​ទំនិញ

ណាននីង-ប្រទេស​ចិនៈ ប្រទេស​កម្ពុជា​បាន​ដាក់​សំណើ​​​ទៅ​រាជរដ្ឋាភិបាល​ចិន​ដើម្បី​សុំ​ឲ្យ​ជួយ​សាងសង់​មជ្ឈមណ្ឌល​ចែកចាយ​ទំនិញ​មួយ​នៅ​ក្នុង​ប្រទេស​កម្ពុជា​ដើម្បី​បង្កើន​ល្បឿន​ការ​ទុកដាក់​ និង​ចែកចាយ​ទំនិញ​ឲ្យ​បាន​លឿន​ និង​ទាន់​ពេលវេលា​ជាពិសេស​គឺ​ដើម្បី​កាត់​បន្ថយ​ការ​ចំណាយ​ទៅ​លើ​ការ​ដឹក​ជញ្ជូន។

ការ​ស្នើសុំ​នេះ​ត្រូវ​បាន​ធ្វើ​ឡើង​ស្រប​ទៅ​នឹង​ការ​សម្ពោធ​មជ្ឈមណ្ឌល​ព័ត៌មាន​ភ័ស្តុភារ​កំពង់ផែ​​ចិន-អាស៊ាន កាល​ពី​សប្តាហ៍​​មុន​នៅ​​ឈីងចូវ​ស្ថិត​នៅ​តំបន់​ស្វយ័ត​ខេត្ត​ក្វាងស៊ី ភាគ​ខាង​ត្បូង​នៃ​ប្រទេស​ចិន។

មជ្ឈមណ្ឌល​នេះ​នឹង​ក្លាយ​​ជា​មូលដ្ឋាន​យុទ្ធសាស្រ្ត​សម្រាប់​ការ​ចែកចាយ​ទំនិញ និង​នាំ​ក្រុមហ៊ុន​​​ដឹក​ជញ្ជូន​ទាំងអស់​ឲ្យ​មាន​កិច្ចសហប្រតិបត្តិការ​ជិត​ស្និទ្ធ​ជាមួយ​គ្នា​។

លោក លឹម ស៊ីដេនីន ​រដ្ឋលេខាធិការ​ក្រសួង​សាធារណការ​ និង​ដឹក​ជញ្ជូន​បាន​ថ្លែង​ទៅ​កាន់​ក្រុម​អ្នក​សារព័ត៌មាន​នៅ​ក្នុង​វេទិកា​សហប្រតិបត្តិការ​សេដ្ឋកិច្ច​ឈូងសមុទ្រ Pan-Beibu លើក​ទី ៩ និង វេទិកា​​អភិវឌ្ឍន៍​ច្រក​របៀង​សេដ្ឋកិច្ច​ចិន និង​ឥណ្ឌូចិន​ថា៖ «គោលដៅ​របស់​យើង​គឺ​ធ្វើ​យ៉ាង​ណា​ដើម្បី​ចែក​ចាយ​ទំនិញ​ឲ្យ​បាន​រហ័ស និង​ទាន់​ពេលវេលា​ទៅ​ឲ្យ​អតិថិជន​ និង​មាន​តម្លៃ​ទាប»។

ដោយ​បដិសេធ​ផ្តល់​ព័ត៌មាន​លម្អិត​លោក​ថ្លែង​​​ថា៖ «កន្លង​មក​យើង​អត់​បាន​គិតគូរ​ថា​ត្រូវ​សហការ​គ្នា​ទេ​ម្នាក់​ទៅ​ដឹក​នាំ​តាម​ផ្លូវ​ទឹក​ទៅ​ម្នាក់​ដឹកនាំ​តាម​ផ្លូវគោក​ទៅ​វា​ទៅ​ដល់​ដែរ​ប៉ុន្តែ​វា​យឺត​ចំណាយ​ខ្ពស់​វា​ថ្លៃ។ ដូច្នេះ​ទំនិញ​យើង​មិន​អាច​ប្រឡង​ប្រណាំង​ជាមួយ​គេ​បាន។ ដូច្នេះ​យើង​ត្រូវ​មាន​មជ្ឈមណ្ឌល​មួយ​គិតគូរ​ពី​យុទ្ធសាស្ត្រ​គួរ​ទៅ​តាម​ដឹក​តាម​ណា​ធ្វើ​ម៉េច​ឲ្យ​វា​បាន​រហ័ស»។

ទោះ​បី​យ៉ាង​ណា​ការ​ស្នើសុំ​នេះ​ពុំ​ទាន់​ត្រូវ​បាន​បញ្ជាក់​​ដោយ​ក្រុម​មន្រ្តី​ចិន​នៅ​ឡើយ​នោះ​ទេ​ខណៈ​ក្រសួង​នៅ​កំពុង​សិក្សា​ទៅ​លើ​ទីតាំង និង​អំពាវនាវ​ឲ្យ​ប្រទេស​ចិន​ផ្តល់​ជំនួយ​បច្ចេកទេស និង​ការ​បណ្តុះ​បណ្តាល​ធនធាន​មនុស្ស​។

លោក​បញ្ជាក់​ថា៖ «មក​ដល់​ពេល​នេះ​យើង​នៅ​តែ​កំពុង​​ធ្វើការ​ស្រាវជ្រាវ​រក​ទីតាំង​ប្រសើរ​បំផុត​ស្វែងរក​ការ​វិនិយោគ​ហើយ​យើង​ពុំ​ទាន់​ធ្វើការ​ប៉ាន់​ស្មាន​ពី​តម្លៃ​នៅ​ឡើយ​»៕

អត្ថបទគួរចាប់អារម្មណ៍