ភ្នំពេញៈ កម្ពុជាបានរំកិលចំណាត់ថ្នាក់មួយពិន្ទុនៅឆ្នាំនេះសម្រាប់ការទាក់ទាញ និងការកើនឡើងអ្នកមានទេពកោសល្យ ខណៈរបាយការណ៍នៃសន្ទស្សន៍សមត្ថភាពប្រកួតប្រជែងអ្នកមានទេពកោសល្យពិភពលោក (GTCI) ឆ្នាំ ២០១៩ ចេញផ្សាយនៅសប្ដាហ៍នេះ បានផ្ដល់ចំណាត់ថ្នាក់ដល់ប្រទេស កម្ពុជា ១០៧ ក្នុងចំណោមប្រទេស ១២៥។
កាលពីឆ្នាំមុន GTCI បានផ្ដល់ចំណាត់ថ្នាក់ដល់ប្រទេសកម្ពុជា ១០៨ ក្នុងចំណោម ១១៩ ប្រទេស ស្ដីពីសន្ទស្សន៍ទាក់ទាញអ្នកមានទេពកោសល្យសកល។ របាយការណ៍របស់ GTCI នៅឆ្នាំនេះ ដែលបានរៀបចំឡើងដោយសាលាពាណិជ្ជកម្មអន្តរជាតិ INSEAD ជាមួយក្រុមហ៊ុន Adecco Group និងក្រុមហ៊ុន Tata Communications បានផ្ដល់ចំណាត់ថ្នាក់ប្រទេស ១២៥ ទូទាំងពិភពលោកទាក់ទងសមត្ថភាពពួកគេ ក្នុងការទាក់ទាញ អភិវឌ្ឍ និងបង្កើនទេពកោសល្យ។
លោក Alain Dehaze អគ្គនាយកក្រុមហ៊ុន Adecco Group បានឲ្យដឹងថា ពិភពការងារផ្លាស់ប្តូរយ៉ាងរហ័ស វាមានភាពចាំបាច់កាន់តែខ្លាំងឡើងៗក្នុងការមានព័ត៌មានអំពីសមត្ថភាពប្រកួតប្រជែងអ្នកមានទេពកោសល្យ ដែលអាចរកបានជាគោលពីរបៀបប្រទេសមួយកំពុងប្រកួតប្រជែងជាមួយនឹងដៃគូរបស់ខ្លួន និងដើម្បីយល់ដឹងពីនិន្នាការ ដែលជះឥទ្ធិពលដល់លំហូរអ្នកមានទេពកោសល្យ និងសមត្ថភាពប្រកួតប្រជែងអ្នកមានទេពកោសល្យ ដើម្បីកែលម្អប្រតិបត្តិការ។
លោកថ្លែង៖ «បញ្ហាប្រឈមសេដ្ឋកិច្ចដ៏សំខាន់នៃសម័យរបស់យើងថាតើវានឹងទៅដូចម្ដេចក្នុងការផ្ទេរបច្ចេកវិទ្យា ជារបៀបដែលយើងធ្វើការងារ និងរស់នៅ យើងអាចខិតខំក្នុងការកែលម្អសមត្ថភាពប្រកួតប្រជែងអ្នកមានទេពកោសល្យ និងការរីកចម្រើនទូទាំងពិភពលោក»។
ប្រទេស កម្ពុជាត្រូវជាប់ចំណាត់ថ្នាក់នៅពីក្រោយប្រទេសទាំងអស់នៅក្នុងអាស៊ាន។
ប្រទេស សិង្ហបុរី ជាប់ចំណាត់ថ្នាក់លើគេក្នុងតំបន់ ដែលជាប់ចំណាត់ថ្នាក់ទី ២ ក្នុងចំណោម ១២៥ ប្រទេស។ ម៉ាឡេស៊ី ជាប់ចំណាត់ថ្នាក់ទី ២៧ ប្រ៊ុយណេចំណាត់ថ្នាក់ទី ៣៦ ហ្វីលីពីន ទី ៥៨ ថៃ ទី ៦៦ ឥណ្ឌូនេស៊ី ទី ៦៧ ឡាវ ទី ៩១ និងវៀតណាម ទី ៩២។ មីយ៉ាន់ម៉ា មិនត្រូវបានរាប់បញ្ចូលក្នុងការសិក្សានេះទេ។
សន្ទស្សន៍នេះវាស់វែងការផ្ដល់ចំណាត់ថ្នាក់ជារួម ដោយពឹងផ្អែកលើប្រភេទសំខាន់ៗ ៦ គឺសមត្ថភាព ការទាក់ទាញ ការរីកចម្រើន ការការពារ ជំនាញវិជ្ជាជីវៈ និងបច្ចេកវិទ្យា និងជំនាញចំណេះដឹងសកល។
លោក ង៉ែត ជូ អ្នកប្រឹក្សាយោបល់ជាន់ខ្ពស់នៅក្រុមហ៊ុន Emerging Markets Consulting បានឲ្យដឹងថា ការវាយតម្លៃស្ដីពីសមត្ថភាពប្រកួតប្រជែងអ្នកមានទេពកោសល្យកម្ពុជា មិនមានផលប៉ះពាល់ខ្លាំងដល់ទស្សនៈក្រុមវិនិយោគិនបរទេសចំពោះកម្ពុជានោះទេ ដោយសារតែកម្ពុជា មិនទាន់មានចំណាត់ថ្នាក់សម្រាប់ក្រុមហ៊ុនបច្ចេកវិទ្យាទំនើបនៅឡើយទេ។
លោកថ្លែងថា៖ «ក្រុមវិនិយោគិនបរទេសភាគច្រើន ចំពោះកម្ពុជាផ្ដល់អាទិភាពដល់កម្លាំងពលកម្ម ជាមួយនឹងជំនាញគ្រប់គ្រង ដើម្បីគាំទ្រកំណើនរបស់ពួកគេ និងមិនកំណត់ទិសដៅច្រើនលើកម្លាំងពលកម្មមានទេពកោសល្យខ្ពស់នោះទេ»។
លោកបន្តថា៖ «ប្រទេសកំពុងអភិវឌ្ឍន៍ដូចជា កម្ពុជាមិនទាន់មានចំណាត់ថ្នាក់សម្រាប់ក្រុមហ៊ុនបច្ចេកវិទ្យាទំនើបនៅឡើយទេ ដូច្នេះតម្រូវការកម្លាំងពលកម្មមានទេពកោសល្យខ្ពស់មិនច្រើននោះទេ»៕LA