.jpg)
អ្នកជំនាញពិនិត្យមើលគុណភាពអង្ករកិនរួច មុននឹងច្រកចូលការុងសម្រាប់នាំចេញ។ ហេង ជីវ័ន
ភ្នំពេញ៖ កម្ពុជាគ្រោងនឹងធ្វើការនាំចេញអង្ករទៅកាន់ទីផ្សារប្រទេស ទីម័រខាងកើត ក្នុងខែឧសភាខាងមុខ ដែលជាទីផ្សារថ្មីរបស់កម្ពុជា ដើម្បីបំពេញនូវតម្រូវការទីផ្សារដែលកំពុងកើនឡើងក្នុងប្រទេសនេះចំពេលមានការរីករាលដាលជំងឺកូវីដ-១៩។ នេះបើយោងតាមសហព័ន្ធស្រូវអង្ករកម្ពុជា។
លោក ហ៊ុន ឡាក់ ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា (CRF) ប្រាប់ភ្នំពេញប៉ុស្តិ៍កាលពីថ្ងៃអាទិត្យថា ប្រទេស ទីម័រខាងកើត បានស្នើសុំទិញអង្ករពីកម្ពុជាដើម្បីទប់ស្កាត់ការខ្វះខាតស្បៀងដោយសារជំងឺកូវីដ ១៩។
លោកបន្តថា ការស្នើសុំទិញនេះត្រូវបានធ្វើឡើងក្នុងកិច្ចប្រជុំមួយកាលពីថ្ងៃសុក្រ រវាងភាគីកម្ពុជាដែលមានក្រុមហ៊ុនហ្គ្រីនត្រេដនៃក្រសួងពាណិជ្ជកម្ម សហព័ន្ធស្រូវអង្ករកម្ពុជា ជាមួយនឹងលោក Ermenegildo Kupa Lopes អគ្គរដ្ឋទូតសាធារណរដ្ឋទីម័រខាងកើតប្រចាំនៅកម្ពុជា។
លោក ហ៊ុន ឡាក់ បានបន្តថា ភាគីទីម័រខាងកើតមិនទាន់បានបញ្ជាក់ពីបរិមាណអង្ករដែលត្រូវនាំចេញពីកម្ពុជានៅឡើយទេ ក៏ប៉ុន្តែភាគីទីម័រនឹងផ្ញើលិខិតផ្លូវការមួយមកកម្ពុជា ដើម្បីបញ្ជាក់ពេលវេលាបរិមាណ និងប្រភេទអង្ករ។
លោកថ្លែងថា៖ «យើងអាចធ្វើការនាំចេញអង្ករទៅកាន់ទីផ្សារទីម័រខាងកើតក្នុងអំឡុងខែឧសភាខាងមុខនេះ។ ខ្ញុំគិតថា ក្នុងជំហានដំបូង យើងអាចនាំចេញអង្ករទៅទីម័រ ក្នុងតម្លៃប្រហែល ១០ លានដុល្លារ»។
លោកបញ្ជាក់ថា៖ «ឆ្លើយតបនឹងសំណើរបស់ប្រទេស ទីម័រខាងកើត នេះ កម្ពុជាបានស្នើសុំឲ្យភាគីទីម័របញ្ជូនលិខិតជាផ្លូវការតាមរយៈក្រសួងការបរទេសកម្ពុជា ដោយបញ្ជាក់ពីបរិមាណ រយៈពេលនៃការផ្គត់ផ្គង់ និងលក្ខខណ្ឌផ្សេងទៀត រួមមានការវេចខ្ចប់ ការដឹកជញ្ជូន និងប្រភេទអង្ករជាដើម»។
លោកបន្ថែមថា រដ្ឋាភិបាលកម្ពុជាព្រមទាំងសហព័ន្ធស្រូវអង្ករកម្ពុជាកំពុងខិតខំប្រឹងប្រែងស្វែងរកទីផ្សារថ្មីបន្ថែមទៀត ខណៈការនាំចេញអង្កររបស់កម្ពុជាទៅកាន់ទីផ្សារប្រទេស ចិន អឺរ៉ុប ម៉ាឡេស៊ី សិង្ហបុរី និងហុងកុង មានការកើនឡើងគួរឲ្យកត់សម្គាល់ក្នុងត្រីមាសទី១ ឆ្នាំ ២០២០ នេះ។
លោកបញ្ជាក់ថា៖ «យើងសង្ឃឹមថា ការនាំចេញអង្ករឆ្នាំនេះនឹងមានបរិមាណកើនឡើងជាងឆ្នាំមុន ខណៈអង្ករនាំចេញមានតម្លៃល្អជាងឆ្នាំមុនៗ រីឯតម្លៃស្រូវទិញពីកសិករក៏មានតម្លៃខ្ពស់សមរម្យផងដែរ»។
បើតាមលោក ហ៊ុន ឡាក់ ប្រទេស ទីម័រខាងកើត មិនធ្លាប់ទិញអង្ករពីកម្ពុជាទេនាពេលកន្លងមក។ លោកនិយាយថា ការបញ្ជាទិញអង្ករពីកម្ពុជានេះ ដោយសារប្រទេស វៀតណាម ដែលជាប្រទេសនាំចេញច្រើនទៅប្រទេសនេះបានកាត់បន្ថយការនាំចេញអង្ករ ដើម្បីទប់ស្កាត់បញ្ហាកង្វះខាតស្បៀង ខណៈការរាតត្បាតជំងឺកូវីដ ១៩។
របាយការណ៍ក្រសួងកសិកម្ម រុក្ខាប្រមាញ់ និងនេសាទ បង្ហាញថា ការនាំចេញអង្ករពីកម្ពុជាសម្រេចបាន ២៣០ ៩៤៨ តោន ដែលមានតម្លៃ ១៦១ លានដុល្លារ ក្នុងរយៈពេល ៣ ខែដំបូង ឆ្នាំ ២០២០ កើន ៣៥,២០ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះការនាំចេញទៅប្រទេស ចិន មានចំនួន ១០១ ៣៤៥ តោន ទៅតំបន់អឺរ៉ុប ៧០ ០៤០ តោន ខណៈការនាំចេញទៅប្រទេសក្នុងតំបន់អាស៊ានមាន ២៨ ៧៩៩ តោន និងទិសដៅនាំចេញផ្សេងទៀតមាន ៣០ ៧៦៤ តោន។
ការនាំចេញអង្កររបស់កម្ពុជា បានចំនួន ៦២០ ១០៦ តោនកាលពីឆ្នាំ ២០១៩ ធ្លាក់ចុះ ០,៩៧ ភាគរយបើធៀបនឹងឆ្នាំ ២០១៨៕ LA
