.jpg)
អ្នកប្រើប្រាស់សេវាអ៊ីនធឺណិតតាមហាងកាហ្វេ នាពេលកន្លងមក។ ហុង មិនា
ភ្នំពេញៈ រដ្ឋាភិបាលកម្ពុជាបានអនុម័តបង្កើត «ច្រកទ្វារអ៊ីនធឺណិតជាតិ (NIG)» ក្នុងគោលបំណងជួយសម្រួល និងគ្រប់គ្រងការតភ្ជាប់អ៊ីនធឺណិតប្រកបដោយប្រសិទ្ធភាព និងស័ក្តិសិទ្ធិភាពលើការកៀរគរចំណូល សន្ដិសុខសង្គម ថែរក្សារបៀបរៀបរយសណ្តាប់ធ្នាប់សង្គម វប្បធម៌ និងអារ្យធម៌ឱ្យល្អប្រសើរ។
បើយោងតាមអនុក្រឹត្យដែលមាន ២០ មាត្រា និង ១១ ជំពូក ហើយត្រូវបានចុះហត្ថលេខាដោយលោកនាយករដ្ឋមន្ដ្រី ហ៊ុន សែន កាលពីថ្ងៃទី ១៦ ខែកុម្ភៈ និងចេញផ្សាយជាសាធារណៈកាលពីម្សិលមិញ (ថ្ងៃទី ១៧ ខែកុម្ភៈ) ការបង្កើត NIG គឺដើម្បីសម្របសម្រួល និងគ្រប់គ្រងការតភ្ជាប់បណ្តាញអ៊ីនធឺណិតក្នុងប្រទេស (DIX) និងអន្តរជាតិ (IIG)។
NIG រួមបញ្ចូល DIX សម្រាប់ការផ្លាស់ប្តូរទិន្នន័យអ៊ីនធឺណិតក្នុងប្រទេស និង IIG សម្រាប់ការផ្លាស់ប្តូរទិន្នន័យអ៊ីនធឺណិតក្នុងស្រុក និងអន្តរជាតិ។
អនុក្រឹត្យបន្តថា៖ «ច្រកទ្វារអ៊ីនធឺណិតក្នុងប្រទេស និងច្រកទ្វារអ៊ីនធឺណិតអន្តរជាតិនៃ NIG នឹងត្រូវធ្វើប្រតិបត្តិការនៅរាជធានីភ្នំពេញ ខេត្តព្រះសីហនុ ក្រុងប៉ោយប៉ែតនៃខេត្តបន្ទាយមានជ័យ និងក្រុងបាវិតនៃខេត្តស្វាយរៀង និងនៅតាមទីតាំងដែលកំណត់ផ្សេងទៀតដោយផ្អែកលើតម្រូវការពិតប្រាកដដែលបានអនុម័តដោយក្រសួងប្រៃសណីយ៍ និងទូរគមនាគមន៍ (MPTC)»។
បើយោងតាមអនុក្រឹត្យនេះសម្រាប់ប្រតិបត្តិកររបស់ NIG បុគ្គលណាមួយដែលចង់ប្រតិបត្តិការច្រកទ្វារអ៊ីនធឺណិតជាតិ ត្រូវតែដាក់ពាក្យសុំអាជ្ញាប័ណ្ណពីប្រតិបត្តិករទូរគមនាគមន៍កម្ពុជា (TRC)។
អនុក្រឹត្យនេះបន្តថា៖ «ពួកគេត្រូវតែគ្រប់គ្រង និងជួយសម្រួលដល់ការតភ្ជាប់ និងការប្រើប្រាស់ហេដ្ឋារចនាសម្ព័ន្ធ បណ្ដាញ និងសេវាអ៊ីនធឺណិតនៅច្រកទ្វារអ៊ីនធឺណិតជាតិព្រមទាំងហេដ្ឋារចនាសម្ព័ន្ធឆ្លងកាត់ព្រំដែនគោកផងដែរ។ ពួកគេត្រូវតែរៀបចំអង្គបែងចែកផ្លូវបមាណី និងគ្រឿងសម្ភារបរិក្ខារពាក់ព័ន្ធ ដើម្បីធានាគុណភាព និងសុវត្ថិភាពនៃការតភ្ជាប់ទៅបណ្ដាញ។ ការតភ្ជាប់ និង/ឬ ភៀរីង ជាមួយប្រតិបត្តិករនៃច្រកទ្វារអ៊ីនធឺណិតជាតិ និងអន្តរជាតិផ្សេងទៀត និងដើម្បីប្រតិបត្តិការជាមួយ MPTC និង TRC ព្រមទាំងអាជ្ញាធរសមត្ថកិច្ចដើម្បីចាត់វិធានការបន្ទាន់ ដើម្បីបង្ក្រាប និងកាត់ផ្ដាច់រាល់ការតភ្ជាប់បណ្ដាញណាមួយដែលប៉ះពាល់ដល់ប្រាក់ចំណូលជាតិ សន្ដិសុខ សណ្ដាប់ធ្នាប់សង្គម។ល។»។
លោកស្រី សុខ ចិន្តា ប្រធាននាយកប្រតិបត្តិ មេគង្គណេត (Mekong Net) ដែលជាប្រតិបត្តិករផ្ដល់សេវាអ៊ីនធឺណិតឈានមុខគេមួយនៅប្រទេសកម្ពុជា បានឱ្យដឹងថា លោកស្រីមិនបានដឹងលម្អិតពីអនុក្រឹត្យនេះទេ ប៉ុន្តែលោកស្រីបានចង្អុលបង្ហាញថា វានឹងមានប៉ះពាល់ខ្លះៗដល់អាជីវកម្មរបស់លោកស្រី។
លោកស្រីថ្លែងថា៖ «ខ្ញុំបានឃើញអនុក្រឹត្យនៅថ្ងៃនេះ។ ជាធម្មតា រដ្ឋាភិបាលចង់គ្រប់គ្រងច្រកទ្វារគឺត្រឹមត្រូវហើយ ប៉ុន្តែអ្វីដែលសំខាន់គឺថាតើរដ្ឋាភិបាលនឹងរួមបញ្ចូលគ្នា ISP ទាំងអស់ដូចម្ដេច ដើម្បីឱ្យស្ថិតនៅក្រោមច្រកទ្វារតែមួយជាមួយប្រព័ន្ធតែមួយ។ ខ្ញុំគិតថា យើងនឹងមានការពិភាក្សាបន្ថែមទៀតលើបញ្ហានេះ»។
យោងតាមលោកស្រី ចិន្តា ជាធម្មតាសម្រាប់ ISP មួយបាននាំចូលនូវច្រកទ្វារ ២ ឬ ៣ ដើម្បីឱ្យការតភ្ជាប់បណ្ដាញ សម្រាប់អតិថិជននៅដំណើរការ នៅពេលការតភ្ជាប់ត្រូវបានរំខាន។ លោកស្រីបន្តថា៖ «នៅពេលនេះខ្ញុំកំពុងរង់ចាំមើលការពន្យល់ពីក្រសួងអំពីរបៀបដំណើរការច្រកទ្វារអ៊ីនធឺណិតជាតិ។ សម្រាប់ពួកយើងប្រសិនបើយើងបាត់បង់ការតភ្ជាប់មួយ យើងអាចមានការតភ្ជាប់មួយចំនួនទៀត ដើម្បីធានាដំណើរការអាជីវកម្មរបស់យើងសម្រាប់អតិថិជន»។
លោក ប៉ា ចាន់រឿន ប្រធានវិទ្យាស្ថានកម្ពុជាដើម្បីប្រជាធិបតេយ្យដែលបានបង្ហោះអនុក្រឹត្យនេះនៅលើហ្វេសប៊ុកផ្ទាល់របស់លោក និងបានសរសេរថា អនុក្រឹត្យនេះពិតជាមានសារៈសំខាន់ណាស់ ដែលវាអាចនឹងក្លាយជាយន្តការច្បាប់មួយសម្រាប់ការការពារសង្គម និងសន្ដិសុខរបស់ប្រទេសជាតិផងដែរ។
លោកបានសរសេរថា៖ «បើអនុវត្តតាមបច្ចេកទេស អនុក្រឹត្យស្តីពីការបង្កើតច្រកទ្វារអ៊ីនធឺណិតជាតិនេះនឹងក្លាយជាយន្តការផ្នែកច្បាប់ដើម្បីថែរក្សា និងការពារសន្តិសុខ និងសុវត្ថិភាពនៃការប្រើប្រាស់អ៊ីនធឺណិតនៅកម្ពុជា។ ប៉ុន្តែបើវាត្រូវបានប្រើប្រាស់ផ្នែកនយោបាយ វានឹងក្លាយជាឧបករណ៍ដើម្បីរឹតត្បិតសិទ្ធិ និងប្រជាធិបតេយ្យឌីជីថល (digital democracy)»។
លោក ជា វ៉ាន់ដេត រដ្ឋមន្ដ្រីក្រសួងប្រៃសណីយ៍ និងទូរគមនាគមន៍បានឱ្យដឹងនៅក្នុងកិច្ចប្រជុំមួយស្ដីពីសេចក្ដីព្រាងអនុក្រឹត្យនេះកាលពីខែសីហា ឆ្នាំមុន ថា អនុក្រឹត្យនេះមានគោលបំណងកៀរគរប្រាក់ចំណូលជាតិ និងបង្កើនល្បឿនអ៊ីនធឺណិត និងការតភ្ជាប់ក្នុងប្រទេសកម្ពុជា។ លោកបន្តថា ប្រតិបត្តិករនានា ត្រូវប្រកាសមួយស្ដីពីគុណភាពសេវានឹងត្រូវផ្ដល់ និងបញ្ជាក់ថា តម្លៃការតភ្ជាប់នឹងទាប។
យោងតាមទិន្នន័យបានពី TRC ចំនួនអ្នកជាវទូរស័ព្ទចល័តដ៏សកម្មនៅក្នុងប្រតិបត្តិករទាំង ៦ របស់ប្រទេសកម្ពុជាមានចំនួន ២០ ៤៨១ ០៥១ គិតត្រឹមចុងខែឧសភា ឆ្នាំមុន។ ចំនួនអ្នកជាវអ៊ីនធឺណិតចល័តនៅក្នុងក្រុមហ៊ុនផ្គត់ផ្គង់ទាំង ៧ របស់ប្រទេសកម្ពុជា ក៏បានកត់ត្រាក្នុងចំនួន ២,៣៦ ភាគរយ ធ្លាក់ចុះមកនៅត្រឹម ១៤ ៨៦៣ ៤៣៥ ចំណែកឯការជាវអ៊ីនធឺណិតខ្សែនៅក្នុងក្រុមហ៊ុនផ្ដល់សេវាទាំង ៣៧ របស់ប្រទេសកម្ពុជាបានកត់ត្រាចំនួន ៣៣,០៧ ភាគរយ កើនឡើងដល់ ២៤៩,១៣២៕ LA
