ភ្នំពេញៈ ប្រទេសកម្ពុជាបានខាតបង់ប្រាក់ចំណូលប្រមាណ៥០លានដុល្លារក្នុងមួយឆ្នាំៗ ពីការលួចម្លងកម្មវិធីSoftware ហើយអ្នកជំនាញក្នុងវិស័យនេះលើកឡើងថាកំពុងតែប៉ះពាល់ដល់កំណើនសេដ្ឋកិច្ចរបស់ប្រទេស។
លោក ភីលី វុង ប្រធានសមាគមធុរៈបច្ចេកវិទ្យាព័ត៌មាននិងទូរគមនាគមន៍បានមានប្រសាសន៍ថា software ប្រមាណ៩៥ ភាគរយដែលកំពុងប្រើប្រាស់នៅកម្ពុជាគឺជា Software លួចចម្លង ដែលបានធ្វើឲ្យប៉ះពាល់ដល់ការវិនិយោគផ្នែក Software ហើយបានធ្វើឲ្យក្រុមហ៊ុនឯកជនត្រូវចំណាយច្រើនសម្រាប់ការការពារទិន្នន័យរបស់ខ្លួននិងការខាតបង់ចំណូលពន្ធរបស់រដ្ឋាភិបាលផងដែរ។ លោកបន្តថាគ្រប់ការខាតបង់រួមបញ្ចូលគ្នាមានជាទឹកប្រាក់ចំនួនប្រមាណ៥០លានដុល្លារជារៀងរាល់ឆ្នាំ។
លោក ភីលីវុង បានបញ្ជាក់បន្ថែមថា៖ «វាមិនមែនជាការខាតបង់តែលើអ្នកដំឡើងSoftware ប៉ុណ្ណោះទេតែវាក៏បានប៉ះពាល់ដល់អ្នកចែកចាយផលិតផលទាក់ទងនឹង IT ពិសេសចំណូលពន្ធរបស់រដ្ឋាភិបាល។សិស្សដែលបានបញ្ចប់ការសិក្សាលើជំនាញដំឡើងកម្មវិធីកុំព្យូទ័រក៏បាត់បង់ឱកាសក្នុងការបង្កើតកម្មវិធីថ្មីបន្ថែមផងដែរ»។
លោក សុខ យ៉េង ប្រធានផ្នែកបច្ចេកទេស និងជាស្ថាបនិកក្រុមហ៊ុន និបប្រូ កម្ពុជា NEPRO Cambodia ដែលជំនាញខាងដំឡើងការពារ និងជួសជុលប្រព័ន្ធកុំព្យូទ័របានឲ្យដឹងថាស្ថានភាពនៃការអភិឌ្ឍសេដ្ឋកិច្ច និងស្ថានភាពជីវភាពរបស់ប្រជាជនតែងមានទំនាក់ទំនងគ្នាយ៉ាងជិតស្និទ្ធ។ លោកបានលើកឡើងថាក្រុមហ៊ុនក្នុងស្រុកជាច្រើនបានយល់ដឹងពីផលលំបាកក្នុងការប្រើប្រាស់ Software លួចចម្លងប៉ុន្តែពួកគេមានភាពលំបាកក្នុងការចំណាយទៅលើផលិតផលនោះ។ លោកបានបន្តថា៖ «តម្លៃ software ដែលមានអាជ្ញាប័ណ្ណត្រឹមត្រូវមានតម្លៃថ្លៃណាស់បើប្រៀបធៀបនឹងចំណូលក្នុងស្រុករបស់ប្រជាជនយើងហេតុដូច្នេះហើយបានជាប្រជាជនជាច្រើនពិបាកនឹងចំណាយលុយដើម្បីទិញ»។
ទោះបីជាយ៉ាងនេះក្តី លោកសង្កេតឃើញថានិន្នាការនៃការប្រើប្រាស់ផលិតផលដែលមានអាជ្ញាប័ណ្ណត្រឹមត្រូវហាក់កំពុងកើនឡើងនៅក្នុងទីក្រុងភ្នំពេញជាពិសេសក្នុងចំណោមក្រុមហ៊ុនវិនិយោគបរទេសនិងក្រុមហ៊ុនក្នុងស្រុកដែលសហការវិនិយោគជាមួយបរទេស។
លោក លីម ផាណ្ណា ទីប្រឹក្សាក្រសួងពាណិជ្ជកម្មមានប្រសាសន៍ថាបើទោះបីជាប្រទេសយើងស្ថិតក្នុងប្រទេសក្រីក្រក៏ដោយក៏យើងគួរព្យាយាមគោរពច្បាប់កម្មសិទ្ធិបញ្ញាទាំងអស់គ្នាព្រោះថាបើពុំដូច្នោះទេនឹងមិនមានការច្នៃប្រឌិតឬការបង្កើតថ្មីផងដែរ ហើយនេះក៏នឹងប៉ះពាល់ដល់កេរិ៍្តឈ្មោះរបស់ប្រទេស។
លោកបាន លើកឡើងនៅចំពោះមុខម្ចាស់ហាងលក់កុំព្យូទ័រប្រហែល ២០០នាក់ ដែលបានចូលរួមសន្និសីទទាក់ទងនឹងការប៉ះពាល់នៃការប្រើប្រាស់ software ថតចម្លង កាលពីម្សិលមិញនៅក្រសួងពាណិជ្ជកម្មថា៖ «ក្រសួងពាណិជ្ជកម្មនឹងចាត់វិធានការចំាបាច់គ្រប់បែបយ៉ាងដើម្បីលើកកម្ពស់ច្បាប់»។
លោក ភីលី វុង ឲ្យដឹងថាបើការអនុវត្តច្បាប់មិនរឹងមាំ ការប្រើ software ថតចម្លងនឹងនៅបន្តកើនឡើង។ លោកបន្តថា ៖«បើអ្នកបើកហាងលក់គ្រឿងអលង្ការហើយអ្នកមិនបានចាក់សោទ្វារដោយទុកចំហវាចោលពេលយប់នោះនឹងមានចោរចូលមកលួចរបស់មានតម្លៃរបស់អ្នក»៕
