The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ចុះ​ MOU ​នាំ​ផលិតផល​កសិកម្ម​ទៅ ​រុស្ស៊ី

កម្ពុជា​ចុះ​ MOU ​នាំ​ផលិតផល​កសិកម្ម​ទៅ ​រុស្ស៊ី

កម្មករ​កំពុង​ចាក់​គ្រាប់ពោត​ចូល​ឡាន នៅ​ខេត្ត​ប៉ៃលិន​នា​ពេល​កន្លងមក។ ពោត​ស្ថិត​ក្នុង​ផលិតផល​ដែល​កម្ពុជា​គ្រោង​នាំ​ទៅ​រុស្ស៊ី​។
កម្មករ​កំពុង​ចាក់​គ្រាប់ពោត​ចូល​ឡាន នៅ​ខេត្ត​ប៉ៃលិន​នា​ពេល​កន្លងមក។ ពោត​ស្ថិត​ក្នុង​ផលិតផល​ដែល​កម្ពុជា​គ្រោង​នាំ​ទៅ​រុស្ស៊ី​។ ហេង ជីវ័ន

កម្ពុជា​ចុះ​ MOU ​នាំ​ផលិតផល​កសិកម្ម​ទៅ ​រុស្ស៊ី

ភ្នំពេញៈ មន្ត្រី​បាន​ឲ្យ​ដឹង​ថា កម្ពុជា​នឹង​ចុះហត្ថលេខា​លើ​អនុស្សរណៈ​នៃ​ការ​យោគយល់​គ្នា​(MOU)​ស្ដីពី​ការ​នាំ​ចេញ​ផលិតផល​កសិកម្ម​ទៅកាន់​ប្រទេស​រុស្ស៊ី​។

លោក កែន រដ្ឋា អ្នក​នាំពាក្យ​ក្រសួង​ពាណិជ្ជកម្ម​មិន​បាន​បង្ហាញ​ពេលវេលា​ពិតប្រាកដ​ពី​ការ​ចុះហត្ថលេខា​លើ MOU នេះ​ទេ ប៉ុន្តែ​លោក​បាន​លើក​ឡើង​ថា​ប្រទេស​រុស្ស៊ី​កំពុង​ជំរុញ​ឲ្យ​កិច្ចព្រមព្រៀង​នេះ​ដំណើរការ​ឲ្យ​ឆាប់​តាម​ដែល​អាច​ធ្វើ​ទៅ​បាន។

លោក​បន្ត​ថា​៖ «​យើង​កំពុង​បន្ត​ការងារ​លើ​ការ​ធ្វើ​បញ្ជី​ផលិតផល​កសិកម្ម​ដ៏​មាន​សក្ដានុពល​ឲ្យ​ប្រទេស​រុស្ស៊ី​ត្រួតពិនិត្យ ហើយ​យើង​នឹង​អាច​ចុះហត្ថលេខា​លើ MOU ភា្លម​បន្ទាប់ពី​នោះ​»​។

កិច្ចព្រមព្រៀង​ដំបូង​នេះ​ត្រូវ​បាន​ធ្វើ​ឡើង​ក្នុង​អំឡុងពេល​នៃ​កិច្ចប្រជុំ​រវាង​រដ្ឋមន្ដ្រី​អភិវឌ្ឍន៍​សេដ្ឋកិច្ច​រុស្ស៊ី និង​រដ្ឋមន្ដ្រី​ពាណិជ្ជកម្ម​កម្ពុជា​កាលពី​ថ្ងៃ​ព្រហស្បតិ៍​ក្នុង​កិច្ចប្រជុំ​រដ្ឋមន្ដ្រី​សេដ្ឋកិច្ច​អាស៊ាន​លើក​ទី​៤៦​នៅ​ក្នុង​ប្រទេស​មីយ៉ាន់ម៉ា។

លោក កែន រដ្ឋា បាន​បញ្ជាក់​ថា ផលិតផល​ជាច្រើន​នឹង​ស្ថិត​នៅក្នុង​បញ្ជី​ផលិតផល​ដែល​មាន​អាទិភាព​រួមមាន​អង្ករ ពោត ដំឡូងមី ផ្លែឈើ បន្លែ ម្រេច និង​កៅស៊ូ​។

លោក​បន្ត​ថា កិច្ចប្រជុំ​ដែល​នាំឲ្យ​មាន​កិច្ចព្រមព្រៀង​នេះ​ធ្វើ​ឡើង​បន្ទាប់ពី​កម្ពុជា​បាន​បញ្ជូន​សំណើ​ទៅ​ប្រទេស​រុស្ស៊ី​ឲ្យ​ត្រួតពិនិត្យ​លិខិត​ផ្លូវការ​របស់​ខ្លួន​ កាលពី​ឆ្នាំ​២០០៧ ដោយ​លើក​ឡើង​ថា​ប្រទេស​រុស្ស៊ី​នឹង​អនុញ្ញាត​ឲ្យ​មាន​ការ​នាំ​ចូល​ផលិតផល​កសិកម្ម​ជាង​ ៣០០០​ប្រភេទ​ពី​ប្រទេស​កម្ពុជា​ដោយ​មិន​គិត​ពន្ធ និង​មិន​គិត​កូតា​នៅពេល​ប្រទេស​រុស្ស៊ី​ក្លាយ​ជា​សមាជិក​របស់​អង្គការ​ពាណិជ្ជកម្ម​ពិភពលោក (WTO)​។

លោក​បាន​លើក​ឡើង​ថា​៖ «​យើង​មាន​កិច្ចព្រមព្រៀង ប៉ុន្តែ​យើង​មិន​ដែល​អនុវត្ត​វា​ជាក់ស្តែង​ទេ កិច្ចប្រជុំ​នេះ​នឹង​ត្រួតពិនិត្យ​លើ​អ្វី​ដែល​បាន​ពិភាក្សា​»​។

កិច្ចព្រមព្រៀង​នេះ​ត្រូវ​បាន​មើល​ឃើញ​ថា​ជា​ផ្នែក​មួយ​នៃ​កិច្ចខិតខំ​ប្រឹងប្រែង​របស់​ប្រទេស​រុស្ស៊ី​ក្នុង​ការ​ធ្វើ​ពិពិធកម្ម​លើ​ទិសដៅ​ផលិតផល​កសិកម្ម និង​ផលិតផល​អាហារ​ដោយសារ​តែ​ការ​ដាក់​ទណ្ឌកម្ម និង​ការ​ហាមឃាត់​ការ​នាំ​ចូល​អាហារ​ពី​បណ្ដា​ប្រទេស​លោក​ខាង​លិច​។

លោកស្រី ចន្ធី អ្នកវិភាគ​សេដ្ឋកិច្ច​ឯករាជ្យ​ថ្លែង​ថា​ក្រៅពី​ចាត់ទុក​វា​ថា ជា​ដំណឹង​មួយ​ដ៏ល្អ​លោក​ចោទសួរ​ថា​តើ​កម្ពុជា​អាច​ផលិត​បាន​គ្រប់គ្រាន់​ដើម្បី​នាំចេញ​ទេ ខណៈ​ប្រទេស​រុស្ស៊ី​ជា​ទីផ្សារ​ដ៏ធំ​មួយ ហើយ​ម៉្យាង​ទៀត​ផលិតផល​កសិកម្ម​របស់​កម្ពុជា​ភាគច្រើន​នៅពេល​នេះ​កំពុង​ត្រូវ​បាន​នាំ​ចេញ​ទៅ​ប្រទេស​ជាច្រើន​ផ្សេង​ទៀត​ផង​ដែរ​។

លោក​លើក​ឡើង​ថា​ក្រៅពី​ការ​នាំ​ចេញ​ផលិតផល​កសិកម្ម​ទៅ​កាន់​ប្រទេស​រុស្ស៊ី កម្ពុជា​អាច​នាំចូល​ផលិតផល​អាហារ​ពាក់កណ្ដាល​សម្រេច​ដើម្បី​នាំ​ចេញ​ទៅកាន់​ប្រទេស​រុស្ស៊ី​ផង​ដែរ​ដោយសារ​តែ​ប្រទេស​នេះ​កំពុង​តែ​ហាមឃាត់​ការ​នាំ​ចូល​ផលិតផល​អាហារ​ភាគច្រើន​ពី​បណ្ដា​ប្រទេស​លោក​ខាង​លិច​ដោយសារ​តែ​វិបត្តិ​នៅក្នុង​ប្រទេស​អ៊ុយក្រែន​។

លោក​បាន​បញ្ជាក់​ថា​៖ «​វា​នឹង​ជា​ឱកាស​ដ៏ល្អ​មួយ​សម្រាប់​កម្ពុជា​ដើម្បី​លើក​កម្ពស់​យីហោ និង​គុណភាព​ផលិតផល​របស់​ខ្លួន យើង​អាច​ផលិត​សម្រាប់​អ្នក​ប្រើប្រាស់​នៅ​ប្រទេស​រុស្ស៊ី​។ បើ​យើង​មិន​អាច​ផលិត និង​នាំ​ចេញ​បាន​នៅក្នុង​ចំនួន​ច្រើន យើង​អាច​ផលិតផល​ដែល​មាន​គុណភាព​ដើម្បី​ទទួល​បាន​ការ​ទទួល​ស្គាល់ ដូច្នេះ​ពួកគេ​នឹង​នៅ​តែ​រក្សា​ការ​បញ្ជា​ទិញ​ពី​ពួកយើង​ទោះបី​ជា​ស្ថានការណ៍​នយោបាយ​ផ្លាស់ប្តូរ​នៅក្នុង​ពេល​អនាគត​ក៏ដោយ​»។

យោងតាម​លិខិត​របស់​លោក Dmitry Tsvetkov ឯកអគ្គរដ្ឋទូត​សហព័ន្ធ​រុស្ស៊ី​ទើប​នឹង​តែងតាំង​ថ្មី​ប្រចាំ​កម្ពុជា​ចេញ​ផ្សាយ​ដោយ​កាសែត​ភ្នំពេញ ប៉ុស្តិ៍​កាលពី​ខែ​មិថុនា ពាណិជ្ជកម្ម​ទ្វេភាគី​រវាង​ប្រទេស​ទាំង​ពីរ​បាន​កើនឡើង​ពី​១០,៨​លាន​ដុល្លារ កាលពី​ឆ្នាំ​ ២០០៦ ដល់​ ១៣៣,២​លាន​ដុល្លារ​អាមេរិក​កាលពី​ឆ្នាំ​មុន។

លោក​នាយករដ្ឋមន្ត្រី Dmitry Tsvetkov បាន​សរសេរ​នៅក្នុង​លិខិត​មួយ​កាលពី​ខែ​មិថុនា​ថា​៖ «​កិច្ចសហប្រតិបត្តិការ​ពាណិជ្ជកម្ម និង​សេដ្ឋកិច្ច​រវាង​ប្រទេស​រុស្ស៊ី និង​កម្ពុជា​កំពុង​កើនឡើង ហើយ​ប្រទេស​របស់​យើង​មាន​សក្តានុពល​ច្រើន​សម្រាប់​ការ​អភិវឌ្ឍ​ដ៏សកម្ម​»៕​PB

អត្ថបទគួរចាប់អារម្មណ៍