.jpg)
លោក អ៊ូក សោភ័ណ (ស្តាំទី ២) ជួបជាមួយតំណាង Thai Airways។ សហការី
ភ្នំពេញៈ កម្ពុជាបានស្នើឱ្យក្រុមហ៊ុនអាកាសចរណ៍ Thai Airways ជួយសហការលក់ផលិតផលប្រណីតខ្មែរនៅលើយន្តហោះ Thai Smile ដែលគ្រោងនឹងបើកដំណើរការដឹកជញ្ជូនភ្ញៀវទេសចរប្រចាំថ្ងៃពីប្រទេសកម្ពុជា ឡាវ វៀតណាម នៅខែកក្កដាខាងមុខ។
ការស្នើនេះត្រូវបានធ្វើឡើងដោយលោក អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃក្នុងឱកាសជួបពិភាក្សាជាមួយប្រតិភូក្រុមហ៊ុន Thai Airways (Thai Smile) ដែលដឹកនាំដោយលោក Viset Sontichai នាយកផ្នែកពាណិជ្ជកម្មកាលពីរសៀលថ្ងៃចន្ទ ទី ២៥ ខែ មករា ឆ្នាំ ២០២១ នៅស្ថានឯកអគ្គរាជទូតកម្ពុជាប្រចាំនៅទីក្រុងបាងកក។
លោក អ៊ូក សោភ័ណ បានប្រាប់ ភ្នំពេញ ប៉ុស្តិ៍ថា ក្នុងជំនួបនោះលោកបានជម្រាបដល់ប្រតិភូក្រុមហ៊ុន Thai Airways ពីកិច្ចប្រឹងប្រែងរបស់ស្ថានទូត ក្នុងការអនុវត្តការទូតសេដ្ឋកិច្ចដែលផ្តោតសំខាន់លើវិស័យពាណិជ្ជកម្ម វប្បធម៌ និងទេសចរណ៍ ព្រមទាំងវឌ្ឍនភាពនៃជំងឺកូវីដ ១៩ ក្នុងប្រទេសកម្ពុជា ដែលមកទល់ថ្ងៃនេះ គឺពុំទាន់មានអ្នកបាត់បង់ជីវិតដោយសារជំងឺនេះឡើយ។
លោកថ្លែងថា៖ «យើងមិនទាន់បានឯកភាពអ្វីនៅឡើយទេ តែខាងគាត់បានទទួលសំណើយើងដើម្បីពិភាក្សាជាមួយថ្នាក់ដឹកនាំ។ ឥឡូវយើងទាំងអស់គ្នាក៏រង់ចាំមើលអំពីស្ថានភាពនៃកូវីដដោយសារយើងមានវ៉ាក់សាំងការពារជំងឺកូវីដ ១៩ នេះ។ ការណ៍នេះជាកិច្ចខិតខំប្រឹងប្រែងរបស់យើងក្នុងការអនុវត្តសេដ្ឋកិច្ចការទូតដើម្បីជួយជំរុញផលិតផលក្នុងស្រុក និងចង់ឱ្យខាងវិនិយោគទុនថៃអាចមានទំនាក់ទំនងដោយផ្ទាល់ជាមួយដៃគូនៅក្នុងស្រុកយើង»។
លោកស្រី កែវ មុំ ប្រធានក្រុមហ៊ុននំស្រួយលីលី បានសាទរជាមួយគំនិតផ្តួចផ្តើមនេះ ដោយហេតុថា វានឹងជួយផ្សព្វផ្សាយផលិតផលក្នុងស្រុកទៅភ្ញៀវទេសចរអន្តរជាតិដែលធ្វើដំណើរតាមក្រុមហ៊ុន Thai Airways អាចភ្លក្សរសជាតិផលិតផលដោយផ្ទាល់តែម្តងអំឡុងពេលធ្វើដំណើរ។
លោកស្រីបន្ថែមថា៖ «នេះជាគំនិតផ្តួចផ្តើមដ៏ល្អដែលលោកឯកអគ្គរាជទូតយើងប្រចាំនៅទីក្រុងបាងកកស្នើដល់ក្រុមហ៊ុន Thai Airways ព្រោះភ្ញៀវដែលធ្វើដំណើរតាមជើងហោះហើររបស់ក្រុមហ៊ុនគាត់អាចទទួលទានដោយផ្ទាល់នូវផលិតផលរបស់យើង។ លើសពីនេះទៀត វិនិយោគិនដែលធ្វើដំណើរជាមួយ Thai Airways ក៏អាចភ្លក្សបាន ដូច្នេះវាបានបង្កើតឱកាសមួយដ៏ល្អ បើពួកគេទទួលទានហើយឆ្ងាញ់ និងទទួលស្គាល់នូវគុណភាពផលិតផលរបស់យើង គេនឹងទាក់ទងមកយើងផ្ទាល់តែម្តង»។
បច្ចុប្បន្នក្រុមហ៊ុននំស្រួយលីលីបានធ្វើការនាំចេញទៅកាន់បណ្តាប្រទេសនានាទាំងក្នុងតំបន់អឺរ៉ុប អាមេរិក និងអាហ្វ្រិកដែលមានប្រមាណ ១៣ ប្រទេសលើសកលលោក។ លោកស្រីបន្ថែមទៀតថា ក្រុមហ៊ុនក៏កំពុងពង្រីកខ្សែចង្វាក់ផលិតកម្មនំបន្លែក្រៀមដើម្បីជំរុញការនាំចេញផងដែរ។
យោងតាមសេចក្តីប្រកាសព័ត៌មានរបស់ស្ថានទូតថៃបន្ទាប់កិច្ចប្រជុំនោះបានដកស្រង់ប្រសាសន៍របស់លោក Viset Sontichai និងសហការីថា ក្រុមហ៊ុន Thai Airways បានទទួលយកសំណើរបស់លោកអគ្គរាជទូត និងបានសន្យាបន្តធ្វើការជាមួយការិយាល័យអនុព័ន្ធពាណិជ្ជកម្មអមស្ថានទូត ដើម្បីរៀបចំបញ្ជីផលិតផលប្រណីតខ្មែរ ព្រមទាំងផ្សព្វផ្សាយសេវាកម្មជើងហោះហើររបស់ Thai Airways ជូនទៅដល់ធុរជន និងភ្ញៀវទេសចរក្នុងប្រទេសកម្ពុជា និងថៃ៕ LA
